Omathaneko omatitano geyokomeho NDP 5: Okunkondopeka oshigwana tashi pitile momaudhano

0
21

Omutoolinkundana

Windhoek-Omapangelo muuyuni ohaga longitha omaudhano okufala komeho nenge okukumika ekwatathano lyopankalathano, okukwatela mo aakwashigwana mboka ya li konima meputuko, okukandula po oluhepo nokushonopeka elongitho lyiingangamithi, omiyonena nokuyelutha po owino kombinga yomukithi gwo HIV/AIDS. Okuhumitha komeho oshimpungu shomaudhano otaku kwathele oompumbwe odhindji moshigwana.

Oshikondo shika pethimbo ndika osha gandja iilonga kaantu 15 000. Mbaka oya kwatelamo aawiliki , aadhani, aahambudhi yiizalomwa yomaudhano osho wo aagandji yomayakulo gomaudhano. Omaudhano gomaludhi geli 52 nomalutu gomaudhano gatano moshilongo ogi ikwatelela kepangelo omolwoshimaliwa.

Oshikondo shomaudhano ohashi gwedha ko kekuto lyaaniilonga yaNamibia noperesenda yimwe ayike, naashoka shika hashi gandja komahupilo goshilongo oshishonashona kutya ngaaka itashi ndhindhilikwa nuupu.

Omathaneko omatitano geyokomeho moshilongo oga hala sho ta ku thikwa komumvo 2022, aaNamibia oye na oompito dhili hwepo okukuthombinga momaudhano gopaithano na ishewe omaudhano otaga kala noku eta mo sha momahupilo goshilongo, konyala nooperesenda 2 okuza pooperesenda 0,2 omumvo 2014.

Oku adha ondjodhi yoshigwana tashi dhana pomuthika gwopaithano, okwa taalela omashongo, ngaashi ngoka giipumbiwa yomaudhano inaayi gwana. Yo mbika otayi ngambeke oompito dhaamboka ya hala okudhana osho wo ehumokomeho lyomaudhano moshilongo.

Ompumbwe yiipumbiwa niilongitho yomaudhano onene unene nenge oya londa unene pombanda komahala gokomikunda. Oshikwawo eyokomeho lya nkundipala mokudheula aanawino momaudhano okwa fala mpoka kutya omaudhano ga longekidhwa ihaga eta oshindji momahupilo goshilongo, mokati kaagundjuka osho wo monkalamwenyo yoshigwana , andola ngaashi sha tegelelwaa.

Molwashoka uuwanawa mboka hawu zi muudhano inawu yalulwa onkene, oshimaliwa shoka hashi longithwa okuhumitha komeho omaudhano ohashi kala aluhe oshishona naashika otashi tsikile okukala eshong enene.

Okwaa po kuuyelele wopamapekapeko ge na sha nomaudhano nako oku li eshognoo limwe ndyoka tali nkundipaleke eyambule po lyuudhano. Shika otashi dhigupaleke woo ehumithikomeho, etulo miilonga, nosho wo okutula koshiyeleko kwomaudhano.
Uunkulungu nomithigululwakalo

Ehumokomeho muunkulungu ohali yambapaleke iigwana nomahupilo giilongo, haku gandja oompito dhoku tunga iigwana, eilongo lyonkalamwenyo ayihe, okuholola po iinima iipe, okushita po yilwe, osho wo uunangeshefa. Epungulo muunkulungu niikwamithigululwakalo okwa kalela po oompito dhaana ehulilo moku eta po sha koohandimwe. Omanga uunkulungu niikwamithigululwakalo yili oshitopolwa oshinene pamahupilo, moNamibia shika itashi konekiwa shi li ngaaka, molwashoka omukalo ngoka gu na okulongithwa okufutila uunkulungu ogo omudhigu okutengeneka.

Ngiika oshiholelwa oshiwanawa kombinga ndjika ooshoka sha J.K. Rowling ngoka a eta po ofilima ya Harry Potter mokulongitha oshimaliwa hashi zi moshiketha shepangelo. Yo okino yaHarry Potter, oya ninga onzo onene yiiyemo muuyuni. Konyala aaniilonga yoperesenda , 0.65 dhaamboka ye li miilonga oya kutwa miilonga yi na sha nuunkulungu nenge nommithigululwakalo.

Oshikwawo konyala aalongwa ashike ye li lwo po 60 mboka haya pewa oonzapo omumvo kehe oyo haya pewa oonzapo mokukala yi ilongela uunkulungu yo konyala aailongi 25 ohaya mono omauwanawa giimaliwa yoku ilonga uunkulungu okupitila mo National Arts Council.
Omathaneko gopashigwana geyokomeho oga hala sho taku ka thikwa komumvo 2022 aaNamibia otaya vulu okukutha ombinga muunkulungu wa yooloka na ishewe oshitopolwa shika otashi ka etamo ooperesenda dhiilonga momahupilo.

Ompumbwe yoopolohalama dhuunkulungu osho wo iipumbiwa inaa yi gwana yelongo lyuunkulungu niikwawo yilwe ayihe mbika otayi nkundipike iiyetwa po yuunkulungu nomithigululwakalo momahupilo.

Kakele komaudhano omathaneko omatitano geyokomeho oga thaneka kutya aakwashigwana aaSana, Ovatue, naaTjimba oyo aantu mboka sigo oompaka yeli natango moluhepo olunene okuyeleka noka mwaalu okashona kaamboka ye li hwepo. Konyala ope na aakwashigwana yeli lwopomayovi 21 061 ya kalela po omagumbo goohandimwe yeli 105 300 ooperesenda 90 dhaambaka oya za moshigwana shaaSan. Konyala ooperesenda 55.4 dhaaSan inadhi longwa okulesha nokushanga nenge inadhi pewa elongo lyopambelewa. Operesenda ashike 7.1% odho dha mana oseko yopevi, dho oopresenda 5,5 odho dha mana oprima go omwaalu goperesenda , 3.7%dha manitha oseko yopombanda.Operesenda 0.6% odho dha mona elondo lyokonima yograde 12. Kombinga yiiyemo ooperesneda 50,5 dhomagumbo gaaSan odha ulike kutya odhi ikwatelela kondjambi yokomwedhi ongo onzo onene yuuhupilo.. Okwaana iilonga mokati kaaSan otaku tengenekwa kwa thikama pooperesedna 77 omanga oluhepo mokati kawo olwa thima pooperesenda 68.

Omathaneko go NDP 5 oga hala opo sho taku thikwa komumvo 2022 aantu mbaka ya kala konima yesiga otaya ka kala ya ninga oshitopolwa shomahupilo goshilongo ashihe.

Okwa ndhindhilikwa kutya oonkambadhala okukwatha aantu mbaka oompito odhindji inadhi adha ethikilo lyadho molwashoka ndhika inadhi opala nenge ina dhi opalela mboka ye dhi nuninwa.

Dhimwe odha hulile monkalo yoku egamena kepangelo ethimbo alihe, na ishewe odha topola aantu mbaka okuza kaakwashigwana ooyakwawo noku kala, mbaka ya fa yi ikalekelwa oyo ayeke. Ishewe omahala mpoka aantu mbaka taya adhika oge li unene kokule naakwashigwana oooyakwawo.

LEAVE A REPLY

Please enter your comment!
Please enter your name here