Ehulilo shiwike aalongi ya dhiladhile onakuziwa

0
87

Aalongi naya longithe ehuliloshiwike ndika okutala kombinga yeithano lyawo alikana. Itatu indile shika molwashoka andola aanongeki tu wete itaa ya longo nawa nonuudhignini. Aawe aalongi otaya longo tagu pumo, ethimbo limwe monkalo ondhigu nosho wo ondjambi tayi sitha ondjala.

Ihe oshoshili wo kutya omuthika gwelongo miitopolwa yimwe oguli nawa okuyeleka niitopolwa iikwawo.Omolwashike shi li ngeyi? Aalongi miitopolwa mbyoka tayi longo nawa naya tale nkene taya kwatha oosikola ndhoka tadhi ndopa, oku ilonga kwaandhoka hadhi piti nawa ya tseye iiholekwa yokulonga.

Aalongi naya ipule kutya omolwashike oosikola miitopolwa yimwe tadhi longo hwepo omanga dhilwe miitopolwa iikwawo itaadhi longo nawa. Naya paathane omayele.

Aalongi naya longithe wo ehulilo shiwike ndyoka okuya pamwe nokufala komeho omathaneko gopashigwana kiipambele yelongo. Yo oyo yeli komeho gelongo. Onkene osha yela kutya otaya vulu okupa epangelo omayele noshigwana ashihe: kwaashoka shi na okuningwa moshilongo okupa aanona yetu onakuyiwa yili hwepo. Ndele onakuyiwa yini yo ta yi ikongele pomimvo dhini nokoshimaliwa shi thike peni. Unene tuu sho aanona mboka taya nyengwa natango okukala yi ilongekidha okuya koyunivesiti nenge iiputudhilo yopombanda uuna ya zi moosikola dhooseko.?

Nonando oshikondo shelongo ohashi pewa oshimaliwa oshindji mobudgeta yoshilongo natango oshafa tuna iilonga oyindji okulonga. Aalongi otaya vulu oku tu lombwela kutya otatu longitha iimaliwa oyindji inaashi pumbiwa mpaka na openi iimaliwa ya pumbiwa okulongithwa mpoka pwa simana.

Kehe gumwe okuna sha okupopya kombinga yelongo, ihe osho ethimbo ngashingeyi okupa aalongi ompito, oyo ya tye ko sha omanga oshigwana sha pulakena shoka yo taya thaneke sha pumbwa okuningwa nokulandulwa. Okutala mpoka omulandu, aakuluntu, aalongi, aatonateli, aalongwa noshigwana ya shuna monima sigo oompoka sho iizemo tayi ulike okwaa huma komeho miilonga yelongo omimvo ntano nenge omulongo dha ziko.

Olyo ngiika ethimbo oshigwana sha pumbwa okutala komanongelo ngoka haga longo nawa moshilongo nokumona kutya oshike tashi longo nawa. Oosikola ndhoka dha shuna monima odhina okutala kutya oshike she dhi fala monima na oonkatu dhini tadhi longitha oku galuka mo mondjila ndjoka ya puka noku ya mondjila yu uka?

LEAVE A REPLY

Please enter your comment!
Please enter your name here