Taylor Jaye te shi enditha nawa moNigeria

0
35

Pinehas Nakaziko

WINDHOEK-Omuimbi omuNamibia ngoka a tembukila ngashingeyi koSouth Africa a tseyika nawa nedhina Taylor Jaye, okwi ipyakidhila nokutunga po edhina lye, nokutaandelitha oongalo dhoshiNamibia muAfrika.

Nehangano lye mwene lyoongalo lyedhina Jaye’s World Entertainment, Taylor Jaye ngoka ha imbi oongalo  dhoHip-hop noRnB, a tseyika koyendji sho ali a pititha ongalo ye yotango yedhina African Kings mo 2015, oku li moNigeria, uule woshiwike ngashingeyi, moka ta taandelitha oongalo dhe moLagos, Abuja naAsaba.

Elalakano lyokutalela po moNigeria okutseyitha ongalo ye ompe yedhina “!Kho te re” moka a kwathelwa oku imba kongundu yaaSouth Africa ndjoka hayi imbi oongalo dhoHouse yedhina Uhuru naDj Clap.

Taylor Jaye okwa ti elalakano ekwawo lyetalelopo lye okutseyitha oongalo adhihe dhaNamibia, noku ulika kutya Namibia okuna oshitalenti ngele tashiya moku imba.

 “Nigeria osho oshilongo shoka hashi ningi oongalo dha dhenga mbanda muAfrika, nondali ndi wete sha simana kungame onga omuhikingalo opo ndi kale nda tseyitha oongalo dhoshilongo shetu  pamuthika gwopombanda, tse tu mone ompito ombwaanawa okulongela pamwe naahiki yopondje yoshilongo ngaashi moNigeria,” Taylor Jaye ta ti ngaaka.

Okwa gwedha po ta ti okwi ipyakidhila noku ninga oonkundathana nooradio dhaNigeria, pamwe nooTV dhomoshilongo omo tuu moka.
 “Ngashingeyi onda ninga oointerview mbali oonene moLagos noradio yoBeat 99.9 Fm.
Oonkundathana ndhika odha li tadhi popi kombinga yandje onga Taylor Jaye omuhikingalo omuNamibia, nokudhana okangalo kandje lwotango koradio yawo.”

Taylor Jaye okwa li ishewe a kundathana noradio yoHot 96.5 Fm yomoshilando shaAsaba, kombinga ya nkene teshi enditha ongomuhikingalo omuNamibia.  

Nonando oradio ndjika oya kala nokudhana okangalo ke, elalakano olyali okutseyitha omuhikingalo oye tuu nguka ponkantu yaa imbi dhingi mUuninginino wAfrica.

Omuhikingalo nguka okwa kala wo noku monika koTv dhomoNigeria, mwakwatelwa Ikeji Television.
Okupopya kombinga yolweendo lwe , Taylor Jaye okwa ti nonando iilonga oya kala oyindji ngaaka, ota iyuvitha nawa, niinima ayihe otayi ende nawa, nokwa li ishewe a mono ompito ombwaanawa yokuholoka petseyitho lyoHub Entertainment ndyoka hali ningi uufelema wa Nigeria.

Ngaashingeyi ota ningi omauvathano naahikingingalo oyendji aaNigeria, nokwati ota kambadhala opo a longe nayo monakuyiwa.
 “Ondiwete kutya oongalo dhandje odha thika ponkatu yopombanda, oshoka ongame omuhikingalo gwotango okuza moNamibia nda talela po Nigeria nelalakano okutseyitha oongalo dhandje,” Taylor Jaye ta ti ngaaka.

LEAVE A REPLY

Please enter your comment!
Please enter your name here