Metropolitan ota ka andjaganeka uudhano okuya ko2030

0
35

Shipi Elago

OSHAKATI-Ehangano lyaMetropolitan Swabou olya kutha ko oongaku mehumitho komeho lyomaudhano goosikola okupitila methigathano lyalyo lyokomumvo ndyoka hali dhanwa koosikola ndhoka dhina ondondo onti 8 sigo 10 miitopolwa ya yooloka moshilongo.
Omugandjimulombo mehangano ndika Laurencia Prinzansky okwa yakeleko iikundaneki Olyomakaya ga yi kombinga yoompangela dhehangano ndika okuthika komumvo 2030, tati” nonando ethigathano lyoosikola olya li ashike lya nuninwa oosikola dhomiitopolwa ine yokoNooli, yo ota ya kashona nakashona moku gwedha mo iitopolwa yilwe moshilongo.

Okwa ti konima sho ekopi ndika lya li lya dhikwa po momumvo 2007 oya li ya tameke niitopolwa Omusati, Oshana, Oshikoto,nosho wo Ohangwena, konima sho kwa li kwa monika kutya uudhano womiitopolwa mbika owa kala hawu liwa oshipungo ethimbo ele.
“Konima yomimvo 8 uudhano mbuka ta wu dhanwa ashike kiitopolwa yokoNooli ehangano olya tokola opo li gwedhe mo iitopolwa sha Hardap no shaKaras,” Prizonsky a ti.

Okuza mpoka oya li nee ya tameke oku gwedha mo oshitopolwa shimwe kehe omumvo moka omumvo gwo 2016 ya li ya gwedhamo oshitopolwa shErongo, omanga nuumvo oshitopolwa shaKavango East osha li wo sha gwedhwamo no ku eta omwaalu gwiitopolwa hayi kutha ombinga mekopi ndika gu kale iitopolwa 8 ngashiingeyi.

Okwa ti “elalakano lyetu otwa hala sho tatu ka thika komumvo 2030 iitopolwa ayihe moshilongo ota yi kutha ombinga methigathano ndika.

Okwa ti natango kayena uuyelele wothaatha kutya oshitopolwa shini ta shi ka gwe shi tokolwa kolutu lwiithikamena ndoka halu gongala okutotha mo oshitopolwa shoka sha landula ko na oha shi ningwa pehulilo lyomumvo kehe gwethigathano.

Okwa ti wo ekopi ndika ota li ka tameka noku dhingoloka niitopolwa oshoka ngashiingeyi oha li dhanenwa ashike mOshana.
Kepulo kutya omolwashike ekopi ndika inaali ka dhanenwa we koSwakop ngaashi sha li sha thanekwa Laurencia okwa ti oya li yena ehalo ashike omalongekidho niikwa niipangitho oga li ga nkundipala onkene ina ya vula we okuya komeho nomalongekidho gatya ngaaka.
Prizonsky okwa li a popi mOshakati Olyomakaya ga yi medhingoloko lyuudhano wahugunina waMetropolitan Swabou Summer Cup mboka wa li wa sindanwa po kosikola ya Dibasen Junior Secondary School yo kErongo lyokuushayi ya yambukile mOkombahe ndjoka ya li ya dhengemo osikola ompe muudhano mbuka Nyangana Combined School 2-1 medhingoloko lya hugunina wetanga lyokoompadhi.

Dibasen okwa fala kegumbo okapandi ko N$15 000, ekopi nosho wo oombandi dhoshingoli omanga Nyangana a toola po okapandi ko N$9000 noombandi dhoshisiliveli.

Ombuumbuu Combined School oya li ya kutha po ehala etitatu muudhano mbuka no ya pewa olupandu lwo N$6000, noombandi dhoshikushu,omanga Emipleheim Combined School yo ko Hardap ya li ye etelele okano no ya hekelekwa nokapandi ko N$4000.
Mokatanga komokambamba Ndiyona Combined School oye enyakwa lyuudhano mbuka nonando oshi li oshikando shotango oku kutha ombinga muwo.

Ndiyona okwa li a toola po okapandi ko N$15 000, ekopi noombandi dhoshingoli.
Oshaaluata Combined School oyo ya pehala etiyali konima sho ya dhengwa 24-18 medhingoloko lyahugunina kuNdiyona na moka tungwa kawo omwa li mwa tulwa N$9000.

Sheetekela Combined School okwe ya pehala etitatu, moka a pewa olupandu lwo N$6000, omanga Daniel Joubert yokoHardap oya toolapo ehala etine moka na yo ya pewa N$4000.

LEAVE A REPLY

Please enter your comment!
Please enter your name here