Ongwediva City ya tameke okwiidheulila oliha

0
54

Shipi Elago

ONGWEDIVA-Oosipana yOngwediva City oya tameka nomadhewo ga kwata miiti okwi ilongekidhila oliha ndjoka tayi fofodholwa tayi tameke muKotoba konima sho ya li ya tulamo ombiliki konyala uule womvula.

Kundana sho a talelepo Ongwediva City okwa adha yi ipyakidhila noku idheula pokapale kayo ke li poshana shi li kuuzilo woshiputudhilo shoUNAM Engineering Campus mOngwediva nokwi imoneneko ye mwene nkene osipana ndjika tayi idheula nawa.
Oshipandi shaadhani aakulu naamboka aape oshali shi ipyakidhila noku ninga omadhewo okuzula omalutu gawo opo sho oliha ta yi keya go nomalutu gawo oge li monkalo ta yi vulu oku dhana ominute omilongo 90.

Omudheuli gwosipana ndjika Gideon Shikulo ngoka a li nale omudheuli gwoKK Palace okwa li iitulamo shili momadhewo sho aadhani ye li konyala 30 ya li ya ngundumana pokapale mpoka.

Aadhani mbaka oya li ya topolwa moongundu ne na kehe yimwe oya li ta yi ningi omadhewo gaana etanga , ano gopalutu oominute dhontumba nongele odha puko otadhi lundulukile kwaangoka ga li ta ga ningwa kosipana onkwawo nosho tuu sigo okomadhewo gosipana ontine.

Shikulo okwa ti aamati oya yamukula nawa kehiyo lyomadhewo na oyendji ohaya thiki pethimbo.
Ta ti oyendji oye li kokule nokuy a pomuthika ngoka gwa pumbiwa moliha , onkene otaya longo nuudhiginini unene nomadhewo goku matuka pwaana etanga. Opo ye ete omalutu gawo pondondo .

Ongwendiva City otayi ka dhana oshikando oshitiyali moliha yoFirst Division konima sho ya li ya dhana oliha ndjika oshikando shotango omvula yokatanga 2015-2016 moka ya li ya longo nuudhigu okukaleka po ehala lyayo modivisiona ndjika.
Shikulo okwa ti oyi ilongekidha onkene aayambidhidhi naya kale ya tegelela oshindji oliha sho tayi ka tameka oshoka ngashiingeyi oyi ilonga oshilongwa.

Otwa etamo aamati yatatu ongoshitopolwa sho ku nkondopaleka osipana okuya komeho.
Omudhani omukulu gwOshakati Chichi Nambuli ota kwathele muutekinika wosipana ndjika, naye okwa li ta idheula nosipana ndjika komatango getiyali sho Kundana a li pokapale.

Ongwediva City oyi shiwikilwe nawa mo muzalo gwayo omumbulawu nomutokele nosho wo ngoka gwomeya gomudhime nomutokele. Omunashipundi gwosipana ndjika oLinekela Shipindo ngoka a kala posipana ndjika ethimbo ele. Ongwediva City ka yi na omukwashilipaleki pahapu dha Shikulo omudheuli gwayo ndjika ohayi hupu owala moondjato dhaaholi yetanga mboka ye yi dhingoloka uuna yi li momalweendo niipumbiwa yilwe.

Shoka sha simana oo shika kutya osipana ndjika oyi na oshikondo shomapendulepo shoka shina opolohalama yokudheula uunona uushona noku wu pa omadhewo ngoka ta ge wu longekidhile onakuyiwa ombwaanawa yo ka tanga kokoompadhi naashika ota shi ti osipana ndjika oyi li momake omawanawa.

LEAVE A REPLY

Please enter your comment!
Please enter your name here