Aalongi omuna oshindji okulonga melongo lyaanona “Nghipondoka”

0
63

Maria Namupala

ONDANGWA-Omupevi minista muuministeli wElongo Oohedhi nOmithigululwakalo Esther-Anna Nghipondoka okwa ti aalongi oyena oshindji okuninga mehwepopalo lyiizemo yaalongwa moosikola dhawo.

Nghipondoka ndhika okwedhi popi petameko lyomwedhi nguka pethimbo a popitha aalongi omathele ya za moosikola dhomoshikandjolongo Oshigambo, sha ningilwa pEkamuti mOndangwa.

Oshigongi shaalongi osha ningwa nelalakano okutala mpoka pwa endekela, nokutala shoka ya pondola po moosikola dhawo okuza ngaa sho oshilongo sha manguluka.

Nghipondoka okwa li iithanwa owina a popithe aalongi, nokuya kumika miilonga yawo.
“Aalongi one muna okulonga oshindji okukwashilipaleka kutya iizemo yaalongwa oya hwepopala, nokutala woo ngele aalongwa otaya ilongo ngaa nuudhiginini, nokutala mpoka yo taya nyengwa unene pethimbo ndika lyomashongo ogendji ga taalela oosikola dhomomikunda,” Nghipondoka ta ti.

Okwa pula aalongi ya gwanithe po iilakanenwa yawo, nokutala kutya oye eta omalunduluko moonkalamwenyo dhaanona yawo.
Okwa ti aanona otaye shi pondola owala uuna aalongi ta ye ya kwathele, nongele hasho niizemo yaalongwa mboka otayi kala ya nkundipala.

“Aalongi oya simana moshilongo ashihe, molwaashoka opo moshilongo mu kale muna aapangi na yalwe yomaithano ga yooloka, aalongi oyo haya tamekitha onkalamwenyo yomuntu kehe, nuuna kaaye po kapuna kutya oshilongo otashi yambuka po koshike,” ta gwedha po.
Nghipondoka okwa ti kakele komashongo ga yooloka ga taalela oshilongo aalongi naya kale aluhe taya gwanitha po iilonga yawo, yo taya kala yeshi kutya oyo aatungi po yonakuyiwa yaanona.

Okwa tsikileko ta kumike aalongi ya simaneke iilonga yawo, yo taya kala aluhe nokugandja iiholelwa iiwanawa kaalongwa, nokuya putudhila omikalo.

Ta ti ota pandula aalongi sho hayi iyutha aluhe kethimbo nokugandja omapukululo kaalongwa ethimbo kehe. Moonkundathana ndhoka twa ningi nomutaleli gwelongo moshikandjolongo Oshigambo, Nicky Uugwanga okwa ti, moshikandjolongo shoka omuna oosikola 28, konima sho yimwe yomudho ya patwa omolwa omwaalu gwaanona omushona.

Iizemo yondondo onti-10 nonti-12, otayi ende tayi shongola no ine yi nyanyukilwa uule woomvula dha piti nonande Oshigambo osho sha konekwa sha kala hashi longo nawa pamuthika gopashitopolwa nopashigwana.

Okwa ti nando iizemo ya nkundipala yo itaya sholola ota ya yi komeho opo ya vule okuyi lundulula.Ta ti oyuunganeke ootundi dhomefudho nokwiitaala kutya, otayi vulu okuya ponkatu ombwaanawa ethimbo kehe, shampa ashike ayehe yi itula mo , kokutya aavali, aalongi naalongwa yoyene.

Omukuluntu gwelongo moshitopolwa Oshikoto Lameck Kafidi okwa ti oyena omukumo kutya Oshikoto otashi kala tashi shi enditha nawa melongo ngaashi sha kala moomvula dha piti, Kafidi ta ti oya ninga ondjodhi uvaneko opo ya kale ponomola yotango miizemo yondondo onti-10 no 12.

Ta ti okuna omukumo neinekelo maalongi ye kutya otaya longo opo ya kwashilipaleke kutya omunona kehe, okwa pewa oshipatululo shonkalamwenyo ye.

Okwa indile aalongi ya kale iiholelwa iiwanawa moshigwana, yo taya kala elunduluko moonkalamwenyo dhaanona noku tonatitha omeho gawo, ya mone kutya onkalamwenyo yaanona oyili momake gawo.

LEAVE A REPLY

Please enter your comment!
Please enter your name here