Nakuluka Namibia a talela po eendo laXe

0
678

Helvy Shaanika

Ongwediva-Namibia osha dja koshitya namib, shili melaka loshiNama, osho otashi ti onhele ikukutu ile hano ina enota. Eli olo edina la pewa oshilongo pefimbo loukoloni shali hashi ufanwa South West Africa. Shakeneka Omuprofessori Mburumba Kerina, omulumenhu oo a luka South West Africa, nokushi luka Namibia. Kerina oo edina laye lopedalo oye William Eric Getzen, okwa yandja edina kuNamibia peedula do1960, omanga ali omunafikola koIndonesia.

Paku hokolola ondjokonona yaye, Kerina ota ti okwa dalelwa moTsumeb modula yo 1932, a dalwa komukulukadi womuhoko wOvaherero wedina Kasondoro Madgalena Getzen naxe Hans Ambandi, omusamane wOmungandjera. Pexulilo lAguste Kerina okwa kufa oweenda opo a ka talele po ombila ya xe komukunda popepi nOkahao, oko a alukila ko konima yeedula 76, eshi xe Ambandi e mweetele ko omanga ye (Kerina) ali ashike ena eedula omugoyi. “Ehambelelo olo nda li nda ningilwa kepata lange lokootate, hano ovamwamemegona, novatekulu vange ola li tali endifa omwenyo neenghono. Tete opa ningwa oandaxa ya ningilwa pombila yatate. Nokonima otwa ka ya keumbo oko nda li nda longekidilwa oitendele. “Ootategonga novamwamemegona ovali va hafa neenghono mokumona nge shaashi vamwe kavali veshishii ngeenge natango ondi na omwenyo. Onda li nda enda omwenyo,” Kerina ta ti. Ta ti nonande koshitukulwa osho shali nale hashi ufanwa Owambo eli xula ko eedula 76 daka pita, natango onghene ta dimbuluka omadina ovanhu vahapu ovo xe Ambandi a li hemu lombwele pefimbo olo ye, ali okamatyona elela. Ta ti mokati kaavo a dimbulula, omusamane Timo Niilenge oo Mburumba ta ti okwe mu lixula nale, efimbo Niilenge a li ha kala koWalvisbay.

Okwa mona ko yoo ovakwapata vamwe ovo navo eli xula nale nale.
Mburumba mokudimbulukwa ondjokonona yaye yokooxe, ota ti, xe Nambandi omukwa Kanime. “Ovanhu nghaashi Abraham Kanime, ovakwetu lela vopopepi, natate edina laye oKanime, ola lundululilwa ashike kuEric Ambandi konima eshi a shashwa.

Onga okaana Kerina okwa tameka ofikola younona moMbaye omo a longwa Oshikwanyama onga elaka lomeumbo. Nomolwaasho oha popi elaka lOshikwanyama nolOtjiherero nonande paife haye ngoo naanaa a pyokoka momalaka aeshe a vali. Mburumba oye omuNamibia wotetetete a dja moshilongo ekeli longa kondje yoshilongo, a li a tumwa kOhamba linene Hosea Kutako opo eke li honge koYunivesiti yaLincoln koAmerica. “Eshi nda dja moshilongo, ondali ngeno ndele li longela oundohotola wopaunamiti. Ashike onda ka pulwa kuJacob Kuhangua opo ndi ningile sha oshilongo shange. Eshi osha eta opo ndi lunduluke ko koundohotola, nokulihongela opolitika,” ta fatulula. Pefimbo olo te li hongo okwa tameka oku nyolela kOiwana Hangano ta pula opo Namibia li mangululwe. Konima yokumana elihongo koLincoln, okwa ya koIndonesia oko eke li longela onghatu youndohotola.

Omanga eli oko, opo a luka Namibia, edina eli kufa kombuwa yaNamib. Paumwene, Kerina okuna ounona vatano, Kandjuu, Kakuna, Mandume oo eli omundohotola wounamiti (Orthopedics Surgeon), Kambandi oo eli oingenia nonghelo Jacky oo opo a mane ofikola koIndonesia. Omukulukadi waKerina wotete Jane, oo eli ina yovanakadona votete vavali, oko natango eli koAmerica, ashike ou kali ta dulu okuuya ko Namibia omolwa ounghundi. Okwali yo a hombola Kurundiro oo a xulifa nale. Mefimbo loukulupe Kerina okwa hombola Naomi, ashike mupya munene Naomi okwa xulifa konima ashike yomwedi eshi va hombola. Omulumenhu ou a yandja edina kuNamibia, oku na ondjodi opo ovaNamibia va tukulule nokushuna komalalakano oo eli a eta etote po longudu Swapo, oyo yali tai lalakanene no ta i kondjele emanguluko ombili nengungumano noufike pamwe.

“Swapo kaya li ina sha noukwamuhoko ile oinima yopaumwene. Swapo oya li ya totelwa oukumwe, nonga oshiwana shaNamibia otwa pumbwa okushuna komakanghameno oo.

LEAVE A REPLY

Please enter your comment!
Please enter your name here