Omithigululwakalo odha simana-Muulila

0
261

Maria Namupala

ELOMBE-Omunambelewa gomithigululwakalo moshitopolwa Oshikoto Aina Paulina Muulila, okwa ti omithigululwakalo odho omidhi hoka aantu ya yooloka moshilongo yi ikankamekela.

Muulila okwa popi ndhika oshiwike sha yi pethimbo lyetalele po lye koosikola dhomoshitopolwa, omolwa edhimbuluko netyapulo lyoshiwike shuuthiga wopashigwana. Aanambelewa yomithigululwakalo moshitopolwa oyali ya talelepo oosikola nokupopitha aalongwa, aavali naalongi.

“Ombelewa yetu oyu uvite etumba sho twa mono ompito opo tu ndjandjukunune omithigululwakalo nesimano lyadho, shika otashi tu dhimbulukitha onakuziwa sho she eta wo puuyelele kutya atuhe otuna oshinakugwanithwa shokukalekapo, oku humitha komeho nokutaambathana omithigululwakalo dhoshilongo shetu,” Muulila tati.

Omunambelewa okwa endulula okatendo okati 19 mekotampango lyoshilongo hoka ta kati, omuntu kehe okuna uuthemba wokutyapula, oku ulika noku yambulapo eitaalo, osho wo kutya uuthemba wa gamenwa kontompolwa ndjoka waa ha piyaganeke nenge omauthemba gaantu yalwe.
Okwa ti omithigululwakalo odho omikalo nuuthiga mbono wa thigululwa kaakulu yonale, no tadhi kalekwa po omolwa uuwanawa womapipi ta ge ya, shino ta ti osha hala kutya uuthiga mboka owuna oku taambathanwa, wo tawu kalekwa po.

“Sho tatu dhimbulukwa oshiwike shika shuuthiga natu tseye kutya oohedhi odha topolwa miitopolwa iyali ndhoka hadhi gumwa ngaashi omiti, iihongomwa, iizalomwa, iilikolomwa na yilwe, naa ndhoka ihaa dhi gumwa ngaashi iiyimbo, iipopiwa mayele, omahokololo, iidhila
yoshigwana na yilwe oyindji,” ta gwedhapo.

Muulila ta ti aanona oya pumbwa okuputudhilwa omithigululwakalo noohedhi molwaashoka odho omidhi hoka aantu muuyuni ya kankamena.
Tati aanona oya pumbwa okuyelithilwa kutya omithigululwakalo odha simana molwaashoka ohadhi holola uukwatya womuntu kutya oye lye.Shika okwa ti otashi pitile melaka ndyoka ta popi, iizalomwa nomaihumbato, naashino ota ti osha pumbiwa moonkalamwenyo yomuntu kehe.

“Omithigululwakalo otadhi humitha komeho onkalamwenyo paliko okupitila muungomba, ongele okuhonga, okutunga, okwiimba, okudhana na yilwe. Odho epaya ndyoka tali mangele kumwe omuntu nomuntu, iilando niilando, iigwana niigwana nosho wo uuyuni auhe. Oku uvako omithigululwakalo dhetu nodha yakwetu ota ku tu kwatha oku keelela uukwamuhoko nuutondwe mokati ketu,” ta tsikileko ngaaka.

Muulila okwa kumike aavali ya kale haya hungile naanona momagumbo molwashoka elongo lyopetameko ohali tameke megumbo. Okwe ya kumik , ya kale taya tyapula noku kutha ombinga miituthi yopamuthigululwakalo ngaashi oshipe, iidhano yoongombe, iiyugo oshowo okulesha omambo gopandjokonona.

Okwa ti okukalekapo nokungushupaleka, nokusila oshimpwiyu, nokudhi uvako muule wadho, osho oshinakugwanithwa shomuntu kehe.

LEAVE A REPLY

Please enter your comment!
Please enter your name here