Keshe umwe na kale omupolifi meameno lokaana

0
124

Omahokololo avali a ninga omafiku taa dana onghandangala moikundaneki, ena sha nenyone po lounhu womunhu otaa holola nghene oshiwana shetu sha kanifa ohole nefimaneko lounhu.

Omahokololo aa, limwe ololo lili moshifo shaKundana shonena, omo okaana keedula 17 ka kala nokuhepekwa paixulo komulumenhu waina sha tameka nokuli omanga kali kena eeedula 14.

Eshi tashi halula nota shi lilifa osheshi ina, nakudala okaana aka vati okwa kala eshi shi kutya okaana kaye otaka ningilwa omahepeko aa ehe shi kupopiwa, ashike okwa hoolola omulume komesho yokaana kaye oko a dala otyanghu.

Eshi tashi ulike kutya oshiwana shetu osha kanifa omaliudo nefimaneko olo omunhu ena okuli fimaneka kuye mwene.
Ngee omunhu to dilaadila eameno lotete tete lokaana ohali tameke na ina yokaana ashike meme ou ota kumwifa eshi ta dilaala ashike ouxupilo ponhele yokudilaadila onghalo omo muna okaana, nonakwiiwa ya ko.

Kakele kaina, inagona, hano ina mumwaina wa ina yokaana naye okushishi, ndele kape na nande oumwe eva lopotela oshinima eshi, ehe fi okaana koovene. Odjona ya Kalunga tai elaela, ihe wete apa ta i mono ekwafo, omanga ovanhu ava ya pewa kuKalunga va kale ve na oshinakuwanifwa shokuvaamena ovo vali tave i umbile mokanya konghoshi. Onde li neekela opolifi eshi tai ningi omakonaakono moshinima omu, ina yokaana aka naye okwa pumbwa oku kwatwa po ye a ka nyamukule momhangu, shaashi ngeenge eshi tashi hokololwa kokaana osho shili, naye oku na mo onyala mekwato longhonga lokaana aka.

Kakele kokaana kOkokalongo, oshiningwanima shikwao tashi difa omaxwilili osho sho shokOutjo oko omuleli wokaana a kwatwa mokavideo ta kupula okaana kokahanana mokambete kako, oshipala sha, ye teka kufa mo eka kwete komaulu, omutwe wa endjela wa tala pedu. Efano lii, linyanyalifa okuli dilaadila, ashike eshi oshinima shoshili sha ningilwa okaana kokahanana, sha ningwa moNamibia.

Oiningwanima ei oili ashike oshipala tashi ulike kutya okaana okaNamibia okeli monghuwo ina onghambe nota ka xupu ka fa okadila handa oko haka imbwa. Mongula oto udu okaana ka dipaa, ile ka vaka, ile ka kwata omunhu keenghono ile kaninga oshimbuluma shi duli fe po. Fye hatu li pula kutya ounona oinima oha ve i lihongele peni, fye ofye hatu longo oimbuluma, hatu i longele ounona manga nokuli va shona, ile hatu i longo momesho avo.

Monghalo yokOkalongo, vati ovanhu pomudingonoko oshinima eshi oveshishi, ile ohave shi udu ngaho omaudila, ashike ponhele yoku ya kopolifi, ile kovaxungimwenyo oku ka lopota omunyonena wa kula tau ningilwa odjona yaKalunga, ovanhu ohava kala ashike momaumbo avo tava hokolola voo tava yolo. Omunhu to yolo, mbela wa dimbwa kutya etembu olufo. Nombiibeli ota i ti ngoo natu filafaneni oshisho, fye vati otu vaKriste ngaho. Hano oukelefiti weni vaNamibia ouli peni ngeenge omunhu ito kalele po nokukwafa nokaana kashona keli moixuna. Nande ina yokaana ke na noixuna oyo tai longelwa okaana kaye, ove fikama ndele to kongo ekwafo. Ngee nee owa tila uka ninge ombangi, oto dulu u lombwele opolifi kutya ove ouyelele ashike to yandje va konaakone ashike ino hala oku ninga ombangi.

Shikwao, ovalongi peefikola nava kale tava konaakona nawa ounona, tava tale omalunduluko tae uya momalihumbato avo, voo tava kala ngaho tava finyafinya. Oshilongwa sho Life Skill nashi diininwe peefikola opo ounona va kale va manguluka okupopya omaudjuu, voo veli neekele yoo ovahongi, ngee veli hanga momaupyakadi madjuu oku popya, opo ashike eameno lounona tali kala, la hangakenwa nola amenwa komukwashiwana keshe.

Ngee ovadali meumbo ova dopa, omushiinda opo eli, ngee mushiinda naye a dopa ile a nyengwa, ofikola opo ili. Eembelewa dilile po oufemba womunhu odili kokule ashike omunhu keshe kala omupolifi.

Kounona va nini ovo ihava dulu oku lopota, nefimbo limwe ovashiinda iha va kala po va ude nghee tava kwenauna, ovadali nava kale tava ningi omapulapulo, nomakonaakono a wana omanga ina va yandja oilonga. Vali, okutula oufano momaumbo otaku eta eameno linene kounona.

LEAVE A REPLY

Please enter your comment!
Please enter your name here