Edhingoloko lyotango lyoBasketball lya enda nawa mOshakati

0
21

Shipi Elago

OSHAKATI-Oosipana dhiitopolwa ya yooloka dhoBasketball odha li dha thigathana po pehalandjandja lyoositola lyaGame mOshakati ehulilo shiwike lya piti okuninga shanamutango methigathano lyuudhano mbuka pomuthika gwopaigwana.

Ethigathano ndika otali dhingoloka niitopolwa ya yooloka yoshilongo okutothamo osipana ndjoka tayi ka kalela po Namibia komathigathano gopaigwana ngoka taga ka kala ko, koBotswana.

Osipana yoshitopolwa shaHangwena oyo ya li ye shi enditha nawa muudhano waalumentu omanga Oshana sha li sha kutha po ehala lyotango muudhano woomeme.

Ethigathano ndika ohali dhanwa kaadhani yatatu kehe mosipana na kehe osipana oya pitikwa ashike yi kale yi na omudhani gumwe mosipana e li kondje, ngoka he ya mo ngele gumwe gwomaadhani yatatu ye li mokapale okwa loloka. Pondo Nailenge omukwatakanithi guudhano mbuka koNooli okwa ti uudhano mbuka owa longekidhwa okupitila mongongahangano yetanga lyoBasketball moshilongo melongelo kumwe nehangano lyoBasketball muuyuni.

Elalakano olyo okutaandelitha ohokwe nontseyo yuudhano mbuka muuyuni unene tuu menenevi Africa ndyoka lya kala konima yesiga ethimbo ele. Okwa ti ethigathano ndika otali tsikile niitopolwa yilwe na otali ka hulila moVenduka moka omusindani dhingi oye taka kalela po Namibia koBotswana. “Oonkambadhala adhihe otadhi ningwa opo onkalo yoBasketball moshilongo yi galulilwe kuuwanawa, oshoka uudhano mbuka owa kala nale tawu liwa oshipungo, shoka sha etitha opo Namibia a ze mo methigathano lyopaigwana pakathimbo, molwa onkalo ndjoka ya kala ta yi inyenge moshilongo,” Pondo ta ti. Okwa ti omathigathano ngaka oga kwatelamo wo uunona wokohi yomimvo13, nomimvo17, mboka tawu kutha ombinga no wa shangithwa nale nolutu talu wilike omaudhano, na kehe uudhano taya dhana ohaya pewa iitsa shi ikwatelela komasindano ngoka ya mono nongele oya gwanitha omimvo 20 ye na iitsa yili pombanda nena otaya vulu oku dhanena oosipana dhilwe oonene muuyuni.

Okwa ti omudhani kehe okuna nale omaukwatya ge, geli kointernet hoka ngele okwa mona esindano nena oha mono iitsa naashika osho nee ha shi longithwa kaadhani pomuthika gwopaigwana okwi tunga po nokutseyika kuuyuni.

Pondo okwa ti iilongo oyindji muAfrika otayi shi enditha nawa unene tuu pomuthika guuyuni a tothamo Angola, Tunisia, Egipiti na Nigeria mbyoka oyo tayi shi, li komutse.

Okwa ti Angola oye natango eli komeho mokudhana uudhano mbuka oshoka okwe wu simaneka na oha dheula aadhani ye na ongushu oyendji yomuyo haya dhana mooliha dha yooloka muuyuni unene tu muAmerica.
Pondo okwa nyanyudhwa keholoke po lyaatali mboka ya li puudhano mbuka okutala. Okwa itaala kutya shika oshe wu ongushu.

LEAVE A REPLY

Please enter your comment!
Please enter your name here