Yamanena omeho koogwamululu yaNamibia…Ekongo lyiipa kaaChina lye etelele uufuthi woogwamululu muAfrika

0
76

Desie Heita

WINDHOEK-Oraata yomalelo gopahedhi yAawambo inaga tya sha natango konkambadhala yaaChina okutunga uutomeno wuusino moshilongo. Shika ina ye shi ninga nonando pethimbo ndika oshi shiwike nawa kutya mbaka inaya itula mo shili mokutunga uutomeno wonyama yuusino.

Ndele shoka yo ya hala muNamibia osho owala iipa yuusino, mbyoka ya pumba ngashingeyi moshilongo shoka.
Oshikwawo aaChiina otaya thiminike okutunga uutomeno wuusino molwashoka miilongo yilwe yAfrika moka mbaka yali ya pitikwa okudhipaga uusino oya patwa okushi ninga.

Kokutya inaya pitikwa we okutumina iipa nenge kehe shoka shi nasha nokasino koChina okuza miilongo mbyoka.
Ondjindikila ndhika dhokwaa tumina we iilongomwa yuusino koChina nokoVietnam okuza unene tuu muAfrika okwa landula sho iilongo mbyoka ya ndhindhilike eshonopalo lyoshigwana shuusino miilongo yawo.

Omushiinda sha Namibia, Botswana oye oshilongo shahugunina shoka nasho sha tokola oku indika aaChiina ya tumine iipa yuusino koshilongo shawo okuza moka.

Etokolo ndika oye li ningi konima sho ya mono kutya mboka haya iyithana yoyene aapunguli nenge aanangeshefa oye etele oshilongo shoka uupyakadhi uunene.

Tanzania, Uganda, Ethiopia, Burkina Faso, Niger niilongo oyindji yaAsia oya tula po wo oondjindikila dhoku landitha oombanza dhuusino koChina okuza miilongo yawo.

China ota landa po iipa ayihe yuusino okuza muuyuni omolwa ompumbwe yoshilongomwa shopahedhi dhawo shedhina, ‘ejiao’, kwa itaalwa kutya ohashi hwepopeke ekunguluko lyombinzi molutu, hashi panga nokukoleka oonkondo dholutu okukondjitha omikithi, hashi tidha po eiyuvo lyoshitelele, okwaa ha kotha, omathimbo gapiyagana goomeme na ohashi longithwa wo okupendula uuta wa vulwa.
Okwa itaalwa kutya moChina nena omuna ashike omwaalu gwoogwamululu oomilliona ndatu, omanga momumvo 2014 okwa itaalwa kutya oogwamululu yomoChina oya li konyala oomilliona hamano omanga momumvo 1990 uundoongi moshilongo shoka owa li wa tengenekwa wu li poomilliona 11.

Omwaalu goosino muuyuni otaku tengenekwa guli lwopoomilliona 40, omanga China a pumbwa okudhipaga uusino oomilliona 10 omumvo kehe oku kutha iipa a longe nayo omuti ngoka kehe omuChina a pumbwa.

Pahapu dha Alexander Mayers, ngoka ha kona kona iipindi miipa yuusino uuyuni auhe, elando lyiipa yuusino muAfrika kaaChina olya fala mpoka kutya iilongo yimwe menenevi ndika uusino ihawu tokwa mo we, nenge omiyalu dhawo otadhi shuna pevi noonkondo. Naashika osha dhigupaleke onkalo momagumbo ngoka haga longitha uusino ngaashi okuhumbata omitenge nenge okuhila omitsalo nosho wo okupululitha omapya.

Opena omahangano gaali gaaChina taga kambadhala okutunga uutomeno wuusino moNamibia.
Mbaka oya thaneka okushi ninga mOkahandja nongele otashi vulika ishewe kamwe ye ka tunge mOutjo.
Oya ti okatomeno kehe ando otaka dhipaga uusino 70 sigo 100 mesiku. Shika otashi ti okatomeno kehe otaka dhipaga uusino 17, 640 komumvo nuutomeno auhe uyali otawu dhipaga oondongi 35,280 omumvo kehe. Pambelewa omiyalu dhuusino moshilongo odha tengenekwa dhili lwopoosino 200 000, ndele omahangano ngoka taga kondjitha iipindi yaa li paveta miipa yuusino otaga tengeneke oshigwana shuusino moNamibia shi li ashike poondoongi 159,000. Okushitalela momwaalu nguka otashi ti uutomeno mboka otawu longo ashike uule womimvo ne omanga uusino auhe mboka hawu monika moNamibia inaawu lethekwa po.

Ta shi ti ngele epangelo olya pitika aaChina ya ya tule po uutomeno mbuka Namibia ita ka kala nando onokasino kamwe okuya pomumvo 2021. “Shika otashi kala ngaaka molwashoka uusino ohawu kwata omumvo aguhe opo wu vale okasino kamwe.

Okasinona okapumbwa ishewe omimvo odhindji okukoka opo ka vule okuvala okasino okakwawo” Mayers osho a ulike. Morgane James, omukonakoni gwiinamwenyo moSouth Africa, okwa ti iilongo ayihe muAfrika oya koneke kutya sho ya pitike uutomeno wuusino miilongo yawo, shika osha etelele iilonga yaa li paveta.

Mo South Africa, moka epangelo lya pitika uutomeno utatu wuusino, aakalimo momikunda otaya lopota eindjipalo muufuthi wuusino.
James okwa popi kombinga yomukunda moshitopolwa shaNorth West moka uusino tawu yakwa uusiku nokudhipagelwa miihwa.
“Aanamukunda ohaya adha uusino wa yuywa iipa ndele onyama yawo inayi gumwa nando osha, ohayi thigwa owala mpoka yi olele miihwa,” James a hokolola.

Mo Kenya, moka omo amuke oshilongo sha tsikila okupitika iipa yuusino yi tuminwe natango koChina, ondando yokasino oya londo okuza pooN$895 muFebuluali nuumvo okuthikama pooN$1,700 mokasino ngashingeyi.
Burkina Faso okwa indike etumo mo lyiipa yuusino omumvo gwayi, konima sho ondando yokasino ya yi pombanda okuza pooN$55 okuya pooN$690 , okasino kehe moomwedhi ndatu dha piti.

Oondando dhili pombanda ndhoka odha thiminike aagundjuka momikunda opo ya tameke okuyaka uusino.
Mo South Africa, aanamukunda mboka inaaya hala okulanditha uusino kwaamboka taye wu landa, ohaya ndhindhilike nkene uusino wawo tawu kana po, molwashoka iimaliwa mbyoka aalandi taya gandja kaalandithi otayi heke aalandithi ya yake uusino momikunda. “Otuna iipotha oyindji yuusino wa lopotwa wa kana.

Otatu longo nopolisi ndele oshidhigu okulandula aalandithi yaa li paveta mbaka. Uusino owa kana po ashike,” James a ti. Namibia kena omautho ngoka taga wilike einyengo lyuusino. Pahapu dhopolisi kapuna nando omapulo haga pulwa omuntu uuna a humbata onyama nenge oshipa shokasino mosheenditho she.

Aapolisi oye na ko ashike neinyengo lyiimuna, oshikwawo uusino inawu tulwa uupapa nenge iihako komalutu gawo.
Onkene otashi kala oshidhigu oku ulika kutya omuntu ngoka ta hingi okasino nenge a londeka okandoongo mosheenditho she oye mwene gwako.

Oshikwawo oshipu komuntu a endithe okasino okuka pititha okuya nokuza koombinga adhihe dhomusinda omutiligane molwashoka aakonakoni kayena onkwa nuusino.

Mayers na James oya li moNamibia okupopya naakwshigwana kombinga yoshiponga shoku pitika elanditho lyiipa yuusino.
Pethimbo ndika ehangano itaali kongo okwi imonena iihohela yasha lyaapopi yoshiDamara otali kondjitha etungo po lyuutomeno wuusino omolwa iipa yuusino okuya koChina.

Shika otaye shi ningi molwashoka oye wete kutya ngele ondando yuusino oya yi pombanda , wo owo hawu longithwa momukunda nena itamu kakala we nando okamwe oshoka auhe otawu ka landithwa po kuutomeno hoka. Oshigwana shaaDamara itashi ka kala shina uusino wa gwana okulongitha pomagumbo gawo.

Omunashipundi shomalelo gaaWambo Elenga enene lyUukwambi, Herman Ndilimani Iipumbu, ina tya ko sha koshinima shika sho a pulwa kuKundana.

Oshigwana moOutjo nOkahandja, oodolopa moka mwa thanekelwa uutomeno mbuka oya ti inaya hala uutomeno mboka wu tungwe moka.

LEAVE A REPLY

Please enter your comment!
Please enter your name here