Omupolisi anuwa a yaka po otuwa yepangelo nokuimbotsa

0
595

Komutoolinkundana

Ompangulilo yaMangestrata mOutapi, otayi hokololitha omulumentu omunamimvo 27, uulunga nokuhinga nuuhasha sho anuwa a yaka oshihauto piilonga ye, nokuya nasho kOgongo, hoka mondjila eshi dhenga mumwe niihauto iikwawo iyali.

Otaku hokololwa ehuliloshiwike lya zi ko omunambelewa nguka gwedina Andreas Namweya ha longele poshitaasi yopolisi mOutapi, yali miilonga namukwawo gumwe sho anuwa ya dhengelwa opo yaka kwate po omufekelwa ali eli pehala limwe moshitopolwa.

Mukwawo ngoka oye a li e na uuthemba wokuhinga, okwa kutha oshipatululo eta ya yi hoka yali ya lombwelwa. Mokugaluka, omuniilonga pamwe na Namweya nguka anuwa okwa nyolele mo oshihauto, eta thigi po oshipatululo. Nani, Namweya oshipatululo mpa kwali sha tulwa okweshi nyangula po, ete ka tsu uuka kOgongo. Mondjila, lwopOgongo, anuwa okwa pumu ohauto yimwe nongelela yohauto ashike ine yi thikamena, okwa hinga owala. Anuwa sho a yi kOgongo oya kala tayi iuvitha nawa nookuume ke, ye anuwa ta sikulufa ko kohauto yopolisi ndjoka yaana iihako.

Konima okwa galuka ko, andola a shune kOutapi, anuwa okwa hingi kokapate komamanya, ashike sho ta londo koteya, okwiidhenge mohauto ndjoka yali tayi hingi koteya.

Ohauto ndjika yepangelo oyali ya mbwanyaguka, na kayali we tayi vulu okuhingwa, omanga onkwao yazi po tayi ende.
Omupolisi nguka anuwa okwa lombwele omukulukadhi ngoka a li ta hingi ohauto ndjoka iidhenge mumwe nayo kutya anuwa ye ohalongo moaputeka mOutapi, na okwali a endelela ta fala omiti dhomuvu. Anuwa okwa fundju omukulukadhi kutya na hinge po owala ohauto ye aye kegumbo, ye teya a konge (Namweya) esiku lya landula kehala lyiilonga ye, koapoteka. Anuwa okwa lombwele wo, omukulukadhi ngoka kutya ye ota tegelele owala aaniilonga pamwe naye ya ile po omiti, omanga ye ta langele otuwa.

Omukulukadhi ngoka a li a eta ohenda, anuwa okwa pe omulumentu nguka ondjatha ye oshoka ota lala miihwa. Nani, sho tuu omukulukadhi a pilamene ko ye Namweya naye ota pilamene ko uukakOutapi.

Opolisi esiku lya landula ko oya ka yongola owala kutya ehauto ndyoka lyoNissan kali po. Sho ya pula pula oya ovu kutya Namweya okwa monika nohauto ndjoka ngohela kOgongo.

Konima opolisi oya mono olopota kutya opuna ohauto yambotswa mondjila yaGongo. Shika osha fala sigo opekwato po lyaNamweya ngoka a holoka mompangulilo Etitatu lyoshiwike shika.

Kali a pewa iifutile mo. Komissiona Tylves Kampolo ngoka eli omutse gwopolisi mOmusati okwa koleke oshiningwanima shika, ta ti, Namweya konima sho a kwatwa okwa gandja wo ombapila, i ikutha miilonga moompadhi oontalala.

LEAVE A REPLY

Please enter your comment!
Please enter your name here