Jomolizo a popi kombinga yo albuma ye

0
657

Pinehas Nakaziko

WINDHOEK-Omwiimbi gwoongalo dhoAfro-pop, Halweendo Moses a tseyika nawa moongalo nedhina Jomolizo okwa popi kombinga yomalongekidho goalbuma ye ompe.

Jomolizo ngoka a kala noku shi enditha nawa noalbuma ye yotango ndjoka ya dhana onkandangala konyala monooli ayihe okwa ti omalongekidho gokutseyitha oalbuma ye ompe otaga humu nawa komeho.

Moonkundathana naKundana oshiwike sha yi Jomolizo okwa londodha kutya nuumvo ota pu ka tya pwaka, oshoka aaholi yoongalo dhe okwe ya longekidhila oshindji, mwa kwatelwa oalbuma ye ndjoka ontiyali tayi ka kala ya dhenga mbanda yedhina Epata Lange. Okwa ti elalakano lyokuluka oalbuma ndjika edhina ndyoka okugandja olupandu kaaholi yoongalo dhe, na kehe ngoka ali emu kwathele okuza sho a li a tameke okunduluka oongalo dhe. Okwa tseyitha ishewe kutya ndjika oalbuma ndjoka tayi ka kala ya dhenga mbanda, no tayi ka etelela ehwata lyoongalo 14 dhoAfro-pop, oombwaanawa noonkondo adhihe. Oalbuma otayi ka kala ishewe yili pamuthika gwopombanda, sha landula yotango ndjoka yali ya hokiwa kaapulakeni oyendji.

Nonando kapena natango okangalo kapita hoka taka ka kala moalbuma muka, onga ehwahwameko lyaashoka sha tegelelwa, Jomolizo okwa ti aaholi yoongalo dhe naya tegele owala omwedhi nguka, moka omo tamu ka pitithwa oalbuma, opo ya ka mone uutoye nomayinyanyudho ga kwata miiti goalbuma ndjika. Moalbuma muka otamu ka adhika oongalo ngaashi Epatalange, Kumininenge, ndjoka tayi ti yambidhidha ndje ta kwathelwa kuShitana, Kooleni, ta kwathelwa kuTequila. “Ndjika oyo oalbuma nda kwathelwa kaaningi miikwelengendjo oyendji ngaashi Glo, Arafat nangaye mwene, no yi li pomuthika gwopombanda yi vulithe oalbuma yotango, oshoka ka nda li ndina ekwatho lyagwana,” Jomolizo ta ti ngaaka. Okangalo keEpata lange ota ka thaanekwa okavidio omwedhi ta gu ya moSouth Africa. Jomolizo okwa kala noku nyanyudha piituthi oyindji mOngwediva, mwakwatelwa omauliko giipindi gAngwediva, moka ali a nyanyudha oyendji. Omvula ndjika okwali ishewe a uvathana na Ndjodic Dragan, sho ali a shaina nehangano lyoAntonio’s Arts, ndyoka lyokuhumitha aahikingalo, unene mboka aashona komeho. Jomolizo omuhikingalo ngoka a li a tseyika noalubuma ye yotango muAguste omvula ya zi ko yedhina Kaandjetu. Okwa li a tameke noongalo mo2009, moka ali ha ningi omikwelengendje dhaahikingalo aashona. Mo 2010 okwa li a kambadhala opo a tameke oku imba, nokwali a imbi ongalo ye yotango yedhina Sisiwami, moka ali kumagidhwa komumwayina kadhona opo i itule moongalo, oshoka oku na ewi ewanawa. Nokuza mpoka okwa kala noku ilongekidhila oalbuma ye, ndjoka a pititha mo2015.

LEAVE A REPLY

Please enter your comment!
Please enter your name here