Ongundu Paradox ya galuka noongalo oompe

0
16

Pinehas Nakaziko

WINDHOEK-Ongundu yaasindani yomakopi ngele tashiya moongalo dhomoshilongo yedhina Paradox, noyo dhingi ngele tashiya moku imba oongalo dho hip-hop, osho ya tseyitha egaluko lyawo mehangano lyoongalo, sho ya ningi okathimbo yamwena po.
Ongundu ndjika inayi galuka ashike nomaimbilo gawo omape, ndele oya etelela oshindji, mwakwatelwa oongalo ndhoka tadhi nyanyudha notadhi tungu, nomuityo gwoongalo dhawo omupe.

 Ongundu ndjika oya holola po ishewe o albuma yawo ontintano yi na omaimbilo taga hokitha yedhina ‘The Known, Unknown 11’.
“Oyendji oya kala ya limbililwa sho twa luku oalbuma yetu edhina ndika, ashike olya hala owala okutya tse otushishi nale kutya katushi shoka shi li monakuyiwa,” Peter Karon, gumwe gwomaaimbi yongundu ndjika ta fatulula ngaaka.

 Okwa gwedha po tati oalbuma ndjika oyi na oongalo dhapama nawa oshoka oya longa naa imbi ngaashi Skrypt, Ray, Jeff AD, Odie the Poet, C Star naTweezy, okugandja omulyo omupe koongalo dhawo.

 Aaimbi mbaka oya hokolola oalbuma yawo oyo yimwe ya ningwa nethimbo nonuukeka, no ya kwatela mo okupulakenwa kepipi alihe.
  “Ngashingeyi otuli atuhe twa koka nuunongo wetu woku ninga omayimbilo owuli pamuthika gwopombanda, naashika otashi imonikila kukehe ngoka ta pulakene omaimbilo getu.”  Moalbuma otamu adhika oongalo ngaashi TKU I1, yi na omulyo gwoHip-hop noyili oyo yimwe dhingi tayi vulu oku uvitha aapulakeni nawa. Otamnu adhika ishewe oongalo ngaashi Jive Zaak, Spiral na 3AM, ndhoka itaadhi ka thiga omuntu a kuutumba.

 Paradox ongundu ndjoka ya tholomwa po momumvo2008 kuPeter Karon naOlavi Ekandjo nelalakano lyoku humitha komeho oongalo dho Hip-hop moshilongo.

 Aaimbi mbaka yaali oyali yu uvathana manga ye na oomvula 15 opo ya longele kumwe, noongalo dhawo odha li tadhi dhana onkandangala, unene kooradio dhomoshilongo, no dha kala shili momathigathano ga yoolokathana.

 Ongundu ndjika oya kala yi holike unene okuza mo2012, nongalo yawo yedhina Baby moka taya kwathelwa kuDesmond ya li yasindana ekopo onga oyo ongalo dhingi moongalo adhihe dhoHip-Hop moshilongo.

 Omvula oyo tuu ndjoka ongundu ndjika oyali yasindana ekopi onga oyo ongundu dhingi hayi imbi pamwe, no yi na elandulathano, methigathano olyo tuu ndyoka.

 Oya kala ishewe nokunyanyudha noku ulika uunongo wayo pamwe naahikingalo aanene ngaashi Jericho, AliThatDude, K.K naDesmond okutumbula po ashike yamwe.

 Paradox oyali ishewe ya sindana ekopi pondje yoshilongo onga aahikingalo dhingi moSouthern Africa methigathano lyo “Hype Magazine” mo2012.  mo2015, oyali yasindana omakopi gatatu onga oyo aahikingalo dhingi yena omikalo, aahikingalo mboka yeshiwike nawa, nekopi ndyoka lyongalo yawo dhingi yedhina Chasing.

LEAVE A REPLY

Please enter your comment!
Please enter your name here