Ekandjo a pula aaNamibia ya hangane

0
73

Maria Namupala

OSHIGAMBO-Minista Gwaagundjuka, Omaudhano Niilonga yOpashigwana Jerry Ekandjo okwa pula aaNamibia ya hangane yo ya kale kumwe mokukondjitha omashongo ga palamena oshilongo. Ekandjo ndhika okwedhi popi ehuliloshiwike lya zi ko, pethimbo a popitha aakalimo yomoshikandjohogololo Oniipa.

Mokupopitha oshigwana shoka shi ile kedhimbuluko lyesiku lyomapendafule, Ekandjo okwe ya dhimbulutha ya tseye aluhe kutya ekondjelomanguluko olya za puudhigu. Okwa ti moshilongo omwiiteyelwa kombepo yuutondwe no yokwaaha longela kumwe, ati ndjika otayi teyagula po noku hanagulapo ombili.

Okwa indile aaNamibia ya hangane muukumwe, yo ya kale aluhe ye shi shoka taya lalakanene. Okwa ti okwaaha tsa kumwe nomavundakano ohaku eta omatopoko nuutondwe moshigwana, shoka a ti kashina elago. Ehilathano ndika ohali thiminike aantu ya kale taya kondjo nokukala yaa na ombili.

“Oshilongo ohashi tungwa po uuna aantu yena ombili, ohole, elongelokumwe no taya nana mepaya limwe taya kondjo moshili okuyambula po oshigwana. Nena ngele itatu hangana oshike ta tu eta moshilongo. Aakondjelimanguluko noofule oya kondjele ombili nokuyi eta moshilongo, ihe nena otwa hala okuhanagula po ombili ndjoka ya pitila mombinzi ya tika,” Ekandjo a pula.

Okwa ti yo poondondod-hopombanda mepangelo oya hala uukumwe, yo ya tsikile okuhanganitha oshigwana shoka ta ti otashi ngwangwanekwa nokupukithwa, ta ti ombili ohayi kandulapo omikundu odhindji.

“Mokudhimbulukwa esiku ndika natu pandule omapendafule goshilongo ngoka ga tamekele iita yemanguluko pOmugulu gwombashe, nonade oyendji katu ya na we muuyuni muka oya kondja ekondjo noya sindana,” ta ti ngaaka.

Okwa gwedhapo kutya ondjokonona yekondjelomanguluko ka yishi ompu oshoka oya pitila mombinzi tayi tika nomekanitho lyoomwenyo odhindji mekondjelo lyombili nemanguluko lyoshilongo. Okwa indile mboka taya kambadhala noku teyapo ombili yoshilongo ya hulithepo omavundakano ngoka taya eta moshigwana , osho wo omatopoko.

Okwi itaala kutya nonande oshilongo osha taalelwa komashongo ogendji, shono itashi imbi aantu yaye komeho, naya longe owala ngaashi taya vulu yo ya kwashilipaleke kutya ombili yoshilongo oye yi kaleka po.

“ Aavalwa mbaka aaNamibia oya longa oshilonga sha simana mokukondjela manguluko lyoshilongo, noya longo ngaashi tashi vulika okukwashilipaleke kutya omukolonyeki okwa sindika.

Otwa nyanyukwa oshoka evi lyetu olya yambekwa nomapendafule ngoka ihaaga sholola, noku shuna ompadhi monima, natu tseyeni kutya aakondjeli manguluko mboka oya kala omausiku itaaya kotha taya lalakanene ombili ndjono tu li muyo nena” Ekandjo ta gwedhapo.
Okwa ti omapendafule otaga tumbalekwa uuna aaNamibia taya longo shoka shu uka no shi li mondjila, noku yanda onkalo yokwiihola mwene osho wo yokulunga to itapula. Okwa indile aaNamibia ya tsikile nokukondjitha omashongo ngoka ga palamena oshilongo.

LEAVE A REPLY

Please enter your comment!
Please enter your name here