Old Mutual ta tsikile nokukwathela omaudhano Katoma

0
26

Shipi Elago

Omunambelewa mehangano lya Old Mutual Ndangi Katoma okwa gandja ekwashilipaleko koosikola kutya ehangan lyawo otali tsikile no ku gandja moshigwana ooshindji shoka hali mono. Shika otali shi ningi mokuyambula po omaudhano moosikola.
Katoma ndhika okwe dhi popile pethigathano lyokomumvo lyaOld Mutual Far North ndyoka lya li lya ningilwa mOshakati ehuliloshiwike lya yi.

Okwa ti konima sho Old Mutual a li a totopo ethigathano ndika mo 2004 okwa longitha nale omamiliona gooN$3,2 mwa kwatelwa oshipandi shooN$ 500 000 shethigathano lyo 2017. Na otaya tsikile okuyambidhidha omaudhano oshoka oshi li oshitopolwa sha yimwe yomiinakugwanithwa yawo yo momidhingoloko ndhoka haya ngeshefele.

“Uukalinawa womalutu getu owu li esipa lyombunda lyonakuyiwa yetu onkene otuuvite kutya ngele uunona otawu kutha ombinga momaudhano nena otawu tungu po omalutu gawo nawa pa ma dhewo shoka tashi kwathele mekoko lyomadhilaadhilo, oshoka otu shishi nawa kutya olutu halu ningi omadhewo ohalu kala lu na omadhilaadhilo ga ndjanga,” Katoma ta ti. Iitopolwa yokoNooli ine oya li ya yi mondambo Olyomakaya ga yi oku tala ngele genongo otaga fe gongombe, ngaashi shi li omukalondjigilile mekopi ndika kehe oshitopolwa osha li sha tumu oosipana dhi li mbali yimwe oyetanga lyokoompadhi no yetanga lyomokambamba.

Osekundo sikola yEkulo ndjoka ya li ya kalele po Oshikoto oyo ya li ya sindana po ekopi lyuudhano wokatanga kokoompadhi konima sho ya li ya dhenge mo Dr Abraham Iiyambo Secondary School medhingoloko lyahugunina ndyoka lya li lya dhanwa komatango gOlyomakaya ga zi ko mokapale kaShakati. Ekulo olya li lya dhengemo Dr Abraham Iiyambo 2-1 noku sindana po olweetho olu 13 lwekopi ndika lya li lya dhanwa lwotango mo 2004.

Ekulo olya li lya kutha po ekopi ndyoka lya li lya thindikilwa kokapandi ko N$ 5 000 oombandi dhoshingoli, eshina lyokwi indjipaleka oombapila, iilongitho yomaudhano, nosho wo iizalomwa yetanga yi na omushangelo gwa Old Mutual.

Dr Abraham Iiyambo okwa li ena ashike okukutha po ehala etiyali konima sho a li a hunutha ompito yo ku sindana po ekopi na okwa li a toolapo oombandi dhoshisiliveli dha tentekwa okapandi ko N$ 3 000, iilongitho yomaudhano, nosho wo iizalomwa yomaudhano yaOld Mutual.

Ehala etitatu olya li lya kuthwa po kosikola yopombanda yaRuacana ndjoka ya li ya hekelekwa nooN$ 2 000, ye Iipumbu teya pehala a pewa e ki ithete omahodhi no N$ 1 000.

Gabriel Taapopi, okwa li uulike kutya natango okuna oonkondo konima sho a li a dhengwa mo muudhano wonetball omvula yazako, nuumvo okwa li eya nonyambi na okwa li a sindana po ekopi ndika moku dhenga oseko yUukule 35-11 no ku ninga enyakwa lyuudhano mbuka. Oosipana dhoNetball nadho odha li dha pewa oondjambi dha faathana naandhoka dhokatanga kokoompadhi.

Ethigathano ndika oha li tameke miikandjolongo ayihe miitopolwa yokoNooli, omusindani gwoshikandjolongo taka kwatathana naasindani yiikandjolongo okutala ngoka ta ka kalela po oshikandjolongo muudhano wokatanga kokoompadhi naahoka komokambamba.

LEAVE A REPLY

Please enter your comment!
Please enter your name here