Onkalamwenyo yomulongwa pIihenda ya pupalekwa

0
538

Maria Namupala

OSHITAYI-Onkalamwenyo yomulongwa posikola Iihenda momudhingoloko gwOshitayi, oya pupalekwa, sho a pewa okatemba hoka a kala a pumbwa opo a vule okukala tayi kenongelo nuupu.

Seline Antonio 15 omulongwa mondondo onti-9 posikola mpoka okwa valwa nuulema ihe nando ongaaka Omukuluntuskola penongelo ndyoka Simasiku Simwanza okwa ti nguka oye gumwe gomaalongwa haya ilongo nawa.

Antonio okwa holola kutya okwa valwa nuulema mboka kee shi kutya ote wu hokolola ngiini naaluhe oha ende nokatemba nenge ta kookaya, ashike okwa ti kashishi oshipu. Omulongwa nguka oshiwike sha piti okwali a pewa omagano gokatemba hoka a kala a pumbwa. Omagano ngaka okwe ga pewa okuza koshiketha shOhorongo Otavi Community Trust Fund shono tashi fupipikwa (OOCT), mekwatelo komeho lyehangano lyOhorongo Cement.

Omunambelewa gwiipambele yoshigwana nomakwatathano mehangano lyOhorongo Esther Mbathera okwa koleke ndhika oshiwike sha yi, ati natango onkene taya tsikile nokugandja omakwatho nomayambidhidho kwaamboka yeli mompumbwe. Mbathera ta ti otaya longo ngaashi taya vulu okuyambidhidha mboka ya pumbwa omayambidhidho nomakwatho ga kwalukehe. Okwa ti shika osho shimwe shomiilalakanenwa yawo okukwashilipaleka kutya aanaskola mboka yeli monkalo tayi nyengathana oya pewa omayambidhidho ya vule ku tsikila neilongo lyawo oshoka oyo aaleli noongudhi dhoshilongo. Okatemba hoka oka pula ooN$5 200, mbyono ati oya zi moshiketha shawo, “Omasiku ga zi ko otwali twa egulula endiki lyokulanditha oosamende mondoolopa yOndangwa, shono tashi adhika poshitaasi sheshina lyokulutenda, omolwonkalo ndjika yamwe yomaaniilonga yetu oya kala haya tsakaneke omulongwa ngoka eli kokatemba ka kulupa, ta falwa kosikola ku yina nenge kaamwayina,” Mbathera ati.

Aanambelewa mekwatelokomeho lyaKansela goshikandjohogololo shoka Elia Irimari oya tseyithile ehangano ndyoka, nolya yamukula mbala. Antonio nonande a kala nale ena okatemba okaadhika ka kulupa unene, noshali she mu dhigupalela unene.

Mbathera okwa endulula kutya Ohorongo Cement melongelokumwe nOhorongo Otavi Community Trust oyi ilongekidha okugandja omakwatho nomayambidhidho moshigwana, ta ya tala unene koshikondo shelongo nuundjolowele mbyoka oyo ya pumbwa omayakulo nomakwatho gomeendelelo.

Aalongi oshowo aalongwa posikola mpoka mwa kwatelwa iilyo yetonatelo nongelo oyali ya gongala nokutaambako okatemba hoka, yo taya pandula ehangano ndyoka lya gandja omagano ngoka.

Oshilyo shelelo nongelo posikola mpoka Tomas Moongo okwa pandula ehangano sho inaali ndalapatela shoka li na, ashike olye shi longitha muuwanawa waanona, nolya mono kutya otali gandja okuza mushoka lya likola.

“Aaholike sho mwa longo mpaka osha kwathela unene notwa pandula sho mwa mono kutya nani okugandja okuna elago unene komeho gokutaamba, Kalunga na yambeke mpoka mwa kutha nomulongwa gwetu ota vulu okutsikila nelongo lye sho mwa pupaleke onkalamwenyo ye,” Moongo ta ti ngaaka nenyanyu.

LEAVE A REPLY

Please enter your comment!
Please enter your name here