Aavali dhaneni onkandangala melongo lyaanona “Kankoshi”

0
49

Maria Namupala

OMUTWEWOMHEDI-Ngoloneya goshitopolwa shaShikoto Henock Kankoshi okwa kumike aavali ya kuthe ombinga melongo lyoyana. Ekumiko ndika okwe li popi ehuliloshiwike lya yi sho a popitha oshigwana shomoshikandjohogololo Okankolo.

Aaakwashigwana oyendji ya za momikunda dha kunduka Omutwewomhedi, oya li ya gongala posikola Omutwewomhedi nokupulakena etumwalaka lya Ngoloneya goshitopolwa, sho a li ta popitha esiku lyomapendafule. Kankoshi ta ti okwa konekwa aavali oyendji kaaye na esiloshimpwiyu momagumbo, nolundji iha ya kutha ombinga melongo lyaanona yawo, nonande oyo ye na oshinakugwanithwa oshinene okukuthombinga melongo lyaanona.

“ Otandi kumagidha aavali mwi itule melongo lyaanona, ne mu ya kwathele miilongwa yawo, kaleni aluhe hamu talele po oosikola nokutala nkene aanona taya ihumbata komanongelo, ya kumikeni ya longe iilonga yawo yoskola pethimbo, yo ya simaneke aalongi yawo, kaleni omeho nomakutsi gepangelo ne mu kale mushi kutya uunona weni otawu mono ngaa elongo lyongushu ndyoka wa pumbwa,” Kankoshi ati ngaaka.

Kankoshi ta ti aalongi naavali naya longele kumwe, yo taya kwashilipaleke kutya aanona ayehe ya adha oomvula dhokutameka omanongelo oya tamekithwa, yo taya yambidhidha aanona ya tseye kutya onakuyiwa oya pumbwa aantu ya longwa, opo eliko lyoshilongo tali vulu okuyambulwapo. “Aanona oyo aaleli yokomongula naashika, opo shi ningwe oya pumbwa okupewa elongo lyongushu petameko, aavali kaleni nokusila aanona oshimpwiyu okuya longekidhila iikulya ngele ta ya yi komanongelo osho wo okukwashilipaleka kutya iithigilwa longa mbyoka haya pewa kaalongi oha ye yi longo ngaa” ngoloneya tati.

Nonande lya adhika ethimbo lyefudho okwa tsikileko nokukumika aalongwa mboka yali ya holoka mengathithi enene, yi itule mo miilonga yawo yo ya tseye uuwanawa mboka taya likola melongo, nelalakano lyokuya koosikola.

Te ya indile opo ya kale yi ilonga sha esiku kehe, kutya okulesha iifokundaneki nokukonga omauyelele koointernet.Te ya kumike wo ya kale aluhe haya pula omapulo kaalongi yawo mpoka kaa ya uvite.

Okwa indile aakuluntu ya kale ye na ekwatathano ewanawa naalongi, nongele omunona gontumba iti ihumbata nawa posikola naya tseyithile aavali mbala, gwo omukundu ngoka gu kandulwe po ye omunona ta tsikile nelongo lye.

“Aavali omu na oshinakugwanithwa oshinene meputudho lyaanona yeni, ko ohakuti elongo ohali tameke megumbo, onkene pompito ndjino onda hala okumu kumika mu kale aluhe tamu yambidhidha aanona, ne tamu ya tekulile uuteku nomikalo omiwanawa, ndhoka tadhi kaleke aanona mondjila ombwaanawa no tayi tungu,” ta tsikileko ngaaka. Okwa gandja olupandu kaalongi mboka yena oshinakugwanithwa mokuputudhila aanona elongo lyongushu, nokukwathela aalongwa mboka ye na uunkundi woku ilonga, ta indile aanona ya longwe manga yeli mepipi eshona yo ya kale yena euveko melongo. Kankoshi ta ti ombelewa ye, yelelo lyaShikoto oyi ilongekidha okutalela po oosikola noku tala nkene tadhi shi enditha melongo. Ta ti otaya kala noku gandja omakwatho mpoka taya vulu, nokukwashilipaleka kutya aanona ayehe oya tumwa komanongelo ngaashi shi li pampango yoshilongo kutya omunona kehe okuna uuthemba woku kala a mona elongo, nokuya kosikola.

Esiku lyomapendafule ohali dhimbulukwa omumvo kehe momasiku 26 Aguste, omolwa oshiningwanima sha ningilwe momumvo 1966 pOmugulugombashe mpono pwa kanena oomwenyo dhomapendafule omaNamibia. Kankoshi okwa pula pomahala mpoka pwa fumvikwa omapendafule goshilongo opo pu simanekwe, go taga kala woo ga ndhindhilikwa nokwoopalekwa aluhe.

LEAVE A REPLY

Please enter your comment!
Please enter your name here