Namibia enyakwa lyuudhano waEUNIC

0
33

Omutoolinkundana

Windhoek-Ospana yaadhanitanga kohi yomimvo 15 yomoConcordia College moWindhoek oyo ya pewa epapa lyuunyakwa wuudhano hawu ithanwa EUNIC. Uudhano mbuka owa dhanenwa penongelo lyOpaigwana lyaWindhoek ehuliloshiwike lyayi.

Osikola ndjoka ya li ya kalela po Namibia oya dhenge ndjoka ya kalela po Ndowishi nokoola yimwe monola muudhano wali uuwanawa.
Ndowishi okwa li a kalelwa po kospana yokosikola yoWindhoek High School, omanga ospana ndjoka ye ya pehala etitatu oondjoka ya Portugal ya kalelwapo kospana ya Jakob Marengo.

Muudhano wo petameko Ndowishi okwa dhenge Portugal 3-2 koopenalti konima sho oospana ndhika, dhali dhi ithigi othika yimwe muyimwe mokapale. Portugal oye a kutha po ehala etitatu sho a dhenge mo Spain nokoola yimwe ayike tii.

Uudhano waagundjuka mbuka taku hokololwa we enda nawa owa li wa dhanwa kohi yotema ‘Aagundjuka hanganeni moonkambadhala dhokuhumitha komeho elongelokumwe, uukumwe osho wo okudhana nawa’ omanga mbuka wa lalakanene ishewe oku eta pamwe oongundu dha yoolokathana.
Ongundu yaEUNIC moNamibia ohayi kala nuudhano mbuka omumvo kehe kohi yomikalo dhUukumwe waEuropa, mboka wa li wa dhikwa po nelalakano lyoku tunga po elongelokumwe mokati kaantu yayooloka.

“Uudhano wehuliloshiwike lyayi owa ulike kutya otuna oshindji sha faathana, aadhani ayehe aaNamibia ya za komahala ga yoolokathana pamithigululwakalo nosho tuu, mbaka yamwe ohaya popi omalaka ga yoolokathana osho wo oohedhi inaadhi faathana,” osho omuwiliki gwoshiyukithilo sha Goethe-Institut Namibia no ye wo Omuperesidente gwo EUNIC cluster Namibia, Daniel Stovesandt a ti.
“Ihe nando ongaaka ne omuli pamwe moshilongo shimwe, munombili, muli kumwe naashika osha ulike ishewe kutya ne ohamu vulu okutunga uukuume nayalwe mboka mwali mwaashi nale.”

“Shika osho sha thikamenwa po kuEuropa, moka mu na aantu inaaya faathana, ye na omalaka gi ili no gi ili nomikalo dha yoolokathana ndele otaya mwenya pamwe muukumwe mokati komayooloko,” osho omuwiliki gwoshiyukithilo sha Goethe-Institut Stovesandt a ti.

Oospana ndhika ndatu, Namibia, Ndowishi na Portugala odha pewa oombadni nomapandulo molupe lwolweendo loku ka londa omamanya, oku ka hinga uuhauto hau ithwana Karting, osho wo esiku lyu udha uudhano woku umba uutati. Aakuthimbinga yamwe palandulathano okuza pombanda wu uka pevi oyo, France – Jan Jonker Secondary School; Great Britain – Fidel Castro School; Finland – Marthi Ahtisaari Secondary School, European Union – St George’s Diocesan, Spain – Physically Active Namibia, ayehe oya pewa oombandi molwoonkambadhala dhawo.

Ongundu ya EUNIC yaNamibia oya thikama po moGoethe-Institute Namibia, Franco Namibia Cultural Centre, Embassy ya Finlanda, Instituto Camoes, British Council, Embassy of Portugal,na European Union Delegation moNamibia. Oshilyo kehe ohashi hogolola osikola ndjoka sha hala oku yakalela po.

LEAVE A REPLY

Please enter your comment!
Please enter your name here