Omutamanekwa mekwatonkonga ibooloha mo

0
671

Maria Namupala

ONDANGWA-Omukokele gomimvo 63 ta tamanekelwa ekwato nkonga lyomutekulu gomimvo 13 momukunda Okapuku moshitopolwa Oshikoto, okwi ibooloha mo mondholongo.

Frans Ndalengelwe okwa mangelwepo kopolisi muMai nuumvo sho kwa lopotwa anuwa a kala ta lala nokatekulu ke shaali pahalo lya ko.
Okwa li a holoka mompangu ya mangestrata gwOndangwa olwindji, ashike kali ta vulu okupewa ompito yokwiifutilamo, molwaashoka opolisi oya kala yi ipyakidhila nomakonakono ngoka ga manithwa ngashingeyi.

Molwaashoka petameko sho a holoka mompangu lwotango okwa li a fatululilwa uuthemba we, okwa li a tseyithilwa a tulemo eindilo lye lyobooloha, na mangestrata mompangu yaNdangwa, Peter Nangula, okwa pula omufekelwa a fute obooloha yooN$700, ye a kale pondje yondholongo.

Otaku hokololwa okanona hoka ka kwatwa koonkondo okatekulu komutamanekwa, ka valwa komwana gomumati, no ke li mondondo ontihamano. Pahokololo, omufekelwa okwa ponokele okatekulu anuwa nokuka hula iikutu yako noku lala nako koonkondo eshi ningile mepya.
Nonande omufekelwa a mangululwa okwa li a lombwelwa kaa kale ena ekwatathano noshihakanwa she, osho wo iiyageke okuhedha popepi naangoka a tula mo oshipotha.

Ta londodhwa iiyageke okuyona nenge okulonga iimbuluma mwa kwatelwa naambyoka ta tamanekelwa, ye ina kala inaa holoka kompangu esiku ndyoka a tseyithilwa koveta, nongele opuna uupyakadhi itaa vulu okuholoka na kale a tseyithila ohofa mbala, ko ku talike shoka tashi vulu okuningwa po.

Oshipotha she oshuundulilwa 20 Desemba nuumvo, nota kala kondje yondholongo.
Omukonakoni nomukwatakanithi koshikondo shoku keelela iimbuluma mopolisi mOshikoto Naomi Katjiua, okwa yelitha kutya moshitopolwa otamu lopotwa unene omakwatonkonga taga londo ethimbo kehe. Okwa ti iihakanwa yonkalo ndjika oyo unene aanona yoomvula dhopevi, mboka ha ya yi koosikola, a ti shika osha tula oonkalamwenyo dhawo moshiponga, unene ngele ta ya zi nenge ta ya yi komanongelo gawo.

LEAVE A REPLY

Please enter your comment!
Please enter your name here