Aantu ya geela oshinyolwa tashi tanga uukoloni

0
249

Omathimbo ga piti oshinyolwa shopaunasikola tashi ti kutya uukoloni owu na uuwanawa, osha eta ongeyo naashika osha fala meshaino lyomushangwa kaantu 10, 000 tagu indile shi dhimwe mo moshifo moka shali sha shangwa.

Oshinyolwa kohi yoshipalanyolo ‘Oshinima shUukoloni’ osha holoka moshifo hashi ithanwa Third World Quarterly sha nyolwa komuprofessori Bruce Gilley, omukwatheli professori montseyo yopolitika moYunivesiti yepangelo yaPortland , moUSA.
Gilley ota ti uukoloni owali nawa na owali wuli paveta okushitalela ku yemwene” momahala agehe ngoka gali muukoloni. Shoka sha uvitha nayi aantu oyendji oosho a indile kutya uukoloni nawu galulwe. Okwa gandja omatompelo gatatu kutya omolwashike a hala aakolonyeki ya galukile miikolonyekwa longo yawo nale muAfrica, muAsia. Miilongo mbika aakolonyeki aa Britain, Portuguese,
Italian, German, Spanish naaFrench oya li ya thipi aakalimo ombinzi.

“Iilongo mbyoka ya papatele uukoloni nuuthiga wawo oya yi hwepo komeho okuyeleka naambyoka ya tindi noku ikaleka kokule nuukoloni.
Uukoloni otawu vulu okutaambwa kiikolonyekwa longo nale pethimbo ndika okupitila momukalo gokupangela, mokukolonyekulula iitopolwa yimwe nenge okushita po ookoloni oompe dhaa uninginino okuza petameko” omuprofessori osho a nyola.

Oshiwike shayi iilyo oyindji yewilikongundu lyoshifo shika oya thigi po iilonga, ye, omushangi gwoshinyolwa shika okwa gandja ombili omolwa “uuwehame nongeyo ndjoka shika sha holola po.

Omuprofessori nguka keli awike medhiladhilo ndika.Opena aaEuropa yalwe nayo taya lili molwashoka iilongo yawo kaa yi na we ookoloni muAfrika nenge muAsia. Utya epekapeko mo 2014 olya mono kutya ooperesenda 59 dhaakwashigwana yaBritania odhi uvite nayi sho oshilongo shawo sha kanitha ookoloni dhasho muuyuni iilongo ngaashi Zimbabwe, Kenya, India, niikwawo oyindji ya manguluka ngashingeyi.Aabritania oyendji oya ti oya li haya kala yu uvite uugumbo kombinga yookoloni dhawo nokutya uunene wiikolonyekwa longo owa li hawu ya uvititha uuntsa.

Aa Europa, nenge aaBritishi oya fa ya dhimbwa kutya momumvo 1921, sho uupiyapiki waBritishi wali pombanda , owa li wa ninga aantu oomilliona 412 aapika, mboka yali ya kalela po konyala ooperesenda 23 dhaakuuyuni pethimbo ndiyaka naambaka oya li yeli moshitopolwa shuunene wooperesenda 24 dhuuyuni.Aapika oya li aantu ya za miilongo 16 muAfrika yooNamibia, Zimbabwe, Botswana, South Africa, Lesotho, Swaziland, Zambia, Tanganyika (Tanzania nena), oshitopolwa shaCameroon, shaTogo, Ghana, na Kenya. Kakele kaAfrica mbaka oya li wo ya kolonyeke India niilongo yilwe moAsia.

Uupangeli waBritishi owa li uunene ngaaka kutya owali wa lukwa uupangeli moka etango ihaali ningine, shoka tashi ulike kutya pethimbo kehe etango olyali liwetike mokoloni yimwe yaBritania , oshoka ndhika odha li dha kwata konyala iitopolwa oyindji yuuyuni.

Ongo okoloni onene yomukolonyeki omunene, India okwa li a mono iihuna pethimbo lyuukoloni. India oha ulikwa ongo oshiholelwa kaagameni yuukoloni anuwa oye eli esindano lyekolonyeko.

Oondjila dholutenda moIndia ohadhi tangwa anuwa molwa uukoloni waBritania, ihe sha simana okundhindhilika kutya oondjila dholutenda odha tungilwe oku enditha aakwiita aakolonyeki opo ya thindile kongudhi aantu mboka ya li ta yi ikanyuna uupika miitopolwa yomeni lyaIndia. Olutenda olwa li wo lwa tungwa opo lu longithwe okututamo iinima okuza komahala omayamba okuyi fala komatuliloskepa opo mbyoka yi falwe koEuropa, shika oshali hashi ningwa nuuna ndoka ku na ondjala.

Pethimbo lyoondjala dhopomimvo 1876 – 1879 no 1896 – 1902, konyala aantu pokati koomilliona 12 sigo 30 aaIndia oya si kondjala. Momumvo 1943 omwali ondjala hayi ithanwa yaBengal yomo 1943’ ndjoka oyo ya li ya hugunina ye etwa po kaaBritish ndjika oya li le po konyala oomwenyo dhaantu oomilliona ndatu. Sho omuwiliki gwaBritain omuPrima Minista Winston Churchill a li a pulwa kutya omolwashike ta tumu iikulya pondje okuza moBengal manga aantu ya mo taya si kondjala, okwa li a ti, aaIndia oyo ye na okwi ipa oombedhi yoyene kombinga yeso oshoka ohaya vala ya fa uulimba.

Kohi yuukoloni, oshigwana shomoKongo osha shonopala nomwaalu gwaantu okuza poomilliona ndatu sigo opoomilliona 13 pokati komimvo 1885 no1908 omolwa omavu, iilonga yuupika nuudhudhu wepangelo lyuukoloni.

Uukoloni owa thigila iilongo mbyoka iiyadhi ihaa yi dhimi po, nokwaamboka ye na ohokwe kombinga yuuwanawa waantu mbaka oya pumbwa tango okuzimina oshinima shika kutya uukoloni itawu vulu okupopilwa na owa yonagula oonkalamwenyo dhaantu oyendji shaampoka mbuka wali. ● Oolopota dha gwedhwa po ku: Joseph McQuande goshifo ,Conversation.

LEAVE A REPLY

Please enter your comment!
Please enter your name here