Ya uvu uuthigwa molweso lyaMan of Action

0
768

Shipi Elago

Okahao-Konima sho onkundana yokuhula po kwaMan of Action ya li ya ihanene ewangandjo ehuliloshiwike lya yi, epandja lyoSocial Network lyaadhani aakulu yomOkahao olya li lyi ipyakidhila, nomatumwalaka gomahekeleko. Edward ‘Man of Action’ Wilbard okwa hulitha Olyomakaya ga zi ko konima yuuwehame. Oyendji yomaadhani mbaka oya li ya dhana mosipana yoCalifonia FC ndjoka ya li ya totwa kunakusa, Wilbard lwopomimvo dho 1992 na yamwe oye yi joina lwo po mimvo dho 1995.

Osipana ndjoka ya li ya ningi yimwe yomoosipana dhingi moshitopolwa shaMusati oya li ya kongo iitalenti oyindji na oya li ashike komapepe ganakusa ngoka a li tseyika nawa nedhina Man of Action. Nakusa Wilbard ngoka ali a tseyika ishewe nedhi lyosipana ye, Califonia, okwa li a longitha oonzo dhe mwene okufala osipana ye komaudhano noku yi landela iikulya noku yi pa wo omulalo.
Paulus Shingenge okwa ti Man of Action “okwa li a fa tate gwetu momaudhano, okwa li etu longo oshindji, ongele okomaudhano nenge omonkalathano nehumokomeho.”

Osipana yoCalifornia oya li ya totwa unene kuumatyona uugundjuka lela mboka wa za momudhingoloko gwaKahao, oshoka ka li naanaa a hala aanasikola yomoosekundosikola mbali Shaanika Nashilongo nEtalaleko oshoka mbaka ngele oya mana osikola oya li haya shuna kiitopolwa yawo naashika Man of Action okwa li eshi tila oshoka ka sha li shi na mpo tashi fala osipana muule wethimbo ele.
Shingenge, ngoka a tseyika nawa nedhina Kandeya, okwa li a holola nkene Man of Action a li he ya kutha noku ya fala kOshakati opo anuwa ya katale nkene oosipana oonene hadhi dhana yo ya kutheko oshiholelwa. Kandeya oku uvite kutya iilonga mbyoka Man of Action a longa oya gwana onke omwenyo gwe nagu vululukwe nombili.

Kankondi Sakaria Umufudise ngoka adhanene osipana yo California okuza 1996 sigo 1998, okwa ti omusamane Edward Wilbard “Man of Action “okwa li etu pe ondjila ombwaanawa momaudhano, okwa li oye mwene gwoKalaba ye, oye wo a li omudheuli gwayo.”
“Okwa li eshi oku tu kumika nongele pokafudhe po otwa ya po tu li konima nokoola ohe tu lombwele owala ta ti moshiingilisa ‘Ladie`s First [oomeme komeho]’ ne indeni ike mu ka tule mo ookoola oshoka aakadhona oyo ha ya piti komeho tango,” osho Umufundise ati. “Man of Action okwa li wo etu longo omaudhano goBokisa pethimbo nda li moseko yEtalaleko okwa li shili a fa tate gwetu omutiyali, omwenyo gwe na guvululukwe nombili,” Umufundise agwedhapo.

Alexander Anguuo “Dr Manguuo” okwati “Omusamane Man of Action otwa kala naye ethimbo ele. Okwe tu longa omikalo dhoku dhana etanga, ngaye onda kala handi tula mo ookoola kaa kuna we onkene okwa li a pendje edhina Dr Manguuo oshoka okwa li ndi shi okundokotola etanga, osipana yetu oya li California FC ashike ye mwene okwa li he tu ithana Eenkoshi, shampa tatu sindana noku li esiku ndyoka oha kala e li kondje ti igidha Eenkoshi! Eenkoshi, Ookafute kaNeganga mboo osho kwa li he tu tanga ngaaka, ondiwete kutya osha gwana omwenyo gwe nagu vululukwe nombili muukwaaluhe.”

Kundana okwa li wo a yi moonkundana na kuume kopothingo ka Man of Action tate Joe Archer ngoka pethimbo ndyoka a li mela lyondjila opo a ka wayimine aalilisa moVenduka moka omo muna omutumba, ngoka ka li ena iitya oyindji ashike okwa li a holola kutya Man of Action okwa li oye gwotango oku eta omaudhano goBokisa koNooli na okwa li wo omuBokisi omwaanawa Joe Archer tati niitya iihupi ye ta tsikile nondjila ye a ka thike koVenduka.

Man of Action okwa li ena shili olukeno nohokwe yomaudhano oshoka kakele kokatanga kokoomapdhi okwa li wo a toto po ethigathano lyuumbasikela mOkahao nosho wo ethigathano lyooGwamululu pethimbo ndiyaka.

Osipana ye yoCalifornia oya li ya gumo moliha mo 1999 moliha yoSecond Division yaMusati na ina yi shuna mo we sigo okeluwa ndika.
Edward Wilbard oye he yomuhiki ngalo e shiwike moNamibia Oteya.

Okwa longekidha oshituthidhimbuloko she shotango shikakale pegumbo lye moWindhoek mEtitano, noshitiyali otashi ka kala pongeleka yaMacedonia moWindhoek, omanga efumbiko tali ka ningwa moSoondaha pOmayendo Omakulu.
Kundana ota halele egumbo lye oonkondo oompe sho ta ya ilongekidhile onkalamwenyo ompe pwaana we Man of Action.

LEAVE A REPLY

Please enter your comment!
Please enter your name here