Erundu tali dhimbulukwa evalo eti 50 nomaudhano

0
41

Shipi Elago

OSHAKATI-Osikola Erundu mOshakati ehuliloshiwike ndika otayi dhimbulukwa ekalepo lyayo lyomimvo 50, tayi shi ningi okupitila momaudhano nomayinyanyudho.

Moonkundathana naKundana omukuluntusikola ta kwathele Nadine Vreede okwa holola kutya otaya ka tameka nomunyanyo gwowina kohi yoshipalanyolo Erundu 50th Anniversary Fun Walk ngoka tagu ka tamekela posasiona yomahooli yopoShali Garage mOshakati sigo opeRundu.
“Esiku ndika otwe li longekidha opo tu gongele oshimaliwa shoka sha pumbiwa okukwathela moompumbwe dhosikola unene tuu moku nawapeka omatungo gosikola ngoka itaa ga monika nawa, oshoka opayinda onkulu oya dhimeya. Onkene otatu indile aantu koombinga noombinga, aavali mboka yena uunona ha wu sikola posikola yetu opo ye ye tu tyapule pamwe oshoka otatu kala nomalanditho konima yomunyanyo,” Nadine ta ti.

Okwa ti kakele komunyanyo oya longekidha omaudhano galwe ngoka ta ga ka kala oshitopolwa shesiku, pokapale kosikola.
Okwa hiya aavali ye ye ya yambidhidhe oyana nokutala nkene mbaka ta ye shi enditha. Okwa ti oye na wo omaudhano pokati kaavali yosikola naalongisikola pErundu.

Okwa ti omunyanyo nguka ogwa longekidhwa nawa na ota gu ka kwatelwa komeho kopolisi opo ku yandwe iiponga.
Omaudhano ogo oshitopolwa shomuthigululwakalo gwosikola yawo na oha ga dhana onkandangala melongo lyokanona kehe a ti olutu lwa dheuka nawa ohalu kala lu na uuluyi tawu dhilaadhila nawa.

LEAVE A REPLY

Please enter your comment!
Please enter your name here