Ohangwena oyo enyakwa lyotango muudhano woU-17 konooli

0
106

Shipi Elago

OSHAKATI-Osipana yoshitopolwa shaHangwena yaamati yo kohi yomimvo 17 oya ningi ondjokonona ehuliloshiwike lya ziko sho ya sindana po ekopi lyotango lyuudhano wOmusati Construction mboka wa li wa egululwa lwotango mOshakati oshiwike sha yi.
Ohangwena B oya li ya dhenge mo Oshana A medhingoloko lya hugunina nokuyelula po ekopi ndika. Uudhano mboka owa li wa tameke pehulilo lyomwedhi gwayi owa li wa hili iitopolwa ayihe ine yokoNooli Oshana, Ohangwena, Oshikoto nOmusati.

Kehe oshitopolwa osha li sha etelele oosipana mbali A na B. Uudhano owa li wa dhanwa sigo Olyomakaya ga ziko mokapale kEmanguluko mOshakati.

Uudhano wotango owa li wa patululwa kOshana A nOhangwena A moka Ohangwena A ya li ya dhenge mo Oshana A 1-0.
Oshikoto A osha li sha dhenge mo Omusati A, omanga Ohangwena B ya li ya dhengwa kOshikoto B 2-0.
Iitopolwa ayihe oya li ya mono ompito okudhana niitopolwa iikwawo mwaashoka ha shi takumwa round robin.
Ohangwena B nOshana A oyo ya li ya ulukile iitopolwa iikwawo komutse gwondjamba shono she eta, opo ya ye ke dhingoloko lya hugunina moka Ohangwena B ya li yeshipondola okudhenga mo Oshana nookoola mbali monola.

Osipana yaHangwena yaB ota yi etitha oonkondo naamboka ta ye ke yi taalela mekopi lyoSkorpion Zink oyena oku kala ya manga shapama oshoka uumati mbuka ota wu dhana okatanga ke li pombanda okuyelekanitha niitopolwa iikwawo.
Iitopolwa mbika oya li ta yi ilongekidhile uudhano wekopi Skorpion Zink lyaamati ye li kohi yomimvo 17 ndyoka ta li ka kalako oshiwike tashiya moshilandopangelo.

Iitopolwa yokoNooli oyi na ondjokonona ombwaanawa mekopi ndika unene tuu oshitopolwa shMusati shoka shi li osho enyakwa lyuudhano mbuka konima sho ya li ye li sindana po iikando iyali omanga ekopi ndika inaa li fudha po omvula ya zi ko.
Omukwateli komeho guudhano mbuka Alex Iitumba okwa li a kombo kombunda iitopolwa ine yokoNooli sho ya li ya yamukula ehiyo lyawo noku iyutha koompango dhe thigathano ndika.

Okwa ti shika ota shi kumike ewiliko lyuudhano mbuka onkene omukwashilipaleki guudhano okwa nyanyukwa na ota shi vulika ethigathano ndika li ka kale ha li dhanwa omumvo kehe kohi yekwashilipaleko lyOmusati Construction.

Onkene ota indile oongeshefa oonkwawo opo dhi kutheko oshiholelwa dho dhi wayimine Omusati Construction moku kwashilipaleka uudhano mbuka opo omutenge kaa gu laminine po omuntu gumwe awike yo aagundjuka ta ya kuthwa momapandaanda.
Okwa uvaneke kutya ota ya ka kambadhala opo ya gwedhe mo iitopolwa yilwe ngele oya mono oshimaliwa shagwana opo otonamende ndjika yi kale wo yimwe yomootonamende oonene moshilongo.

Okwa ti aamati mbaka oya pumbwa oku pewa oompito dhoku dhana momukokomoko gwomvula oshoka monakuziwa oya kala ashike ha ya dhana uudhano wumwe momumvo na Alex okwa ti shika ina shi gwana oshoka ita shi yape naana ontseyo yoku dhana pamwe muudhano uunene.
Ndhika Alex okwa li edhi popi pethimbo uudhano wa li we ya pehulilo ehuliloshiwike lya yi.

LEAVE A REPLY

Please enter your comment!
Please enter your name here