Moshitila Mwa Z’Ondjupa: Etungo lyotango lyongeshefa yandje pOkatana

0
149

Omuleshi, ngiika oto dhilaadhila kutya etungo lyokOkatana, olyo lya li ehala lyandje lyotango lyomalandithilo. Yina yomutango goongeshefa dhandje adhihe, oye ondunda yomwiidhi, ndjoka ya li maandja meme noya li ya tseyika nedhina: Okasitola kaandjaGweenkono, ngaashi taka monika methano.

Sho nda ka kala handi ka shingitha kOkatana, kOshikuku, kOmeege, kOniimwandi nokuAmutanga, onda ka mona kutya otashi pula ndje omazigudhe. Momumvo 1964, onda li nda tokola okutunga ositola yandje pOkatana. Onda tholoma oondhopi dhevi ngame mwene.
Onda tungilwa komusamane gwOmukwambi, ngashingeyi onakusa, ngoka wo a li ha kumbu oondunda pOniimwandi, mupyamunene edhina lye onde li dhimbwa.

Ekuma lyositola olya li lya tungwa noondhopi dhevi, omanga ondunda ya kumbithwa nomwiidhi.
Okuza mpoka ositola yandje tandi yi tula nduno oolaka dhiiti ya yalekwa nawa. Kiiti onda yaleke ko iipeleki nde yi keka nawa , yo aantu taye ya nduno okulanda. Pethimbo tandi tungu ositola yandje ndjoka yopOkatana, momumvo ngaa ngoka 1964, opo wo pethimbo nda li nda landa okahauto kandje kotangotango.

Okuza mpoka ongeshefa onda li ndi yi wete nawa lela kutya, ndjika ondjila yongeshefa ndji. Onda kwatwa kuupenda nokuulaadhi okudhiginina eithano lyuunangeshefa. Onda li ndi ikwatela ko ngame mwene koshihingitho shomangeshefelo, ano ongame mwene lelalela nda li tandi tonatele ongeshefa yandje.

Uuna tandi zi po nda, dhini okutumbula tandi ka landa iilandithomwa yandje kOndjondjo, positola onda li handi thigile po meme Gwandaafita, omukulukadhi gwomusamane Martin gaKweenda, nongele ke po, nena onda li ndi na owala okukala nde edhila po. Ondando oya kala tayi ende nawa lela, okasitola taka landitha niilandithomwa oya ningi mo oyindji, okasitola e taka thinana ishewe.
Sho nda dhimbulula kutya okasitola hano oka ninga okashona, po pethimbo ndiyaka Oshakati otashi tameke okutungwa, onda kutha okahauto kandje, noku ka tuta iitandu yoondhopi, mbyoka ya li ye ekelwahi kaaniilonga sho ya li yi ipyakidhila nokutunga olukanda lwaShakati.

Kehe esiku okahauto kandje otaka tutu nokufala iitandu mbyoka yoondhopi kOkatana.
Okuza mpoka ngame otandi tungu po okasitola okanene ke vule hoka kotango, ka tulwa iipeleki ano ka tungwa owala niitandu, ngame noku ka kolonga. Shampa to tala etungo ndyoka nena, olya fa owala ndyoka inaali tungwa niitandu.Ekuma onde li tungitha okaalaka ongomunoko oshoka okaalaka ihaka tende.

Omunoko ngoka nda tungitha nagwo, inamu ya osamende nandenande, okaalaka ashike. Oshiholelwa, oongulu adhihe dhaKatana odha tungithwa owala nokaalaka.

Okaalaka oka li ken a ombiliha ethimbo ndiyaka, nook ka li haka tungithwa. Osamende oya li owala hayi tungithwa pomakende, osho wo okukolonga olupanda.

Iitandu inandi yi landa nandenande. Onda li tandi tungu ashike ngame tandi indile, ko otaku ti owala: ‘ Omatandu kutha po.”Omatandu oga li taga kuthwa po taga ekelwahi kiiyagaya. Ngame onda li wo handi yi nokelambo hoka ga li haga ekelwahi. Aantu yamwe aanyenge nohaya ekelehi noondhopi ndhoka oombwaanawa. Dhimwe odha teka owala koondungu. Oondhopi ndhoka dhaa shi iitandu odho dha tungitha mookolonela, omanga iitandu ya tungithwa omikweyo.

Onda koneke nokwiilonga kutya, uuna etungo kehe lya tungwa niitandu konyala ohali kala lya kola.

LEAVE A REPLY

Please enter your comment!
Please enter your name here