Ya dhimbulukwa oshiwike shopashigwana shuuthiga wopahedhi

0
76

Maria Namupala

ONDANGWA -Aanambelewa moshikondo shElongo moshitopolwa shaShikoto oya hangana okutameka Omaandaha oshiwike shika, nelalakano okutyapula oshiwike shuuthiga wopashigwana nomithigululwakalo noohedhi.

Oshiwike shika ohashi dhimbulukiwa omumvo kehe nohashi dhanwa kiitopolwa ya yooloka moshilongo. Omukuluntu gwelongo moshitopolwa shoka Lameck Kafidi, etiyali lyoshiwike shika okwa yelitha kutya omimvo dha piti oya kala haya dhimbulukwa shika pamuthika goshitopolwa mono oosikola hadhi hangana nokutungathana kombinga yomithigululwakalo.

“Omolwa ompumbwe yoshimaliwa nuumvo inatu vula tu dhane esiku ndika pamuhanga, notwa gandja etseyitho koosikola adhihe, opo dhi dhane oshiwike shika poosikola dhawo uuna ya tothamo esiku ndyoka ya hala okulonga iinyangadhalwa yopamuthigululwakalo,” Kafidi ta ti ngaaka. Aanambelewa oye li poombelewa dhelongo moshitopolwa moka, ya zala omizalo dhawo dhomithigululwakalo, noku ulika iilongomwa niilikolomwa yopamuthigululakalo ngaashi omatemba, iiyuma, oonyandi, oondunga na yilwe oyindji.

Kafidi ta ti elalakano lyoshiwike shika okutopolelathana uuyelele wuna sha nomithigululwakalo osho wo iithigululwa mbyoka ya thigwa po kookuku yonale, noya pumbwa okuyi longa aanona mboka opo taya putuka.

“Omithigululwakalo noohedhi owo uuthiga mboka twa thigulula notwa thigilwa kaakulu yonale, notwa pumbwa tudhi simaneke no tudhi kaleke po, oshikondo shelongo osha mono shoopala okukaleka po omithigululwakalo nokukala tashi dhimbulukwa oshiwike shika, nokwi idhimbulukitha onakuziwa yomithigululwakalo,” a gwedha po ngaaka.

Okwati pomahala ga yooloka otapu adhika oondhimbulutho thano dhiihongomwa yopamuthigululwakalo, nomathano ga yooloka mono aanona nakehe ta vulu okwi ilongelako, yo tayi tseyithilwa nokulongwa omapipi ta geya.

Kafidi okwa gwedha po kutya kakele komiti niihongomwa yimwe, aanona oya pumbwa okulongwa nokutseyithilwa omiti ndhoka dha kala hadhi longithwa kaakulu yonale okupanga aavu ngaashi omatse gookuku ngoka haga watele oomwe, na dhilwe odhindji. Ta ti okuuvite etumba sho oshitopolwa sha Oshikoto shiitulamo noshi uviteko omithigululwakalo.

“ Sho tatu dhana oshiwike shika shomithigululwakalo noohedhi onda hala ndimu dhimbuluthe kutya oshigwana kehe tashi kanitha omithigululwakalo dha sho, otashi ifulile elambo moka tashi fumvike onakuyiwa yasho, onkee nadhi simanekwe dho dhi kalekwe po oshoka oshigwana shaana omithigululwakalo oshafa olweendo lwa tumba lwaana mpoka lu uka,” Kafidi a londodha.

Omukuluntu gwelongo ta gwedha ko kutya elalakano lyawo lyokulongekidha oshiwike shika nokushi kaleka po, oya hala unene oongundu dhaakuluntu dhi longe nokunwetha mo oongundu dhaagundjuka nodhaanona, noku kaleka po onakuyiwa yoshilongo.

“Onda hala okukwashilipaleka mpaka kutya omithigululwakalo inadhi thikama pehala limwe, ashike otadhi inyenge notadhi koko ethimbo kehe, onkee tu hanganeni tu gameneni po ethigululo lyetu,” a indile ngaaka.

Okwa pula aakwashigwana ya kaleke po omahala gomithigululwakalo, noku talelapo omahala giikulunima, tati omiti dhopaunshwitwe nadhi kalekwepo.

Moshiwike shika iinyangadhalwa ya yoolokathana oya dhana onkandangala. Metiyali okwali kwa ulikwa yimwe yomomiti dhopamuthigululwakalo ndhono ku wetike kutya otadhi vulu ku panga omuntu sigo a aluka.

Oshiwike otashi dhanwa oshilongo ashihe, mono oshitopolwa kehe nosikola kehe ya kuthombinga nokwi idhimbulutha omithigululwakalo, mokudhana iinyandwa nokuhokolola iitewo niiyimbo yomuthigululwakalo.

LEAVE A REPLY

Please enter your comment!
Please enter your name here