Aakankolo oya pumbwa oondama dhomeya

0
110

Maria Namupala

OMUNDA-Oshikandjohogololo Okankolo osho shimwe shomiikandjohogololo mOshikoto tayi monithwa iihuna kenota.
Omasiku ga piti Kundana okwali a mono ompito okutalela po omikunda dhimwe moshikandjohogololo shoka, moka aakalimo oyendji ya holola taya mono iihuna molwompumbwe yomeya.

Kundana okwa kundathana na mwene gomukunda Omutwewomhedi, Paulus Kwooko, ngoka petameko a holola eyeme lye, omolwenota ndyoka tali tyakaleke oshikando-hogololo konyala ashihe.

“Otu li muudhigu uunene noonkondo, oshoka enota olye tu kundukidha, ihe twali ku kuga katu wete mpoka ta pu tu zile ekwatho, olundji ngele twayi koombelewa ohatu lombwelwa kutya natu tegelele ashike .Oomvula otadhi ende owala dhu uka komeho, onkene otwa hala okuyamukulwa mbala,” Kwooko a indile.

Okwa ti enota olya kambakana omikunda Omunda, Omutwewomhedi, Onanyege, na dhilwe odhindji.
Omolwa eshongo ndika lya palamena oshikandjohogololo konyala ashihe, oya indile opo epangelo li ya yambidhidhe nokuya kwathela li ya tungile oondama nokuya pa iilongitho ya vule okufula omatale nenge oondama moka tamu pungulwa omeya pethimbo lyomuloka, opo ga longithwe uuna omvula ya sheka.

Kwooko ta ti oya tungilwa oomboola pethimbo lyonale, ashike ngaashingeyi oomboola ndhoka odha teka no ihadhi longo we. “Oomboola ndhoka otwali hatu dhi longitha otundji nolundji uuna omuntu a pumbwa omeya ihe okwe ya kwa toka oha adha ga pwamo nale, otatu hupu nuudhigu, nonande omeya ogo omwenyo,” a gwedha po.

Gumwe gomaawiliki yosenda yOmutwewomhedi, Damian Mwashindange naye okwa koleke kutya otaya hepekwa kenota unene, ta ti pethimbo ndika oyena omeya omashona ge li mokandama ka fulilwe kaakwashigwana, ashike ngoka oga luudha no itaga vulu okulongithwa nande.
Mwashindange ta ti ngele owa adha omeya ngoka ga teleka oshikulya ito hala okushi lya, molwaashoka oga toka niikulya ohayi kala nonkalo yaashi okwi idhidhimikilwa. Ta ti ngaashingeyi ohaya ende oondjila oonde okuka konga omeya hoka taga monika. Ihe hoka na ko ihaku kala omeya ga gwana uuna mwa tekwa kaantu yaali yatatu mo omwa pwa.

“Otwa hala oomboola dhetu dhi opalekwae nokulongululwa opo omukundu nguka gu kandukepo, ta ti ompumbwe nomukundu gwomeya moshikandjohogololo oya thiminike oosikola odhindji dhi ethe po okutelekela aanasikola okatete.

Otwa li woo twa nkundathana na yamwe yomaakalimo mboka ya holola ngeyi, “Yakwetu tse otwa lulilwa kenota, iimuna yetu ka yi na mpo hayi nu, olundji ohayi lala nongala omolwa ompumbwe yomeya ndjoka ya taalela oshikandjohogololo shetu, otwa hala epangelo li tu kwathe li tu etele omeya popepi tse tu vule oku ga longitha niimuna yetu yi kale yina omeya geli popepi.

Moonkundathana nOmunambelewa omukuluntu muuministeli wUunamapya omeya nomithitu mOshikoto, Steven Tuukondjele , okwa ti omashongo ngaka oye ga shi nongashingeyi oyi ipyakidhila noku etela aakwashigwana mboka omayakulo gomeya.

“Otu uvite olukeno pamwe naakwashigwana yetu nonkene oomboola ndhoka dha teka otadhi kala dha longwa noku opalekwa mbala.
Okwa tseyithile wo aakwashigwana kutya epangelo ohali faalele aantu omeya noololi dhootenga naambaka oha ya pulwa ashike ya fute ooN$ 120 dhomahooli lyo epangelo tali gwedha ko mbyoka ya hupuko.

LEAVE A REPLY

Please enter your comment!
Please enter your name here