Naku longwe ngiini nomashongo ga taalela oshigwana ELCIN

0
78

Sakaria Kadhikwa

Windhoek-Omubisofi gwoshikandjongeleki shokUuzilo mOngeleki OnkwaEvangeli paLutheri yomuNamibia [ELCIN ] okwa shongo iilyo yongelki ndjika yi dhiladhile muule nkene omashongo ogendji ga taalela oshilongo taga kuthwa mo, mondjila.

Omundohotola Shekutaamba Nambala okwa gandja eshongo ndika pethimbo a popitha egongalo lyaHosianna moWindhoek Osoondaha oshiwike shika. Omuwilikingelki okwa lombwele aakwanegongalo mboka ya li mongelka kutya opena omaipulo omanene kombinga yomashongo nomainda ngoka ga thikama moshipala onkalamwenyo yoshigwana. Limwe lyomomainda ngoka olyo okwaahena iilonga

Omundohotola Nambala okwa lombwele egongalo kutya ELCIN oye ongelki onene moshilongo onkene ewi lye olya pumbiwa oku uvika kombinga yomashongo ngaka. “Otandi mu pe oshinakugwanithwa shika opo tutaleni nkene onkalo yokwaana iilonga tayi vulu okuhulithwapo”.Ethaneko limwe kombinga yoshinima shika osho elongo, oshoka uuna omuntu ena euveko nena ota vulu okumona iilonga. Nambala okwa londodha kutya okwaahena iilonga otashi vulika ku vale omashongo ogendji ngaashi unene tuu mokati kaagundjuka uuna taya kala owala ya kuutumba yaana omaipyakidhilo gasha.

Kakele kokwaahena iilonga Omundohotola Nambala okwa popi wo kombinga yeshongo lyokwaathike pamwe pokati kaantu moshilongo unene tuu ngele tashi ya puuhupilo.

‘Moshilongo muka eyooloko pokati kaayamba noohepele otali nenepala unene noonkondo. Oto adha ngaashi nando okuli omukuluntusikola penongelo lyontumba okuna ondjambi onene omanga omwoopaleki penongolo olyo tuu ndyoka oha taamba oshishona itaashi adha mo nando momwaalu gwomukuluntusikola’ shika oshinima tashi yi moshipala oonkambadhala dhokushonopeka eyooloko pokati kaayamba noohepele Nambala a ulike.

Okwa ti pethimb ndika aantu oyendji otaya thigathana po mokukonga iilonga mbyoka yi na oondjambi dhili nawa nomauwanawa itaaga pewathana. “Oto adha omuntu ota kongo oshilonga shoka, ha molwashoka ando te ke shi longa nawa, aaye okwa tidha ashike ondjato ndjoka onene taka mona ngele oshilonga shoka okwe shi mono” osho a ulike.

Moshinima shenenepalo lyomwaka pokati kaamboka ye na naamboka yaana oshindji. Omumbisofi Nambala okwa dhimbulutha egongalo kutya manga oshilongo inaashi manguluka aawiliki yoshilongo pethimbo ya li pondje yoshilongo oya li ya ningi omauvaneko goku tula po omilandu dhuusosiale konima yemanguluko. Ihe ngaka okwa ti ogafa ga ethiwa thiluthilu. Okwa shongo aawiliki yoshilongo opo ya dhimbulukwe omauvaneko ngaka yali ya ningi manga ye li pondje yoshilongo. Okwa ti aantu oya hala okumona omilandu dhuusosiale ndhoka tadhi ka kwatha moku shonopeka eyooloko pokati kaayamba noohepele. Kombinga yokwaathike pamwe Nambala okwa pe aakwanegongalo yaELCIN oshinakugwanithwa okugandja omathaneko nkene omwaka nguka tagu shonopekwa. Omumbisofi nosheendo she oye li metalelo po lyopauBishofi mOshitayingelki shaWindhoek omasiku ngaka , nokwa longitha ompito ndjika okugandja ewi lyaELCIN komashongo niiyetwapo yi vule 20 mbyoka a indile aakwanegongalo ya monene omayamukulo. Iikwawo kakele kwaambyoka ya shangwa metetekelo, oshigwana osha pumbwa okutala elongitho nayi lyomalovu, etaandelo lyelongitho lyiingangamithi, omavu nomikithi tadhi hwamekwa keiyetho, okwaa koka meuveko lyopapolitika, nelongitho nayi lyoonzo dhoshigwana.

twa po ayihe mbyoka Omumbishofi okwa hala omukwashigwana kehe a longithe omayele ge okugandja omathaneko nkene mbika tayi monenwa omayamukulo noku kuthwa mo mondjila ye yokomeho lyoshigwana.

Omumbisofi Nambala nosheendo she oshiwike shika otaya talele po egongalo lyaImmanuel natango moWindhoek tuu okupopitha iilyo yongelki ya ELCIN.

LEAVE A REPLY

Please enter your comment!
Please enter your name here