Namibia a waimina oiwana ikwao mounyuni

0
80

Efiku eli oha li dimbulukiwa alushe momafiku 11 Kotoba opo ku tofwe mo omashongo a taalela ounona voukadona mounyuni. Neudo efiku ola dimbulukiwa koshi yoshipalanyolo “enghonopeko lokaana kokakadona okuya komudo-faneko 2030.

Sheli kolelela kouyelele wOiwana Hangano, mounyuni aushe omuna ounona voukadona tava tengenekwa veli pokati komido 10 fiyo 19 ovo aveshe vena omafa noitalendi ya yooloka, ashike omolwa omashongo eva taalela ounona ava ohava ende tava kana mo momesho ovanhu, nomoinyangadalwa nomoipopiwa yomaxumifo komesho opaiwana.

Oiwana yaHangana otai ti ounona voukadona veli pefimbo lokuya kofikola okudja petameko fiyo opondodo yosekondele ova taalelwa komashongo mahapu neenghono onghene ngeenge tapa etwa eepologalama domaxumifokomesho, okwa pumbiwa opo ku tulwe shihapu meepoloxalama odo deva pamba, opo ku ninipikwe eemhumbwe davo.

Okuli tula mo meepologalama dokaana kokakadona, okwa fimana notaku dulu okulundululila noku eta onghalo younyuni kouwa pomudo 2030. Ngaashi naanaa tashi popiwa kOiwana yaHangana, epangelo laNamibia nalo ola pumbwa oku waimina oiwana ikwao moku fya oshisho kutya okaana kokakadona okaNamibia oka amenwa, ngee oponghalo nawa yopanghalafano, ile pahongo.

Nonande Namibia a xuma komesho monghalonawa yokaana okaNamibia, okuyelakanifa noiwana ihapu yAfrica, natango onghee nghaho oshilongo sha pumbwa okulonga noudiinini okunghonopeka okaana okaNamibia mehongo, nomonghalafano opo ka dule oku tongolola ouwa nowii, okuli amena, omahepeko ngee oopalutu oo haa ningilwa ovakainhu nounona, nosho yo omahepeko opamilele oo eli naanaa eshongo linene la taalela ounona voukadona. Omahepeko aa opamilele okuli oshitukulwa shinene, neenghalamwenyo dovakainhu vahapu oda nyonwa pefimbo vali ounona voukadona, nomolwa omahepeko aa, vahapu inava dula vali oku ya komesho nelongo no inava dula vali okukala oulyo yeli kalekelwa moshiwana.

Omanga tuli apa ohatu shi ningi momadilaadilo mu na okaana kokakadona keedula 16, oko ka kala taka iwa nako momilele komulumenhu womido 34, omanga nokuli kali kena eedula 12.

Kakele kokaana oko kokUuvudhiya, omafiku kemale eshi natango Kundana opamwe noNew Era va dana onghandangala mokufya oshisho kutya omulumenhu omunamido 54 okwa kala tai momilele nokaana keedula 14 oko ka dalwa komukainhu ohonda yaye.

Edi eenghalamwenyo adishe dounona oukadona da nyonwa po, sha ningilwa komesho yovadali vavo, komesho youministeli woukashike koo okanhu neameno lounona nosho, opolifi, novaleli.

Ngeenge toshi tale ota shi ulike nosha yela kutya onghalamwenyo yokaana okaNamibia ina i amenwa, noiningwanima ei ivali, ota i yelekanifwa nemanya la kupulwa mefuta. Sha hala kutya opena ounona vahapu moNamibia va taalela omashongo opanghalafano, unene oo omahepeko opaixulo.

Moitukulwa imwe ngaashi moshitukulwa shaKunene, ounona voukadona ohava hombolwa ve na ashike edula omuwoi. Oinima tai ningwa pefimbo eli oshilongo sha manguluka, efimbo ngeno omo ovo velile po onghalo nawa yokaana vena okukala veli tula mo okufya oshisho kutya, ngaashi naanaa oshilongo sha manguluka nokaana kokakadona okaNamibia nako oka manguluka, noufemba wako owa valulwa.

Omanga tuli mefiku eli, ovaNamibia ova pumbwa okuli nongonona, okuli pula moule, okuuya pamwe, nongaashi naanaa oshipalanyole shoneudo tashi ti, Namibia, nounyuni aushe koonono, okwa pumbwa okutula mo shihapu meputudo, meameno, melongo nomonghalonawa yokaana okakadona, okaNamibia, okAfrica, nounona aveshe kombada yedu.

LEAVE A REPLY

Please enter your comment!
Please enter your name here