Omupevi-Peresidente otaka lya oshipe koo Iilonga

0
229

Loide Jason

ONGWEDIVA-Aakali mo yomoshitopolwa shaMusati otaya ka waiminwa kOmupevi-Presidende Omundohotola Nickey Iyambo mokuka tyapula oshituthi shoshipe moshitopolwa shoka ngula.

Oshituthi shika osha longekidhwa okupandula omolwa iipalutha oyindji mbyoka aakwashigwana ya mono, sho ya longo nawa omapya gawo.
Oyendji oya longo nuudhiginini sha landula ekumiko ndyoka yo ya li ya mono okuza kOmuperesidente goshilongo, Hage Geingob kohi yopolohalama yedhina Tulongeni.

Petameko lyomumvo nguka Omuperesidente Hage Geingob, okwi ile pOnamundidi moshikandjohogololo Ogongo pegumbo lyaMateus Iilonga mpoka a kwathele mokupulula, ongo endhindhiliko lyokukumika oshigwana opo shi longe nuudhiginini shi imonene iipalutha oshoka omuloka gwonuumvo ogwali omwanawa.

Oshituthi shika osha tegelelwa oku ka kala ko Olyomakaya ndjika paandja Iilonga mpoka pwali pwa ningilwa tulilwa miilonga opolohalama yaTulongeni nuumvo. Oshituthi otashi ka popithwa kOmupevi Presitende Iyambo ngoka oye taka kala omupopi gwesiku a simana.

Eindilo lyaGeingob koshigwana shi longe nawa olya taambwako nawa, na kansela gwoshikandjohogololo shoka Welhelm Iyambo okwe shi koleke a ti oshigwana osha mona iipalutha ya gwana nuumvo unene nga sho Omutse gwoshigwana oye a kutha onkatu okushi kwatela komeho.
‘ Pethimbo lyiilonga opwa li pwa longithwa omashina gopashinanena shoka tashi ulike kutya ngele aantu ya longitha iilongitho iipe nena eteyo otali kala ehwepo li vulithe okulongitha omikalo omikulu,” osho kansela Iyambo ati.

Iyambo okwa ti oshituthi shika sho shipe ohashi ningwa nonale, sha kala hashi longekidhwa megumbo, puushiinda nenge pomukunda.
Ihe nuumvo yo oya tokola ya longekidhe oshipe shopashitopolwa, oshoka omo ngaa moshitopolwa moka mwali mwa ningilwa Tulongeni.
Okwa ti konalenale oshipe ohashi ningwa aantu taya eta iilya molata nosho wo iikulya niikunwa yopamuthigululwakalo opo yiliwe sho aantu taya hambelele sho ya mona iipalutha ya gwana “ Pethimbo lyoshipe omukuluntu oha kutha oonkanko ne yimwe ta umbile kuuninginino, kuuzilo, kuumbangalantu nokuumbugantu tati ‘aathithi taambeni’,”osho kansela a fatulula pauhupi ngaaka.
Iyambo okwa ti kombinga yiikunwa oshitenga shotango shomalovu ohashi pindwa tashi tikile pevi ko otaku popiwa kutya aasi nane taambeni .

Okwa ti aakwashigwana nuumvo natango otaya eta kehe egumbo olata yiilya mbyoka tayi ka falwa keshisha koTsandi opo yi ka kwathele mboka taya ka adhika yeli mompumbwe yiikulya. Iyambo okwa ti oshituthi oshaakalimo moshilongo ashihe naayehe oya tegelewa okukala ya holoka opo ye ye ya tyapule eloolo noku Hambelela Kalunga sho a gandja omuloka guli nawa.

LEAVE A REPLY

Please enter your comment!
Please enter your name here