Onakuziwa yoOnambula United

0
76

Shipi Elago

Oshiwike shika Kundana ote ku etele onakuziwa ya yimwe yomoosipana oonkulu mondjokonona yokatanga kokoompadhi, osipana ndjoka yi shiwike nokokadhila Onambula United. Oyendji mboka ye hole okatanga kokoompadhi oye shi nkene osipana ndjika ya kala endangalati mondjila yoosipana odhindji moshilongo unene tu kiitopolwa yokoNooli.

Onambula United oya totwa po mo 1980 mokadoolopa okashona ke li muuninginino woshitunda Owambo pethimbo lyuukoloni na oya li ya lukilwa oshilongo shaNambula yaMukatha, Uukwaluudhi United.

Otaku hokololwa kutya osipana ndjika oya li ya totwa po kuPaulus Shikongo shaMwaala ngoka woo a li omunashipundi gwotango,omanga Medusalem Angula a li oye omukuluntu gwosipana.

Uukwaluudhi United kawa li wa kwataakwata oshoka konima owala sho wa li wa totwa oosipana adhihe dhomomudhingoloko gwOwambo ngaashi iitopolwa ine yokoNooli ya li hayi ithanwa nale odha li dha mono kutya momugulu omwiinyenga na ka puna osipana ya li iha yi tila Uukwaluudhi United.

Abed Shikongo oye amushanga gwosipana ndjika na okwa li a kuthileko Kundana nkene osipana ndjika ya li ya totwa pethimbo mpoka ka pwa li puna ooliha na oyali hayi dhana ashike omaudhano gopambili noosipana dhomoshitopolwa nodho kodoolopa dhopopepi ngaashi Okahao, moka a li a tothamo osipana yOnekuni Generation, Oshakati City nosho wo Okakwa United kokOutapi.

Okwa li a holola kutya Onambula United oyo osipana yotango ya totwa moTsandi na oya kala oomvula odhindji oyo ayike yili mo na oya li ya gwedhwa kosipana yODC ndjoka ya li ya ningi omukondjithi gwayo ashike ODC ina yi kalako ethimbo ele oya li ya hanaguka po no inayi galukila we muudhano.

“Pethimbo lyomimvo dho 80 Onambula United oya li yi na aadhani ya nika oshiponga otandi dhimbulukwa aadhani ngaashi Ombandja Iiyambo, David Shipombo, Chris Uirab, Titus Kapolo aadhani mbaka oya kala ya nika oshiponga yo oya li ya pewa oshitalenti shokudhana etanga, oyo ashike wa hala okutala,” Abed ta ti.

Ta tsikileko ta ti kakele komanyakwa ngoka, ga kala haga dhanene Onambula United pomimvo dhomilongo hetatu, okuza mo 1990 osipana oya li ya mono omalunduluko ogendji na oya li ya mono ongundu yaadhani aagundjuka lela mboka wo yeli oshitopolwa shondjokonona oyamba, yosipana ndjika no ka ye shi okudhimbiwa yo oyo nee ya li ya kwathele Onambula United opo yi adhe omasindano naasho ya li ya sindanapo ekopi lyoHans Cup mo 2007 oshipandi shaadhani mboka osho sha li sha dhana onkandangala.

Ota ti yamwe yomaadhani ta vulu okutothamo ngaashi Timoteus Iipinge Chiwalo, ngoka a li a ka hulila kosipana yopashigwana, Oswald Shanyenga Shekuza Blakius, Ingo Batromeus, nomukwati ngoka natango e li ha kwatele Onambula, Iipinge Naftali Hango.
Kakele kekopi lyo Hans Cup, Abed ota dhimbulukwa wo uudhano uunene wo owa li wa simana kOnambula United mo 2003.Uudhano mboka wa li woku ninga omalolelo gokuya ko First Division na oya li ye wu dhana nokasipana ka li ha kazi kOkahandja kedhina Koloko FC hoka ka li kanika oshiponga ashike oya li ye ka dhenge siku ndyoka na oya li ya yi moFirst Divison oshikando shotango.

Osipana oya li ya pewa edhina Onambula United mo 1990 moka wo ya tameka noku eta mo elelo epe sho ndjika ya li ya yi kohi ya Ananias Martin omunangesefa a tseyika nawa moTsandi gwoongeshefa dhoNamib Empire. Ananias Martin ngashingeyi oye Omunashipundi gwosipana ndjika omanga Abed Teofilus oye omudheuli gwayo, ye Abed Shikongo oye amushanga.

Onambula United oya li ya sindana lwotango oliha yosecond division yOmusati mo 2000, na oya li ya yelwa, opo yi ka dhane koliha yo First Division hoka ya kalako sigo 2006 na oya li ya guko konima sho ya li ya longo nuunkundi moliha omumvo ngoka.
Ashike momumvo gwalandula ko 2007 oya li ya sindana ekopi enene lyoHans Cup moka ya li ya sindana N$ 90 000, na oyo wo omvula ya shuna koFirst Division hoka haya dhana sigo onena.

Olwaala lwoNambula United olwo okambulukweya okazizi nokambindja okatokele. Okapale kawo oko Tsandi Sport Stadium hoka kali ka tungwa mo 1985 ka tungilwa oosekundosikola mbali Shikongo Iipinge naMwaala, ashike Onambula nayo oya ningileko nga nee elago oshoka nayo oya li ya manguluka okulongitha okapale tu hoka na oka ningi wo okapale koku dhanena omaudhano gomegumbo.

Oliha yoFirst Division oyi li endangalati kosipana yOnambula mondjila yokuya koPremier League oshoka sigo oompaka ina ya pondola okusindana po oliha ndjika.

Abed okwa ti Onambula oyi na uupyakadhi wokumona aadhani yongushgu moshitopolwa shaMusati okuzilila koosipana dhilwe oshoka olwindji nando ya li ya ningi oonkambadhala opo andola ya lande aadhani moosipana dhomOmusati oosipana ka dhina ohokwe oku landitha aadhani yawo kOnambula kakele kosipana yEpupa Eleven Stars ndjoka oyo awike yihole okuya pa aadhani.

“Konyala aadhani yetu ohatu ya kutha kOshana, nongashiingeyi otuna osipana yo ku zula uumatyona uushona hayi ithanwa Onambula Young Generation ndjoka ngashingeyi hayi dhana koSecond Division na oyi li wo ha yi tu pe aadhani” Abed ta ti.

Okwa ti osipana oyi na omukundu gwoshimaliwa oshoka ka yena omukwashilipaleki, na olwindji ohaya kambadhala oku mona iimaliwa momakopi opo ya vule okukaleka po osipana.
Onambula oha yi yambuka moTsandi mUukwaluudhi.

LEAVE A REPLY

Please enter your comment!
Please enter your name here