Onghalonawa yovakainhu ya dimbulukiwa modolongo yaLüderitz

0
53

Tuulikki Abraham

LüDERITZ-Efiku longhalonawa yovakainhu, hava longo momandiki ezulonghalo moshilongo, ola dimbulukiwa neudo kovanailonga moLuderitz.
Ovakainhu ovo hava longele mendiki lodolongo yomoLüderitz ova dimbuluka efiku eli mo 30 Auguste neudo, noshiindingili sha li poRecreational Club pendiki lodolongo moshilando osho. Ovakainhu ova li va longekida efiku eli momukalo, oku djala omambale komitwe ve a nduluka po voovene, oo mahapu omuo alongwa moipakete nomeembapila.

Ovakainhu, ovali tava katuka tave lifele, ve udite ounhwa, molwoukwatya wavo, vo ova li tava, monika nawa no va fewa.
Omukainhu keshe a li a kufa ombinga efiku olo, okwa etelela okandjato kopeke, muna oilongifo hai pumbiwa komukainhu keshe.
Eendjato dopeke odo oda ongelwa, naashishe osho shi li meni lado, ndele tadi yandjwa, kovanambelewa vokoshikondo sheameno lovakainhu nounona, nelalakano, eendjato odo di ka yandjwe omaano kovakainhu, ovo tava mono oixuna no ve li momhumbwe.

Omuunganeki wefiku eli Superintended Idalin Simba okwa tumbula kutya, eshi oshi li shimwe sho mo malalakano okudimbuluka efiku longhalonawa yovakainhu, okulongekida omaano mawa, ondjato yopeke muna oipumbiwa yomukainhu, nokui yandja omaano komukainhu wonhumba oo inoo mu shiiva.

Mokudimbuluka efiku eli longhalonawa yovakainhu, ovo hava longele mendiki lodolongo moLüderitz, omwa li mwa shivwa ovakainhu va yooloka, ovo vali tava ndungike ovakainhu vakwao, nokupaafana omayele, a nghene, ovakainhu vena okukala, ngee opauKriste, opanghalafano, nopaundjolowele.

Omupedu Meya waLüderitz, Briggitte Fredricks oye ali omupopi wefiku. Okwa ningwa yoo efiyafano, kutalike omukainhu oo a nduluka embale liwa lidule makwao.

Omufindani wotete, omukainhu oo adjala embale eli nduluka yeemwene, notali monika la wapala nawa, efindano ola pewa Senior Chief Correctional Officer, Paula Nghiwete, monhomola onhivali omuna, Correctional Officer, Anna Haipumbu, nomonhomola onhinhatu omuna Superitendent Teresia Ndeunyema.

Simba okwa tumbula kutya, ovakainhu ovo va findana, omadina avo otaa tumwa kombelewa yakula koWindhoek otaku ka diilila omaano avo omolwa ounghulungu wavo eshi va nduluka omabale okudjala komutwe, taa monika nawa.

LEAVE A REPLY

Please enter your comment!
Please enter your name here