Tala oofilima itoo futu sha poGoethe-Institute

0
8

Omutoolinkundana

WINDHOEK-Oshigwana otashi hiywa okukatala oofilima ntano dha thanekwa komushangi nomunduluki gwookino Fatih Akin. Ndhika otadhi ulikwa poGoethe-Institut Namibia okutameka Etine lyomasiku 21 Septemba sigo Olyomakaya yomasiku 23 Septemba. Okuya mo posheelo ita pa futwa sha nongaashi, shito aayenda otaya ka pewa opopkorn.

Fatih Akin oye gumwe gwaawiliki yookino moNdowishi noshowo omushangi gwoofilima ha ningi oofilima dhi na sha nomatembu netsakaneno lyoohedhi. Oofilima dhe ohadhi ulike ekondjo mokuninga oshitopolwa moshilongo oshipe osho wo oku imona kutya ngoye omukwashike. Avalwa nokuputudhilwa moHamburg, moNdowishi ena ombinzi yaaTurkish, Akin okwa simana molwiilonga ye, ya ulike nkene onkalo ya dhigupala ndele ote shi ulike momuhingo tagu yolitha.

A valwa omumvo 1973, Akin okwe shi koneke kutya okuna ohokwe mokuninga oofilima omanga a li omumati omugundjuka na okwa li nale ha kutha ombinga miinyandwa pethimbo eli mosikola. Ohokwe ye ndjika oye mu fala sigo a mana ootundi muunongo womakwatathano menongelo lyopombanda hali ithanwa Hochschule für bildende Künste moHamburg nokwa ningi omuwiliki gwo “In the Fade” (Aus dem Nichts), uupitilo waNdowishi wotango okuya methigathano eti 90th Academy Awards (Oscars) mofilima ya ningwa melaka ekwiilongo.

Ofilima yotango okudhana moWindhoek oyo “Head On”, ndjika oyo ishewe yotango yAkin ye mu sindanitha shoka hashi ithanwa Golden Bear piiyithanene yoofilima ngaashi Berlin Film Festival, Best Film and Audience Award at European Film Awards momumvo 2004. Oshidhano shika otashi ulike ondjokana ye ningile mo pokati ka Cahit na Sibel, aadhani yaali yuukwatya woonkondo mboka ya tsakanene mosaala yaamboka ye na eshongo pamadhiladhilo moshipangelo. Etitano 22 Septemba ehokololo “Soul Kitchen” ndyoka lyuudha omaiyuvo osho wo iiponga nesindano oyo tayi ka ulikwa. Ndjika oya sindana epole piithanene yoku gandja omapole haga ithanwa Venice International Film Festival omumvo 2009.

Ofilima “The Edge of Heaven”otayi ulikwa wo metitano lyomasiku potundi 21:00 tayi ulike ekwatathano lyoonkalamwenyo odhindji, ndjika oya sindana omapole ogendji piituthi ngaashi Cannes Film Festival, LUX Prize for European Cinema by European Parliament and Best Director at Golden Orange Film Festival momumvo 2005.

Olyomakaya okuna ofilima yehokololo kohi yoshipalanyolo “Goodbye Berlin” tayi hokolola aagundjuka yaali yeli mepipi lyomimvo omulongo ya zi moBerlin nokuya komikunda moNdowishi yokuuzilo.Omauliko otaga hulu nofilima hayi ithanwa “The Cut” otayi hokolola omuhambudhi omuArmenian ngoka a li molukongo lwefamilia lye konima yiita yotango yuuyuni.

LEAVE A REPLY

Please enter your comment!
Please enter your name here