Amukana a pandula aalongi moseko yAndimba

0
276

Maria Namupala

OLUNO-Omukuluntu gwelongo moshitopolwa shaShana Hileni Amukana okwa kombo kombunda aalongi naanongeki moseko ya Andimba, yomoshikandjolongo Oluno.

Epandulo ndika Amukana okwe li ningi pethimbo lyegandjo lyomapapa noonzapo kaalongwa yosikola ndjoka omwedhi nguka, a ti osikola ndjoka oyo yimwe yomwaa ndhoka hadhi piti nawa nokuyambula po elongo moshitopolwa. Okwa ti okwa pandula unene aalongi sho ya ndungika aanona mboka oyo aaleli yokomongula.

“Oshiindingili shegandjo lyomapapa osha longekidhwa nelalakano lyokutala nkene osikola ye shi enditha nawa, okutala nokugandja olupandu kwaamboka yeshi ilongela osho wo okukumika mboka inaa ya longa nawa ya longe nuudhiginini, opo nayo yaka tumbalekwe monakuyiwa,” ta gwedha po ngaaka.

Okwa ti aalongwa, aalongi naavali oya pumbwa okukumikwa opo yi itule mo miinyangadhalwa yawo yosikola, yo ya kwashilipaleke kutya elongo olya tulwa monomola yotango moshilongo.

“Ondi uvite uugumbo netumba oshoka osikola ndjika oyo yimwe yomwaandhoka dha longo nuupenda nonuudhiginini, naashika omweshi ulike okupitila miizemo yomumvo gwayi. Onda hala mu kale ooshiholelwa oshiwanawa koosikola dhopuushiinda kaleni wo noku kundathana nkene ta mu humithakomeho elongo,” Amukana a indile.

Amukana okwa ti ohashi pula eitulemo lyaalongi, aavali naalongwa, opo ayihe yi ende nawa melongo, nokwa kumike aalongi naa naskola ya longe nuudhiginini.

Okwa indile aalongi ya pukulule aanaskola mpoka tashi pumbiwa. Okwa pandula oosikola ndhoka dha longa nawa ye ta indile woo ndhoka tadhi ende tadhi shongola dhi kutheko oongaku opo nadho omumvo ta guya dhiye pondondo ombwaanawa.
Omukuluntuskola puAndimba Waldeheim Shapaka okwa ti hasho shotango, taya longekidha egandjo lyomapapa, nokwati ohaye shi ningi nelalakano lyokukumika nokugandja olupandu kwaamboka ya longa nawa ngaashika eshi ilongela.

Osikola ndjika oyi na aalongi 42 naalongwa 907, mbono a ti omolweitulemo lyawo oyeshi pondola oku adha omalalakano melongo lyaanona.
Aalongi, aavali osho wo aalongwa mboka ya longa nawa oya li ya pewa omapapa, oonzapo nomagano ogendji. Okwa pandula aavali mboka ta ti oyi itula mo melongo lyaanona yawo, nolundji ohaya kala taya talele po osikola. Vatuva Rauna omulongwa mondondo 12 oye uulikwa omulongwadhingi mosikola ya Andimbwa ayihe, noku pewa omagano ogendji.

LEAVE A REPLY

Please enter your comment!
Please enter your name here