Uudhano wokutondoka waShikongo wotango

0
41

Omutoolinkundana

Windhoek-Oshali shotango Olyomakaya ga piti sho aantu 26 ya li ya tseya nkene hashi kala uuna omumatuki ena uulema womeho ha matuka kutya omarathon nenge omuudhano waa nuulema mboka hawu ithanwa paralympic. Gumwe gwaadhani ye na uulema oAnanias Shikongo ngoka a hiya oshigwana opo shi itule moongaku dhe ngele tashi ya pokumatuka. Aakuthimbinga mbaka okuyeleka naShikongo ohaya monoko na oya li ya mangwa komeho noku pewa aakwati keti opo ihe okwa tiwa naya matuke oshinano shoometa 100 ngaashi ashike Shikongo he shi ningi ta thigathana po nooyakwawo pomuthika gwopaigwana.

Aakuthimbinga methigathano ndika oya kwatela mo oospana dha za komahangano ngaashi NamPower, PWC, oshiketha shoMotor Vehicle Accident Fund, De-bushing Advisory Services, Business and Intellectual Property Authority, NamClear osho wo aawiliki yomaliko yoBFS. Omagumbo gamwe nago oga li wo ga kutha ombinga methigathano ndika.

Oospana hetatu odho dha kutha ombinga tango methigathano lyoongundu nokonima odha yi kethigathano lyahugunina. Ospana yaNampower oyo ya longo nawa noku sindana oombandi dhoshingoli nekopi hali yugathanwa. Ospana yoBFS Fund Manager oyo ye ya pehala etiyali omanga efamili lyaandja Uusiku lye ya pehala etitatu.

Oshiningwanima shika osha longekidhwa pokati kehangano lyaShikongo lyedhina, Sport on the Move Foundation, nehangano lyoBFS Fund Manager. Uudhano owa li nelalakano lyokugongelela oshiketha shika iimaliwa. Osha li wo nelalakano okukonga eyambidhidho lyaakwashigwana kaadhani ye na uulema moNamibia. Ehangano olya pumbwa eyambidhidho lyoshigwana opo aadhani mbaka ya vule okukwathelwa uuna yo taya ka kutha ombinga momaudhano opo ya adhe oondjodhi dhawo.

“Pethimbo lyongula otwa kala tatu longo aakuthimbinga nkene tse aanuulema hatu kutha ombinga. Konima yedheulo oospana odha li dha ka tula miilonga shoka dha longwa. Ku tse okudhana nokuthigathana moludhi nduka otwe ku igilila, ihe ngele ngoye owuna omeho nowu wete mpoka to lyata uuna to matuka, kungoye otatu ti oshinama omuntu wa li we shi inekela” Shikongo a ti.

Ethigathano olya li oku ulukila oshigwana nkene shi li muuyuni womaudhano gaanuulema, opo ye ya uvithe ko, kombinga ya nkene aamatuki aanuulema haya longo.Iimaliwa ayihe mbyoka ya futwa pomweelo osho wo mbyoka yi ishangithwa koospana, otayi tulwa moshiketha shoka, opo shika shi vule oku adha omalalakano gasho oku kwatha aadhani mboka opo taa ya tameke omaithano muudhano. Oshoka ngele ando mbaka okwa li inaa ya pewa ompito ndjika nena andola mbaka otashi vulika ya kale inaa ya mona oompito ndhika.
Ehangano ndika olyo omunona gwaShikongo okukwatha aanuulema moNamibia ya vule oku adha omalalakano gawo.

“Ongo etameko , tse otwa hala okukwatha aanuulema aaNamibia mboka ye na iitalendi nohokwe nelalakano, ndele ka ye na oshimaliwa ya vule okuhumitha ko iitalendi yawo mbika. Ngame muudhigu noluhepo ndoka omo nda pita opo ndi vule okukutha ombinga” osho a ti.
Shikongo ota popi lela okuza kontseyo ta popi shoka eshi paumwene.Unene tuu sho ye a kanitha omeho ge pethimbo lyuunona, na okwa li ena okupita muupyakadhi uunene okuninga enyakwa lyopombanda muuyuni ongo omudhani ena uulema.

“Naandika olyo etompelo nda hala okukwatha yalwe, opo kaaya ende mondjila ondhigu moka ngame nda enda. Onda hala okupupaleka ondjila yaamboka taya landula ndje. Opo ndi adhe shika onda toto po ehangano ndika okusoshimpwiyu kutya, omuNamibia kehe okuna ompito opo ya humithe komeho iitalendi yawo okuza pomimvo dhawo dhuugundjuka kutya nee okuna uulema wa fa peni” osho a ti.

Oondjodhi dhaShikongo kombinga yehangano ina yi ngambekelwa ashike kaadhani aanuulema ndele ndika otali lalakanene oku kwatha ayehe mboka ya hala oku adha oondjodhi dhawo ndele ka ye na oshimaliwa okushi ninga. “Okuya kokule elalakano lyetu olyo okukwatha aadhani ayehe aanuulema nosho wo mboka yaana uulema oku adha oondjodhi dhawo. Shikongo okwa fatulula kutya eshongo limwe moNamibia oondika kutya omaudhano agehe gopathigathano ohaga ningilwa ashike miilando iinene. “Ndele nee otuna aadhani aagundjuka ye na iitalendi taya adhika momikunda Ooyendji yomuyo otaya nana nuudhigu okukala niikulya ya gwana, okufuta osheenditho osho wo ehala lyokulala uuna ta ye ya komathigathano.Omolwa shika iitalendi yawo ohayi kala inaa yi humithwa komeho na itaya vulu we oku adha omuthika gwopombanda gwokudhana noku eta iitalendi yawo pombanda. Noshiketha shika, tse otwa hala okusoshimpwiyu kutya shika itashi ningwa nando”

Pahapu dha Kauna Ndilula, omuwiliki omukuluntu gwoBusiness Financial Solutions (BFS) Fund Manager, okwa ti etokolo lyawo oku yambidhidha ehangano ndika olya zi moku kuminwa iilonga yalyo osho wo ehalo lyetu okukwatha oku eta po eyooloko moonkalamwenyo dhaaNamibia.

“Shikongo oye ependa lya Namibia pamikalo odhindji” osho a fatulula. “Ye omulumentu ngoka a sindi uulema wokolutu na ishewe omathimbo gamwe okwa kala keehena oshimaliwa oku za kegumbo okuya kokapale kuudhano. Ihe nando ongaaka , ye okwe shi pondola oku eta ombandi yoshingoli okuza kuudhano woParalympics naashika osha tumbalekitha Namibia. Ngashingeyi okwa hala okukwatha yalwe. Otatu simaneke ondjodhi ndjika osho wo elalakano lyokwaa ihole mwene ndika. Shika osho sha hili BFS Fund Manager opo a thikame popepi na Shikongo osho wo nehangano lye opo tu gandje shoka tu na okumona kutya omalalakano ngaka oga adhika”

“Otu shi uupyakadhi moka aantu ye na uulema haya piti. Oshikwawo oshoshili kutya mbaka omathimbo gamwe ihaya mono wo iilonga onkene oye na okuhumbata omutenge omudhigu gokwaahena oshimaliwa. Poompito odhindji oye na wo uudhigu oku imonena iipumbiwa yesiku kehe opo ya vule okuhupa,” Ndilula a ti.

LEAVE A REPLY

Please enter your comment!
Please enter your name here