Mokufendela oto tungu oshigwana

0
14

Momapandja galwe moshifo shika epangelo okupitila mOshikondo shIimaliwa olya tokola okugandja ishewe oomwedhi hamano dhesilohenda kaafendeli mboka yena oongunga dhiifendela. Etokolo ndika otali pandulwa oshoka mboka ya li inaa ye shi pondola oku opaleka omambo gawo giifendela moomwedhi hamano dhopetameko lyomumvo nguka oye na ompito ngashingeyi okushi ninga.

Epulo olili ashike mpoka kutya omolwashike ngiika tse aafendeli inaatu longitha ompito ndjoka twa pelwe okufuta shoka tu na okugandja kepangelo.

Otwe shi ningi ngiika shono twaa uviteko nenge uumbanda, owa shike mbela? Osha simana opo kehe ngoka ha mono iiyemo yi vule oodola 50 001 komumvo a gandje iifendela ye kepangelo.

Oshikwawo kehe ngoka ini ishangitha ongo omufendeli okwa pumbwa okushi ninga pwaana okukwatakwata opo moku shi ninga a kwathele meyokomeho lyoshilongo.

Olundji inatu ilongekidha okufendela nohatu gandja omaipopilo gaana oonkondo, ihe ngele kehe gumwe, gwetu okwa longo shoka a tegelelwa okuninga mokugandja iifuta yokungulu nena epangelo otali ka gandja wo omayakulo ngoka ethimbo limwe olyo alike tali vuli oku ga gandja.

Uuna twa fendela atuhe no nawa nena otatu nkondopeke epangelo opo li longithe oonzo ndhoka okutunga omanongelo ga gwana moka oshigwana shokomeho tashi longelwa. Epangelo otali kutu wo aalongi opo ya longe oshigwana shoka nawa.

Iifendela yoye yomumvo kehe otayi kwatha wo opo iitopolwa hoka inaaku thikwa komayakulo ngoka ga pumbiwa komuntu esiku kehe ga thikithwe ko. Aakali mo momakuti otaya vulu okufaalelwa omeya mpoka inaaga thika po, otaya faalelwa wo oondjila mpoka inaadhi adha po, taya faalelwa omayakulo guunamiti hoka ihaaga monika ko.

Omayakulo agehe ngoka aanangeshefa ye wete itaaya mono mo oprofita ngele oye ga faalele aantu, ogo haga gandjwa kepangelo okupitila melongitho lyiifendela mbyoka hayi futwa koohandimwe komahangano gopaumwene naangoka gepangelo osho wo komalutu galwe agehe haga mono oshimaliwa mokulonga momahupilo goshilongo.

Onkene tu longitheni ompito ndjika ye silohenda twapewa ishewe opo tu opalekeni oongunga dhetu dhiifendela yokungulu omanga Maalitsa 2018 inaa thika. Tu futeni iffendela yetu oshoka osha simana okushininga nokuyakula yalwe momukalo nguka.

LEAVE A REPLY

Please enter your comment!
Please enter your name here