Efulo lyevi inaashi pitikwa uupyakadhi muuyuni awuhe

0
28

Omutoolinkundana

Windhoek-Okufula evi moNamibia otaku tiwa osha ninga onzo ompe yoshingoli.Ndele oshinima shika kashi li ashike uupyakadhi moNamibia kutya evi otali fulwa pomahala shaali pampango. Uupyakadhi mbuka otawu adhika wo miilongo yilwe muuyuni. MoKenya omupolisi okwa yahwa okusa kongundu yaantu ya li taya fulu evi momukunda shaa li pampango.

Mo Dubai, United Arab Emirates, moka ya tunga ontuntu ya ningwa kaantu, oya li ya kutha evi kohi yefuta, nongashingeyi evi olya pumba kutya ngaaka ndika ohaye li eta mo okuza koAustralia.Mo China etale limwe olya kukuta po oshoka aaChina oya li ya fulu evi okuza metale, ndyoka. Mo India omuna oongundu hadhi longitha oonkondo okukondolola efulo lyevi.

Palopota yIigwana Hangano evi ndyoka lya fulwa muuyuni sigo oompaka otali vulu okutungwa omakuma gokaungulita goometa 27 oku uka pombanda nosho wo oometa 27 muunene okudhingoloka ondjila yetango yopokati kuuyunio ano poEkwatolo.

MoNamibia okufula evi okwa kala uupyakadhi, ha kaa fuli yevi shaali pampango ndele osho uupyakadhi woo komukalo ngoka evi ndika hali fulwa, sho aafuli yalyo haya thigi iilambo iile yo ya nika oshiponga momahala ngoka haya fulu omavi ngoka. Omalambo ngoka haga thigwa mokati komikunda ohaga dhigupaleke onkalo yiimuna opo yi vule okunapa.

Shika osho etompelo ndyoka Uuministeli wOmudhingoloko Nuupashioni wa utha kutya efulo lyevi pehala lyontumba olya pitikwa ashike konima ngele opwa gandjwa ombapila yomudhingoloko, ndjoka tayi utha kutya oshi li nawa okufula evi pomudhingoloko ngoka.
Ndele molwashoka okufula evi oko ongeshefa tayi eta po oshindji mondjato yaafuli tayi, hingwa koshikondo shomatungo shoka sha pumbwa evi, aantu oyendji otaya fulu ashike evi shaali pampango no itaa ya ipulileko komudhingoloko.

Nonando Oshikondo shoka sha tseyithile opolisi opo yi tule miilonga Oveta yomudhingoloko newiliko lyago yomumvo 2007, molwashoka okufula evi okwa shangwa ongo oshinima shaali paveta uuna omuntu keena ombapila yomudhingoloko, okufula evi inaashi pitikwa otaku tsikile.

Paveta ndjika omuntu kehe ta fulu evi keena onzapo yomudhingoloko oku na okufutithwa ooN$500 000 nenge ta edhililwa mondholongo omimvo ntano nenge ta futu iimaliwa mbyoka ye ishewe ta yi mondholongo..

Ihe natango aantu oya tsikila okufula evi momahala ga yooloka momukalo guuhasha nokwaa ipulilako kombinga yomudhingoloko, taya yonagula omudhingoloko osho wo uuhupilo waakali mo momikunda moka evi hali fulwa.

Etompelo okufula evi olya nanthangwa. Ndika ohali longithwa okutholoma oondhopi, okaungulita osho wo okuninga omakende. Eindjipalo lyoshigwana olya eta wo eendelelo meyokomeho naandika olya ningi okufulwa kwevi onzo onene yelongitho ya landula omeya muuyuni.
Pethimbo ndika ootona oobiliona noobilliona dhevi otadhi longithwa muuyuni.

Evi hali longithwa okutunga ohali zi momilonga nomomafuta. Evi lyomombuga olya yelekana unene onkene ihali vulu okuvolonganithwa nuupu.Oopoloyeka oonene moDubai odha ninagula po mbala evi alihe lyomefuta, nonando iilando otayi tungwa mevi ngashingeyi, Dubai oha etamo evi okuza koAustralia.

Evi nando olya fa oshinima inaashi simana , epulo nompumbwe yalyo otayi fala mekanitho lyuuhupilo, eyonaguko lyuushitwe nomudhingoloko na ohali eta wo eso lyolyene nokuli.

Mo India, omuna elanditho lyevi momaalaka yaali paveta, ndjika ohayi wilikwa koongundu hadhi longitha oonkondo. Mo China, etale enene lyaPoyang otali kukuta po molwashoka mulyo otamu kuthwa evi. Aakali mo petale ndyoka mboka yi ikwatelela kulyo oku kwata oohi osho wo uudhila uutembuki wi ikwatelela kulyo molweendo lwawo lwo kwi inyenga omumvo kehe.

Mo Kenya, okufula evi momulonga dhomomikunda moka muna oohepele ngaashi poMakueni olya thigi aakwashigwana yaana ompito yokulongitha omeya.

Sho oshigwana sha tegelelwa shikoke lwaali momimvo 40 tadhi landula, iilonga iinene yolutenda olupe mbyoka ya pumbiwa, ayihe mbika otayi ka pumbwa okulongitha evi olindji. Ihe uupyakadhi owo mboka kutya omilonga nomunkulofuta gwa Kenya oya longithwa nale okufula mo evi lyokutunga omimvo dha piti. Ihe iilonga mbika yokumina evi oya guma unene omukunda gwaMakueni noonkondo.

Omumvo aguhe ondjele yuupyu nuutalala moMakueni ohayi kala pokati koodegre 35 C. Omilonga dhuudha evi ndhoka hadhi mono ashike omeya pethimbo lyomvula ohadhi tondoka mevi ekukutu. Pethimbo ndika omeya ohaga ningine mevi nokupungulwa kohi hoka.

Pethimbo lyokwenye oshigwana shaantu konyala omiliona yimwe ohashi hupu iilambo oku adha omeya. Ndele uuna evi lya fulwa mo momilonga ndhoka shoka hashi thigala po osho owala omamanya. Uuna omvula tayi loko nena omeya ihaga ningine we mevi ndele ohaga matuka ashike gu uka komeho. Onkene kapena omeya haga pungulwa mevi we kohi yomilonga ndhoka.

“Ohatu ithana omulonga nguka gwa sa’ osho omukalimo Anthony ati sho ta ligamene moshilambo oshile okutala koshitako shomulonga gwaana ehekevi gwa Kilome Ikolya moMakueni.Omimvo dhaashi unene odhindji dha piti po omulonga nguka ogwa li omufupi na ogwa li gwa yelekana. Ngashingeyi nguka ogwa ya muule konyala noometa omulongo okuza komunkulo gwago. Omidhi dhomiti mugo odha endjelela, go omamanya oga uluka mo mevi taga yadhimithwa koonte dhetango. Ka pena omuntu ta mono omeya mpakawe,” osho Anthony a ti.

Ku yamwe evi olyo omwenyo, ku yalwe ishewe evi olyo oshimaliwa. Momahala ngoka muna oompito dhiilonga dha pumba oto mono nkene oluhepo talu hingi aantu ya longe iniima iiwinayi nomudhingoloko gwawo.

Omupolisi gwomomudhingoloko ngoka a li eshi wike nawa Geoffrey Kasyoki okwa li a kambadhala okumweneka efulo lyevi moMakueni. Mu Febuluali 2011 okwa li a ponokelwa kongundu yaamati aagundjuka mokati komutenya. Mboka oye mu yaha niikuti yuuzigo taya tatula omutse gwe noku teta oshipa she.

Omuselekadhi gwe a thikama kombila ye okwa ti omulume okwa dhipagwa Irene a ti: “Okwa dhipagwa okutuma etumwalaka moshigwana kutya , ina mu kambadhala okuya moshipala iilonga yaamini yevi”Ontulo ye oya fudha okuyamo nokuzamo na okwa li ta kakama sho a li ta kambadhala oku adha evi ndyoka lya siikila ombila moka mwa fumvikwa omulume. – Ewi lyo BBC muAfrika olyagwedha koonkundana ndhika.

LEAVE A REPLY

Please enter your comment!
Please enter your name here