Bulelo a londodha Nuuyoma

0
178

Shipi Elago

ONDANGWA-Omudhengingonyo a tseyika nawa moNooli, Hedison Nghipondoka nenge Bulelo okwa tokola okushuna mondambo na Nuuyoma December, ngoka a kala ethimbo ele ta kondjitha opo ya shune mondambo konima sho ya li ya kondjithathana kuyele nuumvo na Nuuyoma okwa li a dhengwa noonkondo. Pethimbo Buleloa a kundathana niikundaneki oshiwike shayi, okwa li a takele Nuuyoma a ti ngele oya tsakanene ishewe, ye ita ka thiga emanya lya londa kekwawo na ote ke mu dhenga yimwe noomiiyagaya.

“Lombweleni, Nuuyoma kutya ngame kandi shi okatana na ita ndi ke mu etela nando ohenda mokapale ashike nakale iilongekidha okwi itoola pevi, otandi ti ngele medhingoloko lyotango netiyali okwa piti mo oku na elago otandi ke mu pa shoka ta kongo,” Bulelo a londodha omukondjithi gwe.

Mbaka yaali otaya ka paathana uuhandja, muudhano mboka wa tengenekwa tawu ka kala ko petameko lyomwedhi nguka ta ya kondjele kohi yehangano lyaKilimanjaro boxing nuudhano mbuka owa kwashilipalekwa komunangeshefa Armas Amukwiyu. Uudhano mboka wa tengenekwa wu ka kale poshinyanga shOndangwa Trade Fair owa tegelelwa wu ka kale uunene moNooli moka Michael Benhard na Feleciano Danny Boy taya ka pa wo aatali uudhano uuwanawa womadhingoloko 10, omanga uudhano uukwawo oomboka tawu ka kala pokati kaNatanael Shimpanda na Festus Matias. Ongulohi ndjoka aatali otaya ka nyanyudhwa wo kolugodhi pokati ka Jason Immanuel na Sam Sam, omanga Paulus Ileka ta ka kwata Petrus Gustav. Oonkambadhala okukonga Nuuyoma December odha li dha hulile muunyengwi oshoka ka li ta kutha po ongodhi ye nando otwa li lela tuna enota oku uva kutya ye ota ti ko ngiini komipopyo dha Bulelo.

Nando mbaka otaya mbandamekathana, sha simana ouuna mbaka ya kaya mokapale oshoka olugodhi nduka olwa tegelelwa lu kale lwa kindja.

LEAVE A REPLY

Please enter your comment!
Please enter your name here