Uunake oPremier Liha tayi ka monika kiitopolwa yokuushayi

0
48

Shipi Elago

ONGWEDIVA-Oshitopolwa shaMusati osho shimwe shomiitopolwa yaNamibia shi na ondjokonona oyamba metanga lyokoompadhi, sho sha kala noosipana hadhi tilika noonkondo. Ihe nando ongeyi shika sigo oompaka ka shi na nando osipana ya pondola okudhana moPremier League, okuza ngaa sho ya totelwe.

Omutoolinkundana gwomaudhano muKundana Shipi Elago okwa yi moonkundathana nomunawino momaudhano gopaitopolwa , ngoka wo omukwateli gwoNambula United nale, Hafeni Asino opo a popye oshindji kombinga yoshitopolwa shaMusati. Kepulo kutya omolwashike oshitopolwa shika kaa shi na nando osipana ye endele koPremier League, Asino okwa ti Omusati ogwa kala guna oosipana oonankondo na oha dhi tilika unene ashike odhindji dho mudho odha kala ashike dhi ikwatelela maadhani mboka hadhi kutha moosikola ndhoka dhi li momidhingoloko dhadho.

“Oshinima shika osha nika oshiponga oshoka olwindji ngele aanasikola oya mana omailongo ga wo poosikola mpoka ohaya shuna kiitopolwa hoka ya yambukile na oha shi kala oshidhigu okugalukila koodoolopa hoka ya li ha ya sikola opo ya dhanene oosipana ndhoka naashika oha shi ehameke oosipana dhomoshitopolwa shaMusati niitopolwa wo yilwe moshilongo,” Asino ta ti.

Ta tsikileko ta ti oshinima shimwe shoka ta shi shunitha oosipana monima ooshoka shaadhani ye na ashike ohokwe yokudhanena oosipana dhomoodoolopa moka ya valelwa, ngele onda za moTsandi nena inandi hala oku dhanena osipana ya za kiitopolwa yilwe.
Oosipana ihadhi longele kumwe kehe gumwe ota hilile puyemwene nando aadhani yongushu ka yeshi naanaa oyendji.

“Oshitopolwa shika oshina aadhani oyendji ashike oya halakana noosipana dha yooloka, edhilaadhilo lyandje olyo ndyoka andola opo oosipana dhomOmusati dhi tule uukuni kumwe dhi tale nkene tadhi nkondopaleke osipana yimwe nokukala ta ye yi pe aadhani ayehe mboka aawanawa opo ashike taya vulu okukala taya kondjithathana noosipana dhilwe moshilongo,” Hafeni ta tsikile.

Okwa ti pomimvo dhomilongo 90 moshitopolwa shaMusati omwa li oosipana ntano oonene noonankondo ngaashi Epupa Eleven Stars, Onambula United ,California FC, Young Brave na ODC FC, ashike ngele ando odha longelele kumwe ndele tadhi nkondopaleke po yimwe nena otayi vulu okuya koPremier League.

Osipana ngaashi Onambula United oya pumbwa okukonga omukalo gwopashinanena ngoka tagu nana aadhani opo ye ye ya dhanene osipana, ashike dhimbulukwa nee kutya okatanga kokoompadhi ngashiingeyi oka ninga ongeshefa na oosipana odha pumbwa oku longitha oshimaliwa opo dhi mone aadhani yongushu.

Oshinima tashi dhenge oosipana dhomOmusati niitoplwa oyindji moshilongo osho uuhupilo waadhani, oshoka aadhani oyendji oha ya thigi po evi lyiimpungu, opo ye ki ikongele omboloto muushimba naashika ohashi thigi oosipana ndhika moluhepo.

Oshitopolwa shaMusati ha sho ashike inaa shi lola oliha yoPremier League, ashike Ohangwena namo, oPremier League ina yi lyata mo, Zambezi naye oliha ke yi shi, Karas naye oliha yoPremier league ohe yi uvu ashike ngokatana komiilya.

Asino oku uvite kutya iitopolwa mbika oya pumbwa okutalulula omisindalandu dhawo dhetanga lyokoompadhi, ngele otadhi opalele tuu iitopolwa yawo.

Okwa ti osipana yoNambula oya pumbwa ashike okuninga uunima uushona shona nongele oye shi ningi nena otayi vulu oku sindana po oliha yoNorth West First Division noku ya koPremier League.

Osipana ndjika oya kala ethimbo ele moliha yoFirts Division na iha yi gumo naashika ota shi ti oyi na ondjundo nongele oya pewa omakwatho nena otayi vulu oku etela aakalimo yomOmusati uudhano woPremier League.

Omukulu gwonale okwa tile edhina lyombwa okumukweni ho li uvu yo ongoma ohayi hokelwa pondjila ondiwete oosipana niitopolwa mbyoka inaa yi lola oshikwiila shoPremier League nayi tameke okulonga nuudhiginini yo tayi kutha iiholelwa kiitopolwa iikwawo mbyoka yi na oosipana moPremier League.

LEAVE A REPLY

Please enter your comment!
Please enter your name here