Moshitila Mwa Z’Ondjupa: Okwiilandela omashina gokuhondja

0
31

Eshina lyandje lyokuhondja ndiyaka nda yile nalyo kOwambo onda galuka ko nalyo.
Onkalo yiilonga yomoKernel hayi pata po manga omasiku gaali sigo gatatu, oya pe ndje ethimbo lya gwana nawa nompito ombwanawa yokuhondja iihindjomwa yandje.

Mungame omwa tukuluka ihe ombepo yokwiilandela ishewe eshina etiyali, oshoka ethimbo onda li handi li mono lya gwana sha pitilila.
Konima yokulanda eshina lyandje etiyali, onda kutu po omumati gumwe gwomokomboni, edhina lye Longinus yaAbraham, a kale ta kwathele ndje okutula omalapi kumwe neshina limwe, omanga ngame tandi kondo, konima ngame tandi ya ndi yi manithe. Omalupita nomalupita gooskepa inaadhi helula oohi, osha li ompito yandje ombwanawa, okulonga po shomungunda.

Peshina ndiyaka lyoSinger lyokoonyala onda tokola okugwedhapo omashina gaali gokoompadhi, e tandi kutu nduno aamati aakwetu, Joronimu na Daniel yaSakaria, opo ya kale taa kwathele ndje mokuhondja.

Kapundja wu tondoka noshito, ndele notala owa logelwa oonkwengu. Iinima tayi ihondjitha nduno kungame okati ka lala, nokonima Ombaye ayihe osho ya ka tseya ndje.

Aaniilonga aakwetu mboka twa li hatu longo nayo, kutya nduno otaya ka gonda uukadhona wawo, ongame nda li handi ya hondjele oohulukweya dhiigonda yawo.

Shampa tuu omulumentu a ka gonda omukadhona gwe ohulukweya, omukadhona oha pula ta ti: “Man ohulukweya oya hondjwa peni ndjino?” Oto adha omumati twa longa na ye ta zi, nda dhini okutumbula nando okOndonga ta pukululwa kaandjetu , e ete iinima yomukadhona gwe, nenge yomukulukadhi gwe, nenge yamumwayina ndi yi hondje. Yamwe oya li haa etelele ooyakwawo. Kasha li naanaa oshidhigu okuhondja oohulukweya dhoomeme, nando yo yene kaya li po ya metwe.

Oohulukweya odha li owala hadhi tulwa omakenya moshiya. Omuntu oho hogolola kutya owa hala okuhondjelwa ohulukweya yoometa dhili ngapi. Kombinga yoohema oya li haya hogolola kutya omizalo ngapi ya hala, ashike koohulukweya osha li owala ometa.

Mokushuna kwandje kOwambo oshikando oshitiyali, eshina ndiyaka lyotango oko nde li thiga sho nda galukile kuushimba oshikando oshititatu.Oshinima osha kala nduno shi li ngeyi: Kuushimba onda li ndi na ko omashina gokuhondja gaali, ko kOwambo onda lindi na ko limwe.

Sho tandi yi kOwambo ohandi faalele ko limwe, opo ga ka ninge gaali, ashike ngele tandi galukile kiilonga eshina ndyoka onda li handi galuka ko nalyo.

KOwambo uuna tandi hondjo, onda li handi kwathelwa komusamane Martin gaKweenda, ngoka a li omukuluntusikola posikola pOmpundja pethimbo ndiyaka. Kakele nduno kokuhondja oohema dhoontulo, oompuku niikwawo yilwe, aafuko mba taa fukala oya li ashike haa
kala taa ihakana ndje, opo ndi ya hondjele oofeyi dhawo. Nandi shi hokolole ngeyi natango kutya iilonga yandje yokuhondja, kOwambo nako wo oya li tayi humu nawa lela komeho.

LEAVE A REPLY

Please enter your comment!
Please enter your name here