Omusati ogwi ilongekidhila nawa uudhano wookansela

0
65

Loide Jason

OUTAPI-Ngoloneya gwoshitopolwa shaMusati okwa indile aaniilonga yomombelewa yoshitopolwa ya longele kumwe, noku ihumbata nawa sho taya ka kutha ombinga muudhano wiitopolwa wokomumvo nuumvo.

Erginus Endjala okwa popi ndhika omanga a li ta gandja omatanga kongundu yaadhani mbaka petameko lyomwedhi nguka, mOutapi. Endjala okwa ti aantu mboka taya ka kutha ombinga naya kale ye na oshimpwiyu okutseya kutya yo oya kalela po Omusati na oyo oshipala shoshitopolwa shika pethimbo lyuudhano mboka.

Uudhano waanambelewa yomalelo giitopolwa wonuumvo owo uutiyali wa landula mboka wotango wa li dhanenwe omumvo gwa ziko moWindhoek. Nuumvo mbuka otawa ka dhanenwa moKatima Mulilo moshitopolwa shaZambezi.

Omusati ogwa dheula aadhani omulongo na 14 moka muna aakiintu yatano. Ashike Endjala okwa kumike aadhani mboka ya tseye kutya otaya kuthombinga muudhano opo ya sindane ndele haku kutha ashike ombinga shaashi ashike ye na oku kutha ombinga. “Onkee oshoka omwa humbata edhina lyoshitopolwa shika, ihumbateni momikalo ngoka tagu ulike oshipala oshiwanawa sho shitopolwa nosho wo uukumwe washo,” osho eya kumagidha ngaaka.

Ngoloneya okwe ya dhimbulutha kutya uukumwe mboka ta popi okwa hala wu kale po aluhe ndele inawu hulila pehulilo lyuudhano mboka. Ookansela ayehe moshitopolwa moka 12 oya tegelelwa ya ye kuudhano mbuka taya kwatelwa komeho kungololeya oye tuu ngoka.

Omukuluntu gwongundu ndjoka tayi kadhana, Modestus Senalye okwa ti kutya ongundu ye oyi idheula nawa nokuna omukumo kutya oshitopolwa she otashi ka sindana. Okwa ti wo kutya no nande oshitopolwa shika kashina naanaa ontseyo kutya ombepo yuudhano woludhi ndoka ohayi kala ngiini oshoka inaya kutha ombinga omumvo gwa zako, okwa inekela kutya ongundu ye otayi ka ninga nawa.
“ Einekelo ndyoka ndina mongundu yandje olya kola na, ondi shishi kutya otaya ka longa nawa noonkondo, kutya omomikalo nenge omombepo yuudhano,” osho Senalye a ti ngaaka.

Uudhano woludhi nduka owa tegelelelwa oku kala wuli moshitopolwa kehe miitopolwa 14 yaNamibia.
Ihe mbaka ngashingeyi kaye shi kutya oshitopolwa shoka tashi ka kala shina uudhano mbuka omumvo tagu ya oshini, oshoka shika otashi ka tokolwa konima yuudhano . Aakuthimbinga oya tegelelwa oku ka sindana omakopi nosho wo iimaliwa koomuma koongundu dhoka tadhi ka longa nawa. Uudhano mbuka owa tegelelwa oku kakala ko momasiku 11 sigo 15 Septemba nuumvo.

LEAVE A REPLY

Please enter your comment!
Please enter your name here