Nally okwi ipyakidhila noalbuma ye ompe

0
12

Shipi Elago

ONGWEDIVA-Omuhikingalo Joseph Simson a tseyika nawa nedhina lyomoongalo, Nally okwi ipyakidhila kaa pu na ezimbuko okutula kumwe iihikomwa yoalbuma ye ndjoka ya tegelelwa yi ka kwelengendje mewangandjo petameko lyaNovomba.

Nally ngoka eli oinginia paithano okwa ti okwi ipyakidhila wo nokavideo kokangalo ye Be Mine, hoka haka kwelengendja nawa moosasiona dhoradio moshilongo na okavideo haka, nako okwa hala ka pitile mo oshita noalbum ye petameko lya Novomba.

“Oongalo onda li nde dhi tameke nale mo 2003 mostudio yi li mOshakati West ndjoka ya li yi shiwike nawa nedhina Junior Citizen moka aahikingalo oyendji, ngaashi The Dogg, Gazza, Pablo nooyakwawo ya li haya kwatithile iihikomwa yawo, pethimbo mpoka ngame onda li ndi na ashike oomvula 13 na onda li nda longo mo okangalo kandje koKwaito konima sho omukwaita gwandje gwumwe a li a ningile ndje omadalama,” Nally ta ti.

Okwa ti okuza mpoka okwa li a kwatwa kohokwe yoongalo nando ka li a tompola oku eta po oalbuma yothaatha ta ti okwa li manga a hala a mane osikola ye opo a tameke oongalo.

Okwa ti okangalo hoka ke li mewangandjo ngashingeyi okwe ka hikila aakadhona unene mboka ya adha ondondo yontumba monkalamwenyo ano ye li kuyoyene paliko.

Ta ti otaka kumike wo mboka ye li moosikola opo ya longe yi itula mo opo nayo, esiku limwe ya ka kale ye li kuyoyene na otaya vulu okulonga sha kuyoyene.

Kombinga yongeshefa yokuninga oongalo moNamibia, Nally oku uvite kutya aahikingalo mboka opo ta ye ya mowela otaya dhengelwa ketenga, oshoka oompito kehe hadhi ya po ohadhi pewa ashike aahikingalo aakulu omanga mboka aape haya liwa okapondamusita.
Okwa ti nando aahikingalo aape otaya dhengelwa keholo molwashoka kaye shiwike, ina ya pumbwa okutula omutse kepepe, ashike na ya longe nuudhiginini opo ye etepo iihikomwa tayi hokitha moshigwana, na oyi shi okupulakenwa.

Nally ngashingeyi okwi ipyakidhila mostudio ye yomegumbo moka ta ti oku li kuyemwene na ota longo nuudhiginini opo oalbum ye yi kale momalandithilo muNovomba nuumvo.

LEAVE A REPLY

Please enter your comment!
Please enter your name here