Esiku lyaanongeki muuyuni lya tyapulwa nomaudhano mOshana

0
63

Shipi Elago

OSHAKATI-Iitopolwa ine yokoNooli oyagongalele pokapale kEmanguluko mOshakati okutyapula esiku lyaalongisikola muuyuni ndyoka ha li dhimbulukiwa omumvo kehe momasiku gatano gaKotoba.

Osipana yoshitopolwa shaShana ndjoka ya li megumbo oya li ya ulukile oosipana dhiitopolwa iikwawo komutse gwondjamba noku ninga enyakwa lyuudhano mboka wa li wa nyanyudha aanongeki oyendji.

Oshana osha li sha dhenge mo osipana yoshitopolwa shaMusati ndjoka ya li ya kwatelwa komeho komudhani a tseyika nawa moYoung Chiefs Erastus Kashuna muudhano wotango wesiku.

Omusati ogwa li gwa tameke tagu pukululwa kosheelo shokoola yOshana ihe ogwa kala tagu palutha omatanga ogendji ngoka ga li gena oku ya zila nando okoola ashike omukwati gwOshana okwa li a kwata mo omatanga agehe ngoka a li a thangelwa.

Kombinga onkwawo Oshana osha li wo sha ningi iiponokela ta shi pukululwa pokoola yOmusati ashike nasho osha li sha ndopa oku mona okoola shoka sha etitha eyalulo li kale 0-0 pokafudhepo.

Oshana osha li sha zi pokafudhe po ta shi endelele, neendelelo ndika olye shi etele okoola ndjoka ya li ya teyapo okapale kaShakati hoka ka li ku udha aayambidhidhi yospana ndjika.

Eyalulo lya hugunina olya li 1-0 Omusati ogwa li gwa shuna kegumbo.
Uudhano uutiyali owa li pokati kOhangwena nOshikoto moka Ohangwena ya dhenge Oshikoto 2-0 noku wayimina Oshana medhingoloko lyahugunina.

Uudhano wOshana nOhangwena owa li wa talika kokamwaalu okashona oshoka oyendji yomaatali mboka yi ile pokapale oya adhika taya shuna komagumbo onkene onkalo pokapale kaya li naanaa ta yi shambula ngaashi uudhano wopetameko.
Oshana osha li shi na elago oshoka osha adhika sha vululukwa po nOhangwena oya li ta yi ulike ya loloka oshoka opo owala ya zi le mokapale.

Oshana osha li sha longitha eloloko lyOhangwena nokutula mo okoola neyalulo olya ka ninga 1-0 pokafudhepo.
Okuza pokafudhepo oosipana adhihe odha li tadhi ulike eloloko na osha li sha yela kutya Oshana otashi sindana po uudhano mbuka, ohaluka moominute 85’ dha hugunina Ohangwena oya li ya thanga etanga ele lyuuka kokola yOshana naa ndyoka olya yi monete.
Okoola yOhangwena oya li ya thiminike oosipana ndhika opo dhi ka thange oopelenti konima yohiya ya hugunina sho eyalulo lya li 1-1.
Oshana osha li sha pondola okutula mo oopelenti 3-2, noku ninga enyakwa lyuudhano mbuka lyotango.

Oshana osha li wo sha sindana uudhano wobasketball konima sho osipana yoBasketball ya li ya dhenge mo Oshikoto 24-17 medhingoloko lya hugunina nokuninga wo enyakwa muudhano mboka.

Aalongi oya li ya tyapula esiku lyawo pamwe nOminista yomaudhano.Oshiindingili shika osha li sha longekidhwa koombelewa dhelongo dhaShana opamwe nelelo lyehangano lyaalongi NANTU mOshana.

Teachers 1 gpj:-Osipana yOshana oyo enyakwa lyuudhano waalongisikola 2017 medhimbuluko lyesiku lyaalongi muuyuni ndyoka lya li lya dhimbulukiwa kiitopolwa yokoNooli oshiwike sha ziko mOshakati.

LEAVE A REPLY

Please enter your comment!
Please enter your name here