South Africa, na Senegal otaya dhanununa Omuhikihiya ina longa pauyuki

0
56

Ehangano ewiliki lyuudhano wetanga lyokoompadha muuyuni FIFA olya tokola oshiwike sha yi kutya uudhano wokukwalifaya okuya kekopi lyuuyuni mboka wa dhanenwe ku South Afrika na Senegal moPolokwane nawu dhanununwe.

Uudhano mbuka otawu dhanununwa molwashoka omuhikihiya okwa monika ondjo yokukotokela nokugandja esindano kospana ndjoka a hala.
Omuhikihiya omvalele ya Ghana okwa monika ondjo mokulundulula oshizemo shuudhano mbuka na okwa indikwa okuhika ohiya sigo aluhe.
Muudhano mbuka South Africa okwa dhenge ospana ya Senegal 2-1 opo yi pite oku ka dhana mekopi lyuuyuni omumvo tu uka ko Russia. Uudhano mbuka owa dhanenwe muDesemba 2016 moPolokwane. Otaku hokololwa omuhikihiya a gandja openalti kuSouth Afrika nonando etanga inali kwatwa komudhani.

Joseph Lamptey okwa gandja openalti ndele etanga ndyoka inali kwatwa anuwa.
Iizemo mbika oya ekelwahi no inayi yalulwa, wo uudhano mbuka otawu ka dhanununwa omwedhi tu uka, FIFA a ti konima yetokolo lyo Hofa yokupulakena iihokolola yuudhano nenge [Court of Arbitration for Sport] lya utha kutya Lamptey ina hika we nando nando.
Lamptey okwa monika ondjo kuFIFA sho a taaguluka ompango mokunwethamo iizemo yuudhano shaa li pampango na okwa ningilwa oondjindikila opo kaa hike we nando nando monkalamwnenyo ye. Omuhikihiya nguka okwa kanitha oshipotha she komeho gompangu ndjoka hayi pulakene iihokolola yomaudhano.

Lamptey okwa gandja openalti ku South Afrika konima sho omudhani gwa Senegal gwokonima Kalidou Koulibaly anuwa a kwata etanga omanga omathano taga ulike kutya etanga olye mu dhenge mongolo etali gwile pevi. Uudhano mbuka owali wa dhanenwa moPolokwane. South Africa okwa tula mo openalti ndjoka nokwa sindana po uudhano mbuka, owo awike a li a sindana momaudhano agehe gokukwalifaya ngoka a dhana sigo oompaka.

Uuyelele auhe moshipotha sha Lamptey inawu tseyika natango, oshoka mbuka inawu gandjwa pambelewa natango.Ina shi kolekwa wo ngele pamwe nguka okwa hiki omolwa okubetsa, sho a gandja openalti ndjoka.

Openalti ndjoka ya gandjwa muudhano mboka wa li waana okoola medhingoloko lyotango, otawu eta omaipulo kutya shika osha etwa koshinima shokubetsa kutya ospana yini tayi sindana po uudhano mboka, ye ngoka a sindana mokubetsa hoka ta futwa iimaliwa.
Lamptey okwa joina FIFA ongomuhikihiya omumvo 2005 ndele ke na siku a hogololelwe a hike uudhano womuthika gwopayuni.

Okwa li ashike a pewa ompito okuhikila omaudhano puudhano wekopi lyiigwana yAfrika mo 2015 moEquatorial Guinea.Omuhikihiya nguka okuna ondjokonona yokuhika inaa ku inekeliwa naanaa. Okwa li a tulwa pevi kehangano ewiliki lyetanga muAfrika sho a pitikile okoola yi yalulwe muudhano womanyakwa gAfrika momumvo 2010 nonando osha monika kutya etanga olya dhengelwa mo mokoola noshikaha.

Okuhika kwe puudhano wokukwalifaya oku ka dhana mekopi lyiigwana yaAfrika pokati kaCongo naAngola, moka ye a pitika uudhano wu tsikile konyala nominute mbali omanga wa li wu na okukala wa thika pehulilo.Okwa ka gandja wo openalti kuAngola nonando ndjika oya nyenyetwa, nokonima okwa hiki opo uudhano wu ye pehulilo, ashike sho ndjika ya thangelwa mo.

Africa, na South Africa, oya ninga iihakanwa yaa hikihiya haya dhanene omaudhano moku utha kutya olye ta sindana po uudhano mboka.
FIFA okwa itaala wo kutya wumwe womuudhano mboka South Afrika a dhanene omanga ekopi lyuuyuni lyomo 2010 inaali thikana nawo owa li wa uthwa nale kutya otawu sindanwa kulye.

FIFA ina ulika kutya uudhano mboka ta popi owo wu ni, ihe uudhano moka South Africa a dhenge Colombia 2-1 naamboka a dhenge Guatemala 5-0 iiwike yimwe yimwe omanga ekopi lyuuyuni inaali dhanenwa moSouth Afrika owo tawu fekelewa. Ookoola adhihe ndatu muudhano waColombia na South Afrika odha li oopenalti. Omanga muudhano pokati ka South Afrika na Guatemala omwa li omatokolo taga kumitha noga piyagana.

Okwa itaalwa kutya aahikihiya oya li ya longo iilonga mbika, palombwelo lyomubetsi momaudhano a tseyika nawa gokoSingapore Wilson Raj Perumal.

FIFA okwa ti uudhano wa South Afrika na Senegal otawu ka dhanununwa omwedhi tu uka. Pethimbo lyomathigathano gopaigwana, esiku nehala olyo ashike lyaa shiwike sigo oompaka.

Ngele South Afrika okwa dhengwa ota kala eli pevi lyongundu ndjika yi na Burkina Faso, Cape Verde , omanga Senegal ngele okwa sindana ota ka shonopeka omwaalu gwiitsa ye pokati ke noospana ndhoka dha li pombanda mongundu ndjika omanga ethigathano lya hugunina lyali inaali dhanwa ehuliloshiwike lya piti.

LEAVE A REPLY

Please enter your comment!
Please enter your name here