Ombelewa yaKansela oyo yaninga onaasareta yaamboka taya lumbu nombuto yoHIV

0
349

Alvine Kapitako

OMUNTELE-Konyala aantu 800 taya lumbu nombuto yoHIV ohaya pewa omiti dhokulelepeka onkalamwenyo moshikandjohogololo Omuntele moshitopolwa Oshikoto.

Oyendji yomwaambaka oyo aanona.
Nokonima , yomumvo gumwe, mboka taya lumbu nombuto yoHIV mOmuntele oya li ya faula okulongitha omiti dhawo, ndhika naafauli omwaalu gwawo ogwa li guli pombanda.

Okufaula inaku ya molwashoka osho ya hala ihe oyendji yomuyo ka ya li ye na oshimaliwa oku enda konyala oshinano shookilometa 40 opo ya ka tale omiti dhawo kendiki ndyoka hali topola omiti ndhoka.
Oondjila oombwinayi okuya kOmuntele inadhi pupaleka wo onkalo ndjika unene kwaamboka ye na iiyenditho yawo yene okuya, ya ka tale omiti.

Onkene, oyendji oya tindi okukwatha mboka taya ka konga uunamiti woHIV pondje yOmuntele, molwashoka oya tila kutya omahauto gawo otaga yonuka kongwandjungwandju yondjila yokuza nokuya kOmuntele.

“Omwaalu gwaa mboka ya faula okunwa omiti dhawo ogwa li omunene noonkondo. Noshinima shika oshetu pwatula omitse, kutya mbaka otatu ya kwatha ngiini,” Omundohotola Johnface Mdala gwomOnandjokwe osho a lombwele aatoolinkundana mboka ya talele po ombelewa yoshikandjohogololo Omuntele omasiku ngaka.

Aaniilonga moshipangelo shaNandjokwe oya li ye na okukonga po ondunge nkene taya fala omayakulo kwaamboka ye na ombuto ndjoka kOmuntele.

“Otwa kala hatu ya huka lumwe momwedhi oku eta omiti okuza momumvo 2009 nomwaalu gwaamboka taya lumbu noHIV mOmuntele, otwa kumwa okumona kutya oguli pombanda molwashoka oshikandjo shika oshi li kokule nOnandjokwe,” osho Mdala ati.

Oshali tashi etitha omaipulo unene tuu sho oyendji yomaayakulwa oyo aanona. Ishewe oshali tashi nikitha oluhodhi okundhindhilika kutya oyendji yomwaamboka yali ya faula okunwa omiiti dhawo oyo aanona osho Mdala, a ti, noku ulika kutya mbaka oya li yi inekela aakuluntu opo ye ke ya talele omiti dhawo.

Omolwonkalo ndjika yokufaula, oyendji yomaanona mbaka oya li ye na okutulwa kepango lyomiti dho ARV dhi na oonkondo okuyeleka naandhoka hadhi gandjwa tango,” Mdala a ti.

Pethimbo ndyoka okapangelo kaMuntele okali okashona unene omo mu yakulilwe aavu mboka taya lumbu nombuto, unene tuu sho omwaalu gwawo gwali omunene noonkondo, Mdala a hokolola.

Onkene aayakuli , mboka ya za kOnandjokwe oya li ye na okulongitha osaala yopOmuntele oku gandja omayakulo ngoka kaantu.
Petameko oya li ya longitha osaala ndjoka lumwe momwedhi oku adha mboka taya lumbu noHIV.
Omwaalu gwaantu mbaka ogwa ka tameka tagu indjipala pethimbo ndyoka.

“Otwa tameke ihe hatu ya huka iiwike iyali kehe nomwaalu gwaantu ogwa li gu na okutopolwa moongundu mbali molwashoka aantu oyendji naaniilonga oya li ya thiminikwa okulonga sigo okonyala pomulongo gwokongulohi,” Mdala a ti.

Omikweyo odha li omile kutya ngaaka, aayakuli naayakulwa oya kala ayehe yu uvite nayi, osho a gwedha ko.
Omumvo 2014, “Tse otwa pula kansela opo eye kOnandjokwe. Okwa li a gumwa kehiyo lyetu, natse otwali tu uvite twa yambidhidhwa.Ehala nomwaalu gwaayakuli ogo nee gwa li eshongo kutse,” Mdala a ti.

Kansela gwaMuntele, Sacky Nangula ngoka a li ena uunongo nontseyo kombinga yonkalo yaayakulwa ye mbaka, oyendji okwa li a gandja oshitopolwa shombelewa ye shi longithwe ongo okapangelo kokuyakula mboka yena ombuto ndjika.

Nangula okwa gandja oshitopolwa shimwe shombelewa ye shi longithwe molwashoka oshali shi na ehala lya gwanena aayakulwa oyendji.
“Omolwa ompumbwe yehala mokaklinika ketu , tse otwa zimine pamwe naanambelewa yokOnandjokwe kutya otandi vulu oku edhilila aayakuli mbaka. Oshigwana oshali sha nyanyukwa moshinima shika,” Nangula a fatulula.

Konyala uule womvula ayihe, oshitopolwa shombelewa ye osha kala tashi longithwa ongo okapangelo ko kugandja omiti dhoART. Shika oshali sha tameke muSeptemba omumvo gwayi sigo omuMai nuumvo, sho pwa etwa okapangelo haka, tembudhwa ka landwa nekwathelo lyepangelo lyaU.S.A.

“Ompito sho ya eguluka yokapangelo haka yambulwa po, otwa dhiladhila kutya Omuntele ogo gwa pumbwa ekwatho tango okutungilwa okapangelo katya ngaaka. Oya li ya pumbwa ehala na ishewe oya li ya pumbwa aayakuli. Aapangi yaali oya gwedhwa po pokaklinika kaMuntele, noshilonga shawo oshali ashike okugandja omayakulo ge na sha noHIV,” Mdala ati.

Okwa ti shika osha ningwa okukwatha okapangelo kaMuntele ka ye pomuthika gwokugandja omayakulo ga gwana po.
Omupopiliko gwoEmbassy ya America moNambia, Eric Atkins okwa ti oku adha omayakulo ngaka popepi naampoka aayakulwa yeli ohashi hupitha ethimbo niimaliwa yawo, na ohashi kwatha ishewe kutya aayakulwa otaya mono omayakulo guundjolowele naashika otashi hwepopeke ongushu yonkalamwenyo yawo. “Ngele osha talelwa momeho gaayakuli nena shika otashi kutha ko omutenge gumwe komapepe goshipangelo shomodistrika noku hwepopeka omuthika gwomayakulo haga gandjwa petameko,” Atkins a ti.

Mokuninga ngaaka, aagandji yomayakulo guundjolowele otaya kala ya tala miilonga yokugandja omayakulo kwaamboka taya ehama no ya pumbwa eyakulo unene lyoondohotola nenge lyaapangi, osho ati.

Okwa koneke kutya, eshongo limwe lili po oondyoka lyehala mokapangelo inaali gwana noshikwawo, ompumbwe yomagumbo gaayakuli, osho wo ehala lya nuninwa okugandjelwa omayakulo gontumba ndyoka ihaali kala po aluhe.

Oshiketha shomuperesidente gwAmerika hashi ithanwa U.S President’s Emergency Plan for AIDS Relief (PEPFAR) okupitila mEndiki lyokukondolola nokuyanda Omavu nenge[Center for Disease Control and Prevention (CDC) osho wo United States Agency for International Development (USAID) oyo haya kwatha Oshikondo shUundjolowele nOnkalonawa okushi pa omahala guupangelo. Oshikandjohogololo Omuntele oshina aakalimo 21 884.

LEAVE A REPLY

Please enter your comment!
Please enter your name here