Omulumentu nguka okwa kala ta kwata okanona koonkondo nonando yina yokanona okushishi

0
1646

Loide Jason

Okalongo-Okanona komimvo 17, oke shi pondola oku kwatitha po omulumentu ngoka eli kuume kayina komiihole sho a kala teka hepeke paihulo. Omufekelwa nguka okwa holoka nokuli mompangulilo yaMangestrata oshiwike shika.

Okuza ashike sho okanona haka ka gwanitha omimvo 14, anuwa onkalamwenyo yako oya shituka oheli, sho he nenge kuume kayina ngoka eli omunangeshefa mOkalongo a kala eka ninga oshilongithwa she shopaihulo, omanga yina anuwa ngoka a li eshi onkalo ndjika inaa ninga po sha.

Okanona hoka taka monika keli monkalo yuutile no ye ngwangwano, ngashingeyi oke li metonatelo lyayinakulu.
“Monakuziwa yandje onda kala owala handi piti ndili meni lya ne, ihe sho tate a tameke okulongela ndje iilonga mbika onda tameke oku ndopa,” osho ka ti sho ka tameke okuhokolola.

Omunangeshefa ngoka itaa vulu oku thamunwa molwegameno lyokanona, otaku hokololwa a kala nokukwata okanona haka onkonga ashike okanona kaha inaka mona nande epopilo lya sha oshoka yina na yinagona oya kala owala yamwenena oshinima shika.

“Esiku limwe tate okwa lombwele meme kutya otatu yi naye tu fale okanona kokatekulu (ke) kosikola koRuacana.
Meme okwa zimine na otwa yi. Sho twa yi hoka otwa kala ko omasiku gaali tuli moLodge moka a futa ondunda e ta lombwele ndje ndi lale naye.

“Onda li nda tila noonkondo ihe kanda li ndi na shoka tandi vulu okuninga. Sho twa shuna kegumbo ondali ashike tandi kongo ompito opo ndi lombwele meme shoka sha ningwa po. Ihe tate ina pa ndje ompito ndi popye na meme. Kehe ethimbo ndili megumbo ota si ashike oshimpwiyu sho kukala inandi popya nameme.

Sho tandi yi kelugo, ye tate ota ithana ndje. Sho tandi yi popepi nameme ye ota ithana meme,” osho a hokolola ngaaka.
Omulumentu nguka anuwa, oye a kala nokuyambidhidha ofamili yomukiintu nguka pashimaliwa, okwa kala noku ningila okanona haka omambandameko kutya otaka ka lya moondoloma ngele yina okwe shi uvu, oshoka anuwa oya za puuthigona.

Ashike sho omulumentu nguka a kala nokulongela okanona iilonga mbika yiihuna, onkala ndjika oya ka thiminika opo okanona ka kuthe onkatu ka shangele yina, nayinagona oombapila, oshoka he anuwa okwa kondja ngaashi tashi vulika opo kaa ka mone nande ompito ka popye nayina.

Aakiintu mbaka yaali nonando ya lombwelwa ngeyi kokanona, anuwa ina ya ninga posha. Nokuli iihuna oya tsikila oshoka yina oye nokuli a kala ha thiminike okanona opo ka ze po nahe ngele taka tindi.
Anuwa omulumentu nguka okwa kala ethimbo limwe ota kwatele okanona haka koonkondo megumbo, ethimbo limwe okiilonga ye nomathimbo gamwe okoohotela.

Onkalo ndjika oya piyaganeka okanona haka sigo nokuli taka ndopa nomosikola.
Nuumvo pefudho lyaApiilili okwa pitile kuunyege, pefudho lyAuguste okwa ndopa shoka ihee shi ningi shito, noshe mu piyaganeka pamadhiladhilo.

Omunona okwa ti okwa tsikile nokunyolela yina oombapila kombinga yoshinima shika ihe yina kena esiku a ninga po sha.
Sho sheke ya ponkatu mpoka opo omulumentu nguka a ka kwatwe po, okanona anuwa oka mona uupitilo, e ta ki inipi mo miikaha yahe, kuuka kooyinakula.

“Okwa li anuwa tandi falwa kOshakati ndika thanekwe okamutse koshilongo ashike sho nda tindi ko, meme okwa thiminike ndje, anuwa nandiye natate oshoka ngele inandi ya kapu na ngoka taka pandje oshimaliwa sho kuya koombelewa.

Onda tokola kutya oshikando shika itandi yi oshoka ondi shishi nawa kutya otandi ka longelwa uushanda.
Onda matuka po etandi yi kookuku. Sho ndayi onda tsakanene na kuume kandje ngoka oye nda hokololele ehokololo eta pendje enene dhilaadhilo kutya nandiye ndika lombwele opolisi,” osho ka hokolola. Okuza mpoka okanona haka oka matuka sigo omositaasi yopolisi, noku shi tya ko. Mokushuna, opolisi oye ya ithanwa mbala sho yina yokan

ona nomusaane gwe ngoka ya ka tegamena okanona hoka kegumbo lyayinakulu hoka ka tembukila.
Na yina opamwe na yinagona ayehe oya kala taya gamene omulumentu nguka, taya ula okanona omalaka omawinayi, anuwa omolwashike taka lopota he kopolisi, ye oye he ya kwathele.

Lwopehulilo nokuli yina okwi itekela okanona hano opolisi.
Ngashingeyi omusamane ngoka okwa kwatwa po sho oshipotha sha patululwa kepangelo. Okuli mondholongo moNandjamba moka a tegelelwa okuya a ka holoke mompangu mOutapi moshitopolwa omo tuu moka momukokomoko gwoshiwike shika.

LEAVE A REPLY

Please enter your comment!
Please enter your name here