Colonel Lieutenant Hangula a pakwa nefimaneko lopaufule

0
352

Komutoolinghundana

EENHANA-Omunamido 57 Lieutenant Colonel Jefta Hangula okwa pakwa nefimaneko lopaukwaita ofule momaendo eongalo mEenhana.
Omukondjelimanguluko ou a xulifila moshipangelo shaNandjokwe moshitukulwa shaShikoto pehovelo lohani ei okwa pakwa nefimaneko lopaukwaita.

Ovakwaita okudja keembelewa detanga leameno koGrootfontein ova kwatela komesho eshikulafano lepako lomukwaita ou a li omunambelewa omutivali wondodo yopombada moilonga youndaadi moitukulwa Zambezi, Kavango- ushilo naKavango-utokelo, Otjozondjupa, Oshikoto, Ohangwena, Oshana, Omusati, noKunene.

Ovapopi aveshe omunambelewa omukulunhu womatanga ovakwaita moitukulwa oyo Brigadier-ndjai Enos Hakuna naColonel Werner Fritz Naunyango a fikifa etumwalaka okudilila mombelewa yaMajola-ndjai womatanga eameno Martin Shalauda, ova koleka oupendafule waHangula okudja pefimbo lekondjelomanguluko olo a djoina e na eedula 16, 1976.

Luxupe moshiponokela shaCassinga 1978, kexulilo lodula oyo okwa tumwa kelihongo koCuba pamwe novakondjelimanguluko ovaNamibia vakwao , e lihongela outechnika, oshita neendondo 10-12 opo nawa a ka alukila koAngola 1982. Mokwaaluka okwa tumwa e ke lihongele omaudifeko opolitika koLubango

Hangula okwa alukila keumbo 1989, ta djoina etanga leameno 1990 nondodo youCaptain, okwa longa peendodo da yooloka meekamba dovakwaita mOshakati, Grootfontein, Okahandja, nomoWalvis Bay.

Ovapopi aveshe ova tumbula oupenda waye, ombili, eididimiko, omayele, ha longo noishonekwa, nomalalakano mawa, omupukululi peemhito adishe moilonga nova koleka nghee a fiya po omwaka wakula moilonga, moshiwana nomovakwapata. Okwa kala e hole oilonga, oimuna,omudiinini womhango, nomutekuli muwa woshiwana.

Mokudjoina etanga leameno laNamibia 1990, Luitenant Colonel Hangula, okwa wanifa po oilonga yetumo pondje koilongo yaDRC, Zambia nokoLeostho. Ovakondjelimanguluko vakwao melihongo pamwe naye koCuba ova holola nghee tava dimbuluka oupenda waye pefimbo va li mekondjo nokuholola ekanifo laye. Ova weda po kutya, Hangula omukondjelimanguluko omutitatu mongudu yavakwao va li koCuba ta pakwa. Omanga ovakali momukunda va holola kutya oye omufi omutitano moule weemwedi mbali momukunda wavo Ondinganyana u li popepi nodoolopa yaEenhana.

Omukondjelimanguluko ou okwa ombokelwa a li e ya keefya domupambele nokuya moshipangelo shaNandjokwe omo a xulifila pehovelo laKotoba. Okwa fiya ko omufiyekadi Monika Hangula, ounona vatano, ovamwaina vahamano na ina.

LEAVE A REPLY

Please enter your comment!
Please enter your name here