Taya longo memanguluko, nokunkondopeka aalongisikola

0
37

Aalongi oyo omukanka gwa simana gwoonkondo dhoshigwana kehe –okupa aanona, aagundjuka naakuluntu uunongo opo ya adhe omalalakano gawo gu udha.

Ihe muuyuni auhe , omuna aalongisikola oyendji yaana emanguluko neyambidhidho ndyoka ya pumbwa okulonga iilonga yawo ya simana. Ndika olyo etompelo sho oshipalanyolo shesiku lyopauyuni lyaalongi tashi ti Okulonga memanguluko okunkondopeka aalongisikol,a shika otashi kolekulula nokundhindhilika omashongo ngoka aalongi haya tsakaneke miilonga yawo yopaithano muuyuni. Okukala omulongi a nkondopekwa otashi ti okukala to vulu okumona omadheulo gongushu, ondjambi yi li nawa osho wo oompito dhe eguluka dho kwi ihumithako paithano. Otashi ti wo okukala nemanguluko okuyambidhidha etunge po lyomusindalongo gwopashigwana osho wo okukala nemanguluko lyokuhogolola omikalo tadhi opalele noondjila dha pumbiwa okugandja elongo nawa lya kwatela mo ayehe lyo ishewe otali adha ayehe. Oshikwawo otashi ti okukala to vulu okulonga megameno pomathimbo gomakuyunguto gopapolitika, omalunduluko nomaipumomumwe.

Ndele miilongo oyindji, emanguluko lyaalongi nemanguluko lyuulongi otali thiminikwa nokusithwa oshimpwininika. Oshiholelwa pondondo yoprimary nosekondali miilongo yimwe omisindalongo dhakindja odho hadhi landulwa, nopwaana ekuthombinga kaalongi meetepo dhalyo. Moka aalongi inaya pewa ompito opo ando ya tule miilonga iinima mbyoka yi wetike oyo yoopalela oku uvithako omunona nenge okugwanitha po oompumbwe dhelongo dhaanona.

Emanguluko palongo lyaalongi pomuthika kehe gwelongo unene aalongi yopondondo yopombanda ogwa pumbwa eyambidhidho , opo mbaka ya vule okuya po nomadhialadhilo omape, okukonakona noku kala ye shi shoka tashi inyenge muuyuni kombinga yelongo nomikalo dhoku gandja elongo. Pomuthika gwoyunivesiti aalongi oye li miilonga kokondalaka yi na ongamba. Shika ohashi fala mokulonga omuntu kuuna egameno lyiilonga, shika otashi shonopeke ompito yomulongi okuhuma komeho mondjila yeithano lye noshikwawo otashi pe aalongi ondjundo yiilonga oyindji omanga ondjambi oshona. Ayihe mbika otayi nkundipike emanguluko lyelongo naandyoka lyongushu yelongo tali gandjwa kaalongi.

Miitopolwa ayihe yelongo ethiminiko lyopapolitika nosho wo lyopangeshefa otali simpike emanguluko lyaalongi. Aalongi taya longo noye li miilongo ya gumwa komakuyunguto nomapiyagano olundji oya taalela omashongo gokwaapulakenwa shoka taya eta po, taya tongolwa osho wo ya ngambekwa moku ninga omapekapeko osho wo okulonga.

Nuumvo otaku dhimbulukiwa omimvo 20 dhomathaneko go 1997 gaUNESCO kombinga yomuthika gwelongo lyopombanda. Ngaka oge na sha nuuthemba niinakugwanithwa yaalongi naanongeki. Agehe otaga dhenge omuthindo kemanguluko lyaalongi mokutunga uuyuni moka elongo neilongo lya faathana shoshili.

Ngaka oga kwatelamo ondjila yoku adha ethaneko etine lyIigwana Hangano ndyoka lya thaneka uuyuni moka omukadhona kehe nomumati kehe nomukiintu nomulumentu kehe ena ompito yoku ilonga kutya nee okuna omimvo dhi thike peni.

Shika otashi ti okukala noompito dhili nawa dhiilonga dhaalongi pomithika adhihe mwakwatelwa nopomuthika gwopaunivesiti.
Mesiku ndika lyaalongisikola otatu wayimine nokunkondopeka aalongi ya longe memamnguluko opo omunona kehe oshowo omukuluntu kehe a kale a manguluka okwiilonga naashika shi etele uuyuni uuwanawa.

Nguka omushangwa guukumwe gwa za kaawiliki gwoUNESCO, Irina Bokova, gwoInternational Labour Organisation (ILO) Guy Ryder, nomuwiliki gwoUNICEF Anthony Lake, gwaUNDP Achim Steiner, namushangandjayi gwaEducation International Fred van Leeuwen okudhimbulukwa esiku lyaalongi 5 Kotoba 2017.

LEAVE A REPLY

Please enter your comment!
Please enter your name here