Moshitila Mwa Z’Ondjupa : Okushingitha nokambasikela

0
80

Onda hokolola kutya manga inandi za ko kuushimba wandje wotango, onda li nda landa okambasikela kandje kotangotango. Kiilonga hoka onda zile ko wo niinima oyindji yokushingitha, mwakwatelwa iihondjomwa. Onda li wo nda landa iinima yoku landitha mOholosaila mOtjiwarongo.

Iinima mbyoka onda tameke nduno oku ke yi shingitha po komambo kongeleka yetu kOkatana, hoka nda li handi mono iimaliwa oyindji. Ngame onda li handi yi ashike ndu uka kongeleka niinima yandje nde yi mangela komutumba gwombasikela. Sho ndi li momambo, iipindi yandje mbyoka onde yi thiga pondje kombasikela.

Omavi oga li omayamba pethimbo ndiyaka, kakwa li ku na aafuthi, onkene iipindi yandje kaya li hayi yakwa po.
Omambo ngele ga piti mo, onda li handi yala omakayiwa gandje opo ndi landithe iinima yandje.

Aashingithi otwa li twa pitikwa okulanditha poongeleka dhaKatoolika, kakele owala podha-ELCIN opo twa li ihaatu pitikwa. Ngame shaashi Omukatoolika, opo nda kala handi landitha pOkatana ketu mpoka.

Okupindika hwiyaka kuElim, nako otwa li ngaa twa hala ko, ihe okwa li Leonard Mukwiilongo, ngoka a li e na ko ositola yekuma, onkene ye ka li ha shingitha. Tandi landitha iinima yandje niimaliwa oya kala tayi ya. Okuza mpoka mongeshefa onda ningine mo nduno lela omutse nothing. Nando okushingitha nda li nde ku hokwa noonkondo, okwa kwidhidhikwa koshinakugwanithwa shokushuna kwandje kuuhwi kOmbaye okutiyali.

Momumvo 1958 sho nda kundana epatuluko lyiilonga yoohi kOmbaye, onda kambadhala okushuna kiilonga.
Okushuna kwandje kiilonga kOmbaye okwa li okupu, oshoka onda li tandi shuna ko momukalo gwomuniilonga omukulu. Onda yi kOndnagwa, e tandi gandja ombapila yandje yokoKeeninga, e tandi zalekwa okaholo ongomuniilonga omukulu omolwombapila ndjoka nda pethithilwe kuJordan yaAshipala. Ngaashi, shito, aayunguli otwa pitile mOshaanda moka twa li twa mbendekwa shoka hashi mbendekwa aayunguli: ohema yokake, okotse yokake, nomuhi gwomboloto, tse nokuukilila kOmbaye.

Ngame nda kutwa miilonga mofabulika yaKeeninga moshitopolwa shokupakela oohi shaKernel pauvathano lyombapila yiilonga ndjoka nda zile ko nayo, nonda ka longa kohi yaJordan yaAshipala, ngoka oye a li folomana gwoshitopolwa shoka. Miilonga yandje mbyoka iipe yokupakela oohi, onda li handi kwata ooR3.00 [ano ooN$3.00] koshiwike. Uuna nda longa olutayima, onda li handi vulu okufutwa ooR20.00[ano ooN$20.00] komwedhi.

Iilonga yandje yomoKernel oya li iiwanawa, moku yi yelekanitha naambiyaka yotango yokoHaiveleka gwaMuni. Iilonga yomoKernel, oya li ishewe manga hayi pupo, uuna oombautu inadhi kwata oohi, nomuntu oto vulu okuninga omasiku gaali sigo gatatu inoolonga.Nando ongawo ondjambi yetu yooR3.00 [ano ooN$3.00] moshiwike otwa li hatu yi futwa nando iilonga kayi po manga, ano hatu shangwa nando inatu longa sha. Shika kungame, osha li Kalunga lya teleka ethima enene.

LEAVE A REPLY

Please enter your comment!
Please enter your name here