Young Chiefs itaka dhanena ekopi lyaDeb Marine mOshakati

0
64

Shipi Elago

OSHAKATI-Nando oyendji oya li ya inekela kuya olweetho olutiyali luudhano wekopi lyaDeb Marine otalu ya kOshanangombe, shika ina shi ningwa oshoka uudhano mbuka ota wu ka dhanenwa mOtjiwarongo.

Onkundana ndjika oya li ya teya omitima dhaa yambidhidhi oyendji yoYoung Chiefs mboka ya li ya tula omeya pomunzile ya hala okutala osipana yawo tayi dhanene megumbo.

Pethimbo Kundana a undathana naHafeni Shikulo gumwe gwomewiliko lyaYoung Chiefs okwa uvu kutya nando oya li yena ehalo oku etela aayambidhidhi yawo uudhano, shika, ina shi ningwa onkene aayambidhidhi ina ya, sholola.

Ihe nando ongaaka okwe shi ulike kutya yo oye uvite aakalimo yokoNooli ya fa ya lumbulwa omaudhano oshoka ekopi ndika olya kala ashike tali dhingoloka noodoolopa dhomuushimba oku za ngaa petameko lyomumvo.

Oku uvite kutya ekopi ndika olya li, li na oku dhanenwa koNooli oshoka olweetho nduka olwa landulwa ashike kedhingoloko lyahugunina ndyoka tali ka dhanenwa moVenduka, nando ndhika inadhi kolekwa natango kuDeb Marine yemwene. Maniki okwa ti nando Young Chiefs ina pewa ompito yoku dhanena ekopi ndika megumbo, komeho gaayambidhidhi ye, osipana oyi ilongekidha nawa oku ya sigo okofinala ngele ya ka dhana kOtjiwarongo.

Young Chiefs ota ka tskanene nospana yaashiwike naanaa nawa yoYoung African omanga Mighty Gunners ota yi mokapale na Tura Magic. Maniki okwa indile aayambidhidhi yoYoung Chiefs opo ya landule osipana momiyalu ominene.

Okwa ti Cascas Angula oye natango ta tsikile nokudheula osipana ndjika konima sho a li eya pe omasindano mekopi ndika.
Kombinga yepulo lyomudhewuli gwawo omukulu Alex Iitumba, natango Maniki okwa ti ke na eyamukulo oshoka yo oyi ipyakidhila nekopi na ota ya ka gandja eyamukulo shampa oliha ya tameke. Okwa ti wo Young Chiefs in etamo aadhani aape sigo onena na okwa landitha po Jonhn Mawe kosipana yo Mighty Gunners.

Tura Magic oye ena okwaako kuli pombanda muudhano mbuka, ashike ngele okwa etha a dhengwe kuMighty Gunners nena ondjila yaYoung Chiefs oyi li ya mbwalangandja, okutenteka oshikaha shimwe kekopi. Ashike mondjila yoYoung Chiefs omuna osipana yaana edhina yoYoung African ndjoka ya nika oshiponga ashike mboka haya popilile oye wete kutya Young Chiefs ota ka pita po nuupu.

Osipana kehe ta yi kutha ombinga medhingoloko etiyali lya hugunina ota yi ka pewa okapandi koodola 20 000 okwi ilongekidhila uudhano omanga omudhani dhingi kehe muudhano ta ka pewa 2000, na iimaliwa mbika oya tegelelwa yi ka gwedhelwe sigo opoodola 5000 medhingoloko lyahugunina.

LEAVE A REPLY

Please enter your comment!
Please enter your name here